Atharva Veda · Chapter 16.1

atisṛṣṭo apāṃ vṛṣabho'tisṛṣṭā agnayo divyāḥ

rujan parirujan mṛṇan pramṛṇan

mroko manohā khano nirdāha ātmadūṣistanūdūṣiḥ

idaṃ tamati sṛjāmi taṃ mābhyavanikṣi

tena tamabhyatisṛjāmo yo'smān dveṣṭi yaṃ vayaṃ dviṣmaḥ

apāmagramasi samudraṃ vo'bhyavasṛjāmi

yo'psvagnirati taṃ sṛjāmi mrokaṃ khaniṃ tanūdūṣim

yo va āpo'gnirāviveśa sa eṣa yadvo ghoraṃ tadetat

indrasya va indriyeṇābhi ṣiñcet

ariprā āpo apa ripramasmat

prāsmadeno vahantu pra duṣvapnyaṃ vahantu

śivena mā cakṣuṣā paśyatāpaḥ śivayā tanvopa spṛśata tvacaṃ me

śivān agnīn apsuṣado havāmahe mayi kṣatraṃ varca ā dhatta devīḥ