Atharva Veda · Chapter 15.14

15.14
sa yatprācīṃ diśamanu vyacalan mārutaṃ śardho bhūtvānuvyacalan mano'nnādaṃ kṛtvā /
manasānnādenānnamatti ya evaṃ veda

sa yaddakṣiṇāṃ diśamanu vyacaladindro bhūtvānuvyacaladbalamannādaṃ kṛtvā / [३
balenānnādenānnamatti ya evaṃ veda

sa yatpratīcīṃ diśamanu vyacaladvaruṇo rājā bhūtvānuvyacaladapo'nnādīḥ kṛtvā
adbhirannādībhirannamatti ya evaṃ veda

sa yadudīcīṃ diśamanu vyacalatsomo rājā bhūtvānuvyacalatsaptarṣibhirhuta āhutimannādīṃ kṛtvā /
āhutyānnādyānnamatti ya evaṃ veda

sa yaddhruvāṃ diśamanu vyacaladviṣṇurbhūtvānuvyacaladvirājamannādīṃ kṛtvā
virājānnādyānnamatti ya evaṃ veda

sa yatpaśūn anu vyacaladrudro bhūtvānuvyacaladoṣadhīrannādīḥ kṛtvā /
oṣadhībhirannādībhirannamatti ya evaṃ veda

sa yatpitṝn anu vyacaladyamo rājā bhūtvānuvyacalatsvadhākāramannādaṃ kṛtvā
svadhākāreṇānnādenānnamatti ya evaṃ veda

sa yan manuṣyān anu vyacaladagnirbhūtvānuvyacalatsvāhākāramannādaṃ kṛtvā
svāhākāreṇānnādenānnamatti ya evaṃ veda

sa yadūrdhvāṃ diśamanu vyacaladbṛhaspatirbhūtvānuvyacaladvaṣaṭkāramannādaṃ kṛtvā
vaṣaṭkāreṇānnādenānnamatti ya evaṃ veda

sa yaddevān anu vyacaladīśāno bhūtvānuvyacalan manyumannādaṃ kṛtvā / [१
manyunānnādenānnamatti ya evaṃ veda

sa yatprajā anu vyacalatprajāpatirbhūtvānuvyacalatprāṇamannādaṃ kṛtvā /
prāṇenānnādenānnamatti ya evaṃ veda

sa yatsarvān antardeśān anu vyacalatparameṣṭhī bhūtvānuvyacaladbrahmānnādaṃ kṛtvā /
brahmaṇānnādenānnamatti ya evaṃ veda