Atharva Veda · Chapter 15.11

tadyasyaivaṃ vidvān vrātyo'tithirgṛhān āgacchet

svayamenamabhyudetya brūyādvrātya kvāvātsīrvrātyodakaṃ vrātya tarpayantu vrātya yathā te priyaṃ tathāstu vrātya yathā te vaśastathāstu vrātya yathā te nikāmastathāstviti

yadenamāha vrātya kvāvātsīriti patha eva tena devayānān ava rundhe

yadenamāha vrātyodakamityapa eva tenāva rundhe

yadenamāha vrātya tarpayantviti prāṇameva tena varṣīyāṃsaṃ kurute

yadenamāha vrātya yathā te priyaṃ tathāstviti priyameva tenāva rundhe

ainaṃ priyaṃ gacchati priyaḥ priyasya bhavati ya evaṃ veda

yadenamāha vrātya yathā te vaśastathāstviti vaśameva tenāva rundhe

ainaṃ vaśo gacchati vaśī vaśināṃ bhavati ya evaṃ veda

yadenamāha vrātya yathā te nikāmastathāstviti nikāmameva tenāva rundhe

ainaṃ nikāmo gacchati nikāme nikāmasya bhavati ya evaṃ veda