Atharva Veda · Chapter 12

sūktam १
sūktam २
sūktam ३
sūktam ४
sūktam ५
sūktam ६
sūktam ७
sūktam ८
sūktam ९
sūktam १०
sūktam ११
12.1
satyaṃ bṛhadṛtamugraṃ dīkṣā tapo brahma yajñaḥ pṛthivīṃ dhārayanti /
sā no bhūtasya bhavyasya patnyuruṃ lokaṃ pṛthivī naḥ kṛṇotu

asaṃbādhaṃ madhyato mānavānāṃ yasyā udvataḥ pravataḥ samaṃ bahu /
nānāvīryā oṣadhīryā bibharti pṛthivī naḥ prathatāṃ rādhyatāṃ naḥ

yasyāṃ samudra uta sindhurāpo yasyāmannaṃ kṛṣṭayaḥ saṃbabhūvuḥ /
yasyāmidaṃ jinvati prāṇadejatsā no bhūmiḥ pūrvapeye dadhātu

yasyāścatasraḥ pradiśaḥ pṛthivyā yasyāmannaṃ kṛṣṭayaḥ saṃbabhūvuḥ /
yā bibharti bahudhā prāṇadejatsā no bhūmirgoṣvapyanne dadhātu

yasyāṃ pūrve pūrvajanā vicakrire yasyāṃ devā asurān abhyavartayan /
gavāmaśvānāṃ vayasaśca viṣṭhā bhagaṃ varcaḥ pṛthivī no dadhātu

viśvaṃbharā vasudhānī pratiṣṭhā hiraṇyavakṣā jagato niveśanī /
vaiśvānaraṃ bibhratī bhūmiragnimindraṛṣabhā draviṇe no dadhātu

yāṃ rakṣantyasvapnā viśvadānīṃ devā bhūmiṃ pṛthivīmapramādam /
sā no madhu priyaṃ duhāmatho ukṣatu varcasā

yārṇave'dhi salilamagra āsītyāṃ māyābhiranvacaran manīṣiṇaḥ /
yasyā hṛdayaṃ parame vyomantsatyenāvṛtamamṛtaṃ pṛthivyāḥ /
sā no bhūmistviṣiṃ balaṃ rāṣṭre dadhātūttame

yasyāmāpaḥ paricarāḥ samānīrahorātre apramādaṃ kṣaranti /
sā no bhūmirbhūridhārā payo duhāmatho ukṣatu varcasā

yāmaśvināvamimātāṃ viṣṇuryasyāṃ vicakrame /
indro yāṃ cakra ātmane'namitrāṃ śacīpatiḥ /
sā no bhūmirvi sṛjatāṃ mātā putrāya me payaḥ

girayaste parvatā himavanto'raṇyaṃ te pṛthivi syonamastu /
babhruṃ kṛṣṇāṃ rohiṇīṃ viśvarūpāṃ dhruvāṃ bhūmiṃ pṛthivīmindraguptām /
ajīto'hato akṣato'dhyaṣṭhāṃ pṛthivīmaham

yatte madhyaṃ pṛthivi yacca nabhyaṃ yāsta ūrjastanvaḥ saṃbabhūvuḥ /
tāsu no dhehyabhi naḥ pavasva mātā bhūmiḥ putro ahaṃ pṛthivyāḥ parjanyaḥ pitā sa u naḥ pipartu

yasyāṃ vediṃ parigṛhṇanti bhūmyāṃ yasyāṃ yajñaṃ tanvate viśvakarmāṇaḥ /
yasyāṃ mīyante svaravaḥ pṛthivyāmūrdhvāḥ śukrā āhutyāḥ purastāt/
sā no bhūmirvardhayadvardhamānā

yo no dveṣatpṛthivi yaḥ pṛtanyādyo'bhidāsān manasā yo vadhena /
taṃ no bhūme randhaya pūrvakṛtvari

tvajjātāstvayi caranti martyāstvaṃ bibharṣi dvipadastvaṃ catuṣpadaḥ /
taveme pṛthivi pañca mānavā yebhyo jyotiramṛtaṃ martyebhya udyantsūryo raśmibhirātanoti

tā naḥ prajāḥ saṃ duhratāṃ samagrā vāco madhu pṛthivi dhehi mahyam

viśvasvaṃ mātaramoṣadhīnāṃ dhruvāṃ bhūmiṃ pṛthivīṃ dharmaṇā dhṛtām /
śivāṃ syonāmanu carema viśvahā

mahatsadhasthaṃ mahatī babhūvitha mahān vega ejathurvepathuṣṭe /
mahāṃstvendro rakṣatyapramādam /
sā no bhūme pra rocaya hiraṇyasyeva saṃdṛśi mā no dvikṣata kaścana

agnirbhūmyāmoṣadhīṣvagnimāpo bibhratyagniraśmasu /
agnirantaḥ puruṣeṣu goṣvaśveṣvagnayaḥ

agnirdiva ā tapatyagnerdevasyorvantarikṣam /
agniṃ martāsa indhate havyavāhaṃ ghṛtapriyam

agnivāsāḥ pṛthivyasitajñūstviṣīmantaṃ saṃśitaṃ mā kṛṇotu

bhūmyāṃ devebhyo dadati yajñaṃ havyamaraṃkṛtam /
bhūmyāṃ manuṣyā jīvanti svadhayānnena martyāḥ /
sā no bhūmiḥ prāṇamāyurdadhātu jaradaṣṭiṃ mā pṛthivī kṛṇotu

yaste gandhaḥ pṛthivi saṃbabhūva yaṃ bibhratyoṣadhayo yamāpaḥ /
yaṃ gandharvā apsarasaśca bhejire tena mā surabhiṃ kṛṇu mā no dvikṣata kaścana

yaste gandhaḥ puṣkaramāviveśa yaṃ saṃjabhruḥ sūryāyā vivāhe /
amartyāḥ pṛthivi gandhamagre tena mā surabhiṃ kṛṇu mā no dvikṣata kaścana

yaste gandhaḥ puruṣeṣu strīṣu puṃsu bhago ruciḥ /
yo aśveṣu vīreṣu yo mṛgeṣūta hastiṣu /
kanyāyāṃ varco yadbhūme tenāsmāmapi saṃ sṛja mā no dvikṣata kaścana

śilā bhūmiraśmā pāṃsuḥ sā bhūmiḥ saṃdhṛtā dhṛtā /
tasyai hiraṇyavakṣase pṛthivyā akaraṃ namaḥ

yasyāṃ vṛkṣā vānaspatyā dhruvāstiṣṭhanti viśvahā /
pṛthivīṃ viśvadhāyasaṃ dhṛtāmachāvadāmasi

udīrāṇā utāsīnāstiṣṭhantaḥ prakrāmantaḥ /
padbhyāṃ dakṣiṇasavyābhyāṃ mā vyathiṣmahi bhūmyām

vimṛgvarīṃ pṛthivīmā vadāmi kṣamāṃ bhūmiṃ brahmaṇā vāvṛdhānām /
ūrjaṃ puṣṭaṃ bibhratīmannabhāgaṃ ghṛtaṃ tvābhi ni ṣīdema bhūme

śuddhā na āpastanve kṣarantu yo naḥ sedurapriye taṃ ni dadhmaḥ /
pavitreṇa pṛthivi motpunāmi

yāste prācīḥ pradiśo yā udīcīryāste bhūme adharādyāśca paścāt/
syonāstā mahyaṃ carate bhavantu mā ni paptaṃ bhuvane śiśriyāṇaḥ

mā naḥ paścān mā purastān nudiṣṭhā mottarādadharāduta /
svasti bhūme no bhava mā vidan paripanthino varīyo yāvayā vadham

yāvatte'bhi vipaśyāmi bhūme sūryeṇa medinā /
tāvan me cakṣurmā meṣṭottarāmuttarāṃ samām

yacchayānaḥ paryāvarte dakṣiṇaṃ sakhyamabhi bhūme pārśvamuttānāstvā pratīcīṃ yatpṛṣṭībhiradhiśemahe /
mā hiṃsīstatra no bhūme sarvasya pratiśīvari

yatte bhūme vikhanāmi kṣipraṃ tadapi rohatu /
mā te marma vimṛgvari mā te hṛdayamarpipam

grīṣmaste bhūme varṣāṇi śaraddhemantaḥ śiśiro vasantaḥ /
ṛtavaste vihitā hāyanīrahorātre pṛthivi no duhātām

yāpa sarpaṃ vijamānā vimṛgvarī yasyāmāsann agnayo ye apsvantaḥ /
parā dasyūn dadatī devapīyūn indraṃ vṛṇānā pṛthivī na vṛtraṃ śakrāya dadhre vṛṣabhāya vṛṣṇe

yasyāṃ sadohavirdhāne yūpo yasyāṃ nimīyate /
brahmāṇo yasyāmarcantyṛgbhiḥ sāmnā yajurvidaḥ yujyante yasyāmṛtvijaḥ somamindrāya pātave

yasyāṃ pūrve bhūtakṛta ṛṣayo gā udānṛcuḥ /
sapta satreṇa vedhaso yajñena tapasā saha

sā no bhūmirā diśatu yaddhanaṃ kāmayāmahe /
bhago anuprayuṅktāmindra etu purogavaḥ

yasyāṃ gāyanti nṛtyanti bhūmyāṃ martyā vyailabāḥ /
yudhyante yasyāmākrando yasyāṃ vadati dundubhiḥ /
sā no bhūmiḥ pra ṇudatāṃ sapatnān asapatnaṃ mā pṛthivī kṛṇotu

yasyāmannaṃ vrīhiyavau yasyā imāḥ pañca kṛṣṭayaḥ /
bhūmyai parjanyapatnyai namo'stu varṣamedase

yasyāḥ puro devakṛtāḥ kṣetre yasyā vikurvate /
prajāpatiḥ pṛthivīṃ viśvagarbhāmāśāmāśāṃ raṇyāṃ naḥ kṛṇotu

nidhiṃ bibhratī bahudhā guhā vasu maṇiṃ hiraṇyaṃ pṛthivī dadātu me /
vasūni no vasudā rāsamānā devī dadhātu sumanasyamānā

janaṃ bibhratī bahudhā vivācasaṃ nānādharmāṇaṃ pṛthivī yathaukasam /
sahasraṃ dhārā draviṇasya me duhāṃ dhruveva dhenuranapasphurantī

yaste sarpo vṛścikastṛṣṭadaṃśmā hemantajabdho bhṛmalo guhā śaye /
krimirjinvatpṛthivi yadyadejati prāvṛṣi tan naḥ sarpan mopa sṛpadyacchivaṃ tena no mṛḍa

ye te panthāno bahavo janāyanā rathasya vartmānasaśca yātave /
yaiḥ saṃcarantyubhaye bhadrapāpāstaṃ panthānaṃ jayemānamitramataskaraṃ yacchivaṃ tena no mṛḍa

malvaṃ bibhratī gurubhṛdbhadrapāpasya nidhanaṃ titikṣuḥ /
varāheṇa pṛthivī saṃvidānā sūkarāya vi jihīte mṛgāya

ye ta āraṇyāḥ paśavo mṛgā vane hitāḥ siṃhā vyāghrāḥ puruṣādaścaranti /
ulaṃ vṛkaṃ pṛthivi duchunāmita ṛkṣīkāṃ rakṣo apa bādhayāsmat

ye gandharvā apsaraso ye cārāyāḥ kimīdinaḥ /
piśācāntsarvā rakṣāṃsi tān asmadbhūme yāvaya

yāṃ dvipādaḥ pakṣiṇaḥ saṃpatanti haṃsāḥ suparṇāḥ śakunā vayāṃsi /
yasyāṃ vāto mātariśveyate rajāṃsi kṛṇvaṃścyāvayaṃśca vṛkṣān /
vātasya pravāmupavāmanu vātyarciḥ

yasyāṃ kṛṣṇamaruṇaṃ ca saṃhite ahorātre vihite bhūmyāmadhi /
varṣeṇa bhūmiḥ pṛthivī vṛtāvṛtā sā no dadhātu bhadrayā priye dhāmanidhāmani

dyauśca ma idaṃ pṛthivī cāntarikṣaṃ ca me vyacaḥ /
agniḥ sūrya āpo medhāṃ viśve devāśca saṃ daduḥ

ahamasmi sahamāna uttaro nāma bhūmyām /
abhīṣāḍasmi viśvāṣāḍāśāmāśāṃ viṣāsahiḥ

ado yaddevi prathamānā purastāddevairuktā vyasarpo mahitvam /
ā tvā subhūtamaviśattadānīmakalpayathāḥ pradiśaścatasraḥ

ye grāmā yadaraṇyaṃ yāḥ sabhā adhi bhūmyām /
ye saṃgrāmāḥ samitayasteṣu cāru vadema te

aśva iva rajo dudhuve vi tān janān ya ākṣiyan pṛthivīṃ yādajāyata /
mandrāgretvarī bhuvanasya gopā vanaspatīnāṃ gṛbhiroṣadhīnām

yadvadāmi madhumattadvadāmi yadīkṣe tadvananti mā /
tviṣīmān asmi jūtimān avānyān hanmi dodhataḥ

śantivā surabhiḥ syonā kīlālodhnī payasvatī /
bhūmiradhi bravītu me pṛthivī payasā saha

yāmanvaicchaddhaviṣā viśvakarmāntararṇave rajasi praviṣṭām /
bhujiṣyaṃ pātraṃ nihitaṃ guhā yadāvirbhoge abhavan mātṛmadbhyaḥ

tvamasyāvapanī janānāmaditiḥ kāmadughā paprathānā /
yatta ūnaṃ tatta ā pūrayāti prajāpatiḥ prathamajā ṛtasya

upasthāste anamīvā ayakṣmā asmabhyaṃ santu pṛthivi prasūtāḥ /
dīrghaṃ na āyuḥ pratibudhyamānā vayaṃ tubhyaṃ balihṛtaḥ syāma

bhūme mātarni dhehi mā bhadrayā supratiṣṭhitam /
saṃvidānā divā kave śriyāṃ mā dhehi bhūtyām

12.2
naḍamā roha na te atra loka idaṃ sīsaṃ bhāgadheyaṃ ta ehi /
yo goṣu yakṣmaḥ puruṣeṣu yakṣmastena tvaṃ sākamadharāṅparehi

aghaśaṃsaduḥśaṃsābhyāṃ kareṇānukareṇa ca /
yakṣmaṃ ca sarvaṃ teneto mṛtyuṃ ca nirajāmasi

nirito mṛtyuṃ nirṛtiṃ nirarātimajāmasi /
yo no dveṣṭi tamaddhyagne akravyādyamu dviṣmastamu te pra suvāmasi

yadyagniḥ kravyādyadi vā vyāghra imaṃ goṣṭhaṃ praviveśānyokāḥ /
taṃ māṣājyaṃ kṛtvā pra hiṇomi dūraṃ sa gacchatvapsuṣado'pyagnīn

yattvā kruddhāḥ pracakrurmanyunā puruṣe mṛte /
sukalpamagne tattvayā punastvoddīpayāmasi

punastvādityā rudrā vasavaḥ punarbrahmā vasunītiragne /
punastvā brahmaṇaspatirādhāddīrghāyutvāya śataśāradāya

yo agniḥ kravyātpraviveśa no gṛhamimaṃ paśyann itaraṃ jātavedasam /
taṃ harāmi pitṛyajñāya dūraṃ sa gharmamindhāṃ parame sadhasthe

kravyādamagniṃ pra hiṇomi dūraṃ yamarājño gacchatu ripravāhaḥ /
ihāyamitaro jātavedā devo devebhyo havyaṃ vahatu prajānan

kravyādamagnimiṣito harāmi janān dṛṃhantaṃ vajreṇa mṛtyum /
ni taṃ śāsmi gārhapatyena vidvān pitṝṇāṃ loke'pi bhāgo astu

kravyādamagniṃ śaśamānamukthyaṃ pra hiṇomi pathibhiḥ pitṛyāṇaiḥ /
mā devayānaiḥ punarā gā atraivaidhi pitṛṣu jāgṛhi tvam

samindhate saṃkasukaṃ svastaye śuddhā bhavantaḥ śucayaḥ pāvakāḥ /
jahāti ripramatyena eti samiddho agniḥ supunā punāti

devo agniḥ saṃkasuko divaspṛṣṭhānyāruhat/
mucyamāno nireṇaso'mogasmāmaśastyāḥ

asmin vayaṃ saṃkasuke agnau riprāṇi mṛjmahe /
abhūma yajñiyāḥ śuddhāḥ pra ṇa āyūṃṣi tāriṣat

saṃkasuko vikasuko nirṛtho yaśca nisvaraḥ /
te te yakṣmaṃ savedaso dūrāddūramanīnaśan

yo no aśveṣu vīreṣu yo no goṣvajāviṣu /
kravyādaṃ nirṇudāmasi yo agnirjanayopanaḥ

anyebhyastvā puruṣebhyo gobhyo aśvebhyastvā /
niḥ kravyādaṃ nudāmasi yo agnirjīvitayopanaḥ

yasmin devā amṛjata yasmin manuṣyā uta /
tasmin ghṛtastāvo mṛṣṭvā tvamagne divaṃ ruha

samiddho agna āhuta sa no mābhyapakramīḥ /
atraiva dīdihi dyavi jyokca sūryaṃ dṛśe

sīse mṛḍḍhvaṃ naḍe mṛḍḍhvamagnau saṃkasuke ca yat/
atho avyāṃ rāmāyāṃ śīrṣaktimupabarhaṇe

sīse malaṃ sādayitvā śīrṣaktimupabarhaṇe /
avyāmasiknyāṃ mṛṣṭvā śuddhā bhavata yajñiyāḥ

paraṃ mṛtyo anu parehi panthāṃ yasta eṣa itaro devayānāt/
cakṣuṣmate śṛṇvate te bravīmīheme vīrā bahavo bhavantu

ime jīvā vi mṛtairāvavṛtrann abhūdbhadrā devahutirno adya /
prāñco agāma nṛtaye hasāya suvīrāso vidathamā vadema

imaṃ jīvebhyaḥ paridhiṃ dadhāmi maiṣāṃ nu gādaparo arthametam /
śataṃ jīvantaḥ śaradaḥ purūcīstiro mṛtyuṃ dadhatāṃ parvatena

ā rohatāyurjarasaṃ vṛṇānā anupūrvaṃ yatamānā yati stha /
tān vastvaṣṭā sujanimā sajoṣāḥ sarvamāyurnayatu jīvanāya

yathāhānyanupūrvaṃ bhavanti yatha rtava ṛtubhiryanti sākam /
yathā na pūrvamaparo jahātyevā dhātarāyūṃṣi kalpayaiṣām

aśmanvatī rīyate saṃ rabhadhvaṃ vīrayadhvaṃ pra taratā sakhāyaḥ /
atrā jahīta ye asan durevā anamīvān uttaremābhi vājān

uttiṣṭhatā pra taratā sakhāyo'śmanvatī nadī syandata iyam /
atrā jahīta ye asann aśivāḥ śivāntsyonān uttaremābhi vājān

vaiśvadevīṃ varcasā ā rabhadhvaṃ śuddhā bhavantaḥ śucayaḥ pāvakāḥ /
atikrāmanto duritā padāni śataṃ himāḥ sarvavīrā madema

udīcīnaiḥ pathibhirvāyumadbhiratikrāmanto'varān parebhiḥ /
triḥ sapta kṛtva ṛṣayaḥ paretā mṛtyuṃ pratyauhan padayopanena

mṛtyoḥ padaṃ yopayanta eta drāghīya āyuḥ prataraṃ dadhānāḥ /
āsīnā mṛtyuṃ nudatā sadhasthe'tha jīvāso vidathamā vadema

imā nārīravidhavāḥ supatnīrāñjanena sarpiṣā saṃ spṛśantām /
anaśravo anamīvāḥ suratnā ā rohantu janayo yonimagre

vyākaromi haviṣāhametau tau brahmaṇā vyahaṃ kalpayāmi /
svadhāṃ pitṛbhyo ajarāṃ kṛṇomi dīrgheṇāyuṣā samimāntsṛjāmi

yo no agniḥ pitaro hṛtsvantarāviveśāmṛto martyeṣu /
mayyahaṃ taṃ pari gṛhṇāmi devaṃ mā so asmān dvikṣata mā vayaṃ tam

apāvṛtya gārhapatyātkravyādā preta dakṣiṇā /
priyaṃ pitṛbhya ātmane brahmabhyaḥ kṛṇutā priyam

dvibhāgadhanamādāya pra kṣiṇātyavartyā /
agniḥ putrasya jyeṣṭhasya yaḥ kravyādanirāhitaḥ

yatkṛṣate yadvanute yacca vasnena vindate /
sarvaṃ martyasya tan nāsti kravyāccedanirāhitaḥ

ayajñiyo hatavarcā bhavati nainena havirattave /
chinatti kṛṣyā gordhanādyaṃ kravyādanuvartate

muhurgṛdhyaiḥ pra vadatyārtiṃ martyo nītya /
kravyādyān agnirantikādanuvidvān vitāvati

grāhyā gṛhāḥ saṃ sṛjyante striyā yan mriyate patiḥ /
brahmaiva vidvān eṣyo yaḥ kravyādaṃ nirādadhat

yadripraṃ śamalaṃ cakṛma yacca duṣkṛtam /
āpo mā tasmācchumbhantvagneḥ saṃkasukācca yat

tā adharādudīcīrāvavṛtran prajānaitīḥ pathibhirdevayānaiḥ /
parvatasya vṛṣabhasyādhi pṛṣṭhe navāścaranti saritaḥ purāṇīḥ

agne akravyān niḥ kravyādaṃ nudā devayajanaṃ vaha

imaṃ kravyādā viveśāyaṃ kravyādamanvagāt/
vyāghrau kṛtvā nānānaṃ taṃ harāmi śivāparam

antardhirdevānāṃ paridhirmanuṣyāṇāmagnirgārhapatya ubhayān antarā śritaḥ

jīvānāmāyuḥ pra tira tvamagne pitṝṇāṃ lokamapi gacchantu ye mṛtāḥ /
sugārhapatyo vitapann arātimuṣāmuṣāṃ śreyasīṃ dhehyasmai

sarvān agne sahamānaḥ sapatnān aiṣāmūrjaṃ rayimasmāsu dhehi

imamindraṃ vahniṃ paprimanvārabhadhvaṃ sa vo nirvakṣadduritādavadyāt/
tenāpa hata śarumāpatantaṃ tena rudrasya pari pātāstām

anaḍvāhaṃ plavamanvārabhadhvaṃ sa vo nirvakṣadduritādavadyāt/
ā rohata saviturnāvametāṃ ṣaḍbhirurvībhiramatiṃ tarema

ahorātre anveṣi bibhratkṣemyastiṣṭhan prataraṇaḥ suvīraḥ /
anāturāntsumanasastalpa bibhrajjyogeva naḥ puruṣagandhiredhi

te devebhya ā vṛścante pāpaṃ jīvanti sarvadā /
kravyādyān agnirantikādaśva ivānuvapate naḍam

ye'śraddhā dhanakāmyā kravyādā samāsate /
te vā anyeṣāṃ kumbhīṃ paryādadhati sarvadā

preva pipatiṣati manasā muhurā vartate punaḥ /
kravyādyān agnirantikādanuvidvān vitāvati

aviḥ kṛṣṇā bhāgadheyaṃ paśūnāṃ sīsaṃ kravyādapi candraṃ ta āhuḥ /
māṣāḥ piṣṭā bhāgadheyaṃ te havyamaraṇyānyā gahvaraṃ sacasva

iṣīkāṃ jaratīmiṣṭvā tilpiñjaṃ daṇḍanaṃ naḍam /
tamindra idhmaṃ kṛtvā yamasyāgniṃ nirādadhau

pratyañcamarkaṃ pratyarpayitvā pravidvān panthāṃ vi hyāviveśa /
parāmīṣāmasūn dideśa dīrgheṇāyuṣā samimāntsṛjāmi

12.3
pumān puṃso'dhi tiṣṭha carmehi tatra hvayasva yatamā priyā te /
yāvantāvagre prathamaṃ sameyathustadvāṃ vayo yamarājye samānam

tāvadvāṃ cakṣustati vīryāṇi tāvattejastatidhā vājināni /
agniḥ śarīraṃ sacate yadaidho'dhā pakvān mithunā saṃ bhavāthaḥ

samasmiṃlloke samu devayāne saṃ smā sametaṃ yamarājyeṣu /
pūtau pavitrairupa taddhvayethāṃ yadyadreto adhi vāṃ saṃbabhūva

āpasputrāso abhi saṃ viśadhvamimaṃ jīvaṃ jīvadhanyāḥ sametya /
tāsāṃ bhajadhvamamṛtaṃ yamāhurodanaṃ pacati vāṃ janitrī

yaṃ vāṃ pitā pacati yaṃ ca mātā riprān nirmuktyai śamalācca vācaḥ /
sa odanaḥ śatadhāraḥ svarga ubhe vyāpa nabhasī mahitvā

ubhe nabhasī ubhayāṃśca lokān ye yajvanāmabhijitāḥ svargāḥ /
teṣāṃ jyotiṣmān madhumān yo agre tasmin putrairjarasi saṃ śrayethām

prācīṃprācīṃ pradiśamā rabhethāmetaṃ lokaṃ śraddadhānāḥ sacante /
yadvāṃ pakvaṃ pariviṣṭamagnau tasya guptaye daṃpatī saṃ śrayethām

dakṣiṇāṃ diśamabhi nakṣamāṇau paryāvartethāmabhi pātrametat/
tasmin vāṃ yamaḥ pitṛbhiḥ saṃvidānaḥ pakvāya śarma bahulaṃ ni yachāt

pratīcī diśāmiyamidvaraṃ yasyāṃ somo adhipā mṛḍitā ca /
tasyāṃ śrayethāṃ sukṛtaḥ sacethāmadhā pakvān mithunā saṃ bhavāthaḥ

uttaraṃ rāṣṭraṃ prajayottarāvaddiśāmudīcī kṛṇavan no agram /
pāṅktaṃ chandaḥ puruṣo babhūva viśvairviśvāṅgaiḥ saha saṃ bhavema

dhruveyaṃ virāṇnamo astvasyai śivā putrebhya uta mahyamastu /
sā no devyadite viśvavāra irya iva gopā abhi rakṣa pakvam

piteva putrān abhi saṃ svajasva naḥ śivā no vātā iha vāntu bhūmau /
yamodanaṃ pacato devate iha taṃ nastapa uta satyaṃ ca vettu

yadyadkṛṣṇaḥ śakuna eha gatvā tsaran viṣaktaṃ bila āsasāda /
yadvā dāsyārdrahastā samaṅkta ulūkhalaṃ musalaṃ śumbhatāpaḥ

ayaṃ grāvā pṛthubudhno vayodhāḥ pūtaḥ pavitrairapa hantu rakṣaḥ /
ā roha carma mahi śarma yaccha mā daṃpatī pautramaghaṃ ni gātām

vanaspatiḥ saha devairna āgan rakṣaḥ piśācāmapabādhamānaḥ /
sa ucchrayātai pra vadāti vācaṃ tena lokāmabhi sarvān jayema

sapta medhān paśavaḥ paryagṛhṇan ya eṣāṃ jyotiṣmām̐ uta yaścakarśa /
trayastriṃśaddevatāstāntsacante sa naḥ svargamabhi neṣa lokam

svargaṃ lokamabhi no nayāsi saṃ jāyayā saha putraiḥ syāma /
gṛhṇāmi hastamanu maitvatra mā nastārīn nirṛtirmo arātiḥ

grāhiṃ pāpmānamati tāmayāma tamo vyasya pra vadāsi valgu /
vānaspatya udyato mā jihiṃsīrmā taṇḍulaṃ vi śarīrdevayantam

viśvavyacā ghṛtapṛṣṭho bhaviṣyantsayonirlokamupa yāhyetam /
varṣavṛddhamupa yaccha śūrpaṃ tuṣaṃ palāvān apa tadvinaktu

trayo lokāḥ saṃmitā brāhmaṇena dyaurevāsau pṛthivyantarikṣam /
aṃśūn gṛbhītvānvārabhethāmā pyāyantāṃ punarā yantu śūrpam

pṛthagrūpāṇi bahudhā paśūnāmekarūpo bhavasi saṃ samṛddhyā /
etāṃ tvacaṃ lohinīṃ tāṃ nudasva grāvā śumbhāti malaga iva vastrā

pṛthivīṃ tvā pṛthivyāmā veśayāmi tanūḥ samānī vikṛtā ta eṣā /
yadyaddyuttaṃ likhitamarpaṇena tena mā susrorbrahmaṇāpi tadvapāmi

janitrīva prati haryāsi sūnuṃ saṃ tvā dadhāmi pṛthivīṃ pṛthivyā /
ukhā kumbhī vedyāṃ mā vyathiṣṭhā yajñāyudhairājyenātiṣaktā

agniḥ pacan rakṣatu tvā purastādindro rakṣatu dakṣiṇato marutvān /
varuṇastvā dṛṃhāddharuṇe pratīcyā uttarāttvā somaḥ saṃ dadātai

pūtāḥ pavitraiḥ pavante abhrāddivaṃ ca yanti pṛthivīṃ ca lokān /
tā jīvalā jīvadhanyāḥ pratiṣṭhāḥ pātra āsiktāḥ paryagnirindhām

ā yanti divaḥ pṛthivīṃ sacante bhūmyāḥ sacante adhyantarikṣam /
śuddhāḥ satīstā u śumbhanta eva tā naḥ svargamabhi lokaṃ nayantu

uteva prabhvīruta saṃmitāsa uta śukrāḥ śucayaścāmṛtāsaḥ /
tā odanaṃ daṃpatibhyāṃ praśiṣṭā āpaḥ śikṣantīḥ pacatā sunāthāḥ

saṃkhyātā stokāḥ pṛthivīṃ sacante prāṇāpānaiḥ saṃmitā oṣadhībhiḥ /
asaṃkhyātā opyamānāḥ suvarṇāḥ sarvaṃ vyāpuḥ śucayaḥ śucitvam

udyodhantyabhi valganti taptāḥ phenamasyanti bahulāṃśca bindūn /
yoṣeva dṛṣṭvā patimṛtviyāyaitaistaṇḍulairbhavatā samāpaḥ

utthāpaya sīdato budhna enān adbhirātmānamabhi saṃ spṛśantām /
amāsi pātrairudakaṃ yadetan mitāstaṇḍulāḥ pradiśo yadīmāḥ

pra yaccha parśuṃ tvarayā harausamahiṃsanta oṣadhīrdāntu parvan /
vāsāṃ somaḥ pari rājyaṃ babhūvāmanyutā no vīrudho bhavantu

navaṃ barhirodanāya stṛṇīta priyaṃ hṛdaścakṣuṣo valgvastu /
tasmin devāḥ saha daivīrviśantvimaṃ prāśnantvṛtubhirniṣadya

vanaspate stīrṇamā sīda barhiragniṣṭobhaiḥ saṃmito devatābhiḥ /
tvaṣṭreva rūpaṃ sukṛtaṃ svadhityainā ehāḥ pari pātre dadṛśrām

ṣaṣṭyāṃ śaratsu nidhipā abhīchātsvaḥ pakvenābhyaśnavātai /
upainaṃ jīvān pitaraśca putrā etaṃ svargaṃ gamayāntamagneḥ

dhartā dhriyasva dharuṇe pṛthivyā acyutaṃ tvā devatāścyāvayantu /
taṃ tvā daṃpatī jīvantau jīvaputrāvudvāsayātaḥ paryagnidhānāt

sarvāntsamāgā abhijitya lokān yāvantaḥ kāmāḥ samatītṛpastān /
vi gāhethāmāyavanaṃ ca darvirekasmin pātre adhyuddharainam

upa stṛṇīhi prathaya purastādghṛtena pātramabhi ghārayaitat/
vāśrevosrā taruṇaṃ stanasyumimaṃ devāso abhihiṅkṛṇota

upāstarīrakaro lokametamuruḥ prathatāmasamaḥ svargaḥ /
tasmiṃ chrayātai mahiṣaḥ suparṇo devā enaṃ devatābhyaḥ pra yachān

yadyajjāyā pacati tvatparaḥparaḥ patirvā jāye tvattiraḥ /
saṃ tatsṛjethāṃ saha vāṃ tadastu saṃpādayantau saha lokamekam

yāvanto asyāḥ pṛthivīṃ sacante asmatputrāḥ pari ye saṃbabhūvuḥ /
sarvāṃstāmupa pātre hvayethāṃ nābhiṃ jānānāḥ śiśavaḥ samāyān

vasoryā dhārā madhunā prapīnā ghṛtena miśrā amṛtasya nābhayaḥ /
sarvāstā ava rundhe svargaḥ ṣaṣṭyāṃ śaratsu nidhipā abhīchāt

nidhiṃ nidhipā abhyenamichādanīśvarā abhitaḥ santu ye'nye /
asmābhirdatto nihitaḥ svargastribhiḥ kāṇḍaistrīntsvargān arukṣat

agnī rakṣastapatu yadvidevaṃ kravyādpiśāca iha mā pra pāsta /
nudāma enamapa rudhmo asmadādityā enamaṅgirasaḥ sacantām

ādityebhyo aṅgirobhyo madhvidaṃ ghṛtena miśraṃ prati vedayāmi /
śuddhahastau brāhmaṇasyānihatyaitaṃ svargaṃ sukṛtāvapītam

idaṃ prāpamuttamaṃ kāṇḍamasya yasmāllokātparameṣṭhī samāpa /
ā siñca sarpirghṛtavatsamaṅgdhyeṣa bhāgo aṅgiraso no atra

satyāya ca tapase devatābhyo nidhiṃ śevadhiṃ pari dadma etam /
mā no dyūte'va gān mā samityāṃ mā smānyasmā utsṛjatā purā mat

ahaṃ pacāmyahaṃ dadāmi mamedu karman karuṇe'dhi jāyā /
kaumāro loko ajaniṣṭa putro'nvārabhethāṃ vaya uttarāvat

na kilbiṣamatra nādhāro asti na yan mitraiḥ samamamāna eti /
anūnaṃ pātraṃ nihitaṃ na etatpaktāraṃ pakvaḥ punarā viśāti

priyaṃ priyāṇāṃ kṛṇavāma tamaste yantu yatame dviṣanti /
dhenuranaḍvān vayovaya āyadeva pauruṣeyamapa mṛtyuṃ nudantu

samagnayaḥ viduranyo anyaṃ ya oṣadhīḥ sacate yaśca sindhūn /
yāvanto devā divyātapanti hiraṇyaṃ jyotiḥ pacato babhūva

eṣā tvacāṃ puruṣe saṃ babhūvānagnāḥ sarve paśavo ye anye /
kṣatreṇātmānaṃ pari dhāpayātho'motaṃ vāso mukhamodanasya

yadakṣeṣu vadā yatsamityāṃ yadvā vadā anṛtaṃ vittakāmyā /
samānaṃ tantumabhi samvasānau tasmintsarvaṃ śamalaṃ sādayāthaḥ

varṣaṃ vanuṣvāpi gaccha devāṃstvaco dhūmaṃ paryutpātayāsi /
viśvavyacā ghṛtapṛṣṭho bhaviṣyantsayonirlokamupa yāhyetam

tanvaṃ svargo bahudhā vi cakre yathā vida ātmann anyavarṇām /
apājaitkṛṣṇāṃ ruśatīṃ punāno yā lohinī tāṃ te agnau juhomi

prācyai tvā diśe'gnaye'dhipataye'sitāya rakṣitra ādityāyeṣumate /
etaṃ pari dadmastaṃ no gopāyatāsmākamaitoḥ /
diṣṭaṃ no atra jarase ni neṣajjarā mṛtyave pari ṇo dadātvatha pakvena saha saṃ bhavema

dakṣiṇāyai tvā diśa indrāyādhipataye tiraścirājaye rakṣitre yamāyeṣumate /
etaṃ pari dadmastaṃ no gopāyatāsmākamaitoḥ /
diṣṭaṃ no atra jarase ni neṣajjarā mṛtyave pari ṇo dadātvatha pakvena saha saṃ bhavema

pratīcyai tvā diśe varuṇāyādhipataye pṛdākave rakṣitre'nnāyeṣumate /
etaṃ pari dadmastaṃ no gopāyatāsmākamaitoḥ /
diṣṭaṃ no atra jarase ni neṣajjarā mṛtyave pari ṇo dadātvatha pakvena saha saṃ bhavema

udīcyai tvā diśe somāyādhipataye svajāya rakṣitre'śanyā iṣumatyai /
etaṃ pari dadmastaṃ no gopāyatāsmākamaitoḥ /
diṣṭaṃ no atra jarase ni neṣajjarā mṛtyave pari ṇo dadātvatha pakvena saha saṃ bhavema

dhruvāyai tvā diśe viṣṇave'dhipataye kalmāṣagrīvāya rakṣitra oṣadhībhya iṣumatībhyaḥ /
etaṃ pari dadmastaṃ no gopāyatāsmākamaitoḥ /
diṣṭaṃ no atra jarase ni neṣajjarā mṛtyave pari ṇo dadātvatha pakvena saha saṃ bhavema

ūrdhvāyai tvā diśe bṛhaspataye'dhipataye śvitrāya rakṣitre varṣāyeṣumate /
etaṃ pari dadmastaṃ no gopāyatāsmākamaitoḥ /
diṣṭaṃ no atra jarase ni neṣajjarā mṛtyave pari ṇo dadātvatha pakvena saha saṃ bhavema

12.4
dadāmītyeva brūyādanu caināmabhutsata /
vaśāṃ brahmabhyo yācadbhyastatprajāvadapatyavat

prajayā sa vi krīṇīte paśubhiścopa dasyati /
ya ārṣeyebhyo yācadbhyo devānāṃ gāṃ na ditsati

kūṭayāsya saṃ śīryante śloṇayā kāṭamardati /
baṇḍayā dahyante gṛhāḥ kāṇayā dīyate svam

vilohito adhiṣṭhānācchakno vindati gopatim /
tathā vaśāyāḥ saṃvidyaṃ duradabhnā hyucyase

padorasyā adhiṣṭhānādviklindurnāma vindati /
anāmanātsaṃ śīryante yā mukhenopajighrati

yo asyāḥ karṇāvāskunotyā sa deveṣu vṛścate /
lakṣma kurva iti manyate kanīyaḥ kṛṇute svam

yadasyāḥ kasmai cidbhogāya bālān kaścitprakṛntati /
tataḥ kiśorā mriyante vatsāṃśca ghātuko vṛkaḥ

yadasyā gopatau satyā loma dhvāṅkṣo ajīhiḍat/
tataḥ kumārā mriyante yakṣmo vindatyanāmanāt

yadasyāḥ palpūlanaṃ śakṛddāsī samasyati /
tato'parūpaṃ jāyate tasmādavyeṣyadenasaḥ

jāyamānābhi jāyate devāntsabrāhmaṇān vaśā /
tasmādbrahmabhyo deyaiṣā tadāhuḥ svasya gopanam

ya enāṃ vanimāyanti teṣāṃ devakṛtā vaśā /
brahmajyeyaṃ tadabruvan ya enāṃ nipriyāyate

ya ārṣeyebhyo yācadbhyo devānāṃ gāṃ na ditsati /
ā sa deveṣu vṛścate brāhmaṇānāṃ ca manyave

yo asya syādvaśābhogo anyāmicheta tarhi saḥ /
hiṃste adattā puruṣaṃ yācitāṃ ca na ditsati

yathā śevadhirnihito brāhmaṇānāṃ tathā vaśā /
tāmetadachāyanti yasmin kasmiṃśca jāyate

svametadachāyanti yadvaśāṃ brāhmaṇā abhi /
yathainān anyasmin jinīyādevāsyā nirodhanam

caredevā traihāyaṇādavijñātagadā satī /
vaśāṃ ca vidyān nārada brāhmaṇāstarhyeṣyāḥ

ya enāmavaśāmāha devānāṃ nihitaṃ nidhim /
ubhau tasmai bhavāśarvau parikramyeṣumasyataḥ

yo asyā ūdho na vedātho asyā stanān uta /
ubhayenaivāsmai duhe dātuṃ cedaśakadvaśām

duradabhnainamā śaye yācitāṃ ca na ditsati /
nāsmai kāmāḥ samṛdhyante yāmadattvā cikīrṣati

devā vaśāmayācan mukhaṃ kṛtvā brāhmaṇam /
teṣāṃ sarveṣāmadadaddheḍaṃ nyeti mānuṣaḥ

heḍaṃ paśūnāṃ nyeti brāhmaṇebhyo'dadadvaśām /
devānāṃ nihitaṃ bhāgaṃ martyaścen nipriyāyate

yadanye śataṃ yāceyurbrāhmaṇā gopatiṃ vaśām /
athaināṃ devā abruvann evaṃ ha viduṣo vaśā

ya evaṃ viduṣe'dattvāthānyebhyo dadadvaśām /
durgā tasmā adhiṣṭhāne pṛthivī sahadevatā

devā vaśāmayācan yasminn agre ajāyata /
tāmetāṃ vidyān nāradaḥ saha devairudājata

anapatyamalpapaśuṃ vaśā kṛṇoti pūruṣam /
brāhmaṇaiśca yācitāmathaināṃ nipriyāyate

agnīṣomābhyāṃ kāmāya mitrāya varuṇāya ca /
tebhyo yācanti brāhmaṇāsteṣvā vṛścate'dadat

yāvadasyā gopatirnopaśṛṇuyādṛcaḥ svayam /
caredasya tāvadgoṣu nāsya śrutvā gṛhe vaset

yo asyā ṛca upaśrutyātha goṣvacīcarat/
āyuśca tasya bhūtiṃ ca devā vṛścanti hīḍitāḥ

vaśā carantī bahudhā devānāṃ nihito nidhiḥ /
āviṣkṛṇuṣva rūpāṇi yadā sthāma jighāṃsati

āvirātmānaṃ kṛṇute yadā sthāma jighāṃsati /
atho ha brahmabhyo vaśā yāñcyāya kṛṇute manaḥ

manasā saṃ kalpayati taddevāmapi gacchati /
tato ha brahmāṇo vaśāmupaprayanti yācitum

svadhākāreṇa pitṛbhyo yajñena devatābhyaḥ /
dānena rājanyo vaśāyā māturheḍaṃ na gacchati

vaśā mātā rājanyasya tathā saṃbhūtamagraśaḥ /
tasyā āhuranarpaṇaṃ yadbrahmabhyaḥ pradīyate

yathājyaṃ pragṛhītamālumpetsruco agnaye /
evā ha brahmabhyo vaśāmagnaya ā vṛścate'dadat

puroḍāśavatsā sudughā loke'smā upa tiṣṭhati /
sāsmai sarvān kāmān vaśā pradaduṣe duhe

sarvān kāmān yamarājye vaśā pradaduṣe duhe /
athāhurnārakaṃ lokaṃ nirundhānasya yācitām

pravīyamānā carati kruddhā gopataye vaśā /
vehataṃ mā manyamāno mṛtyoḥ pāśeṣu badhyatām

yo vehataṃ manyamāno'mā ca pacate vaśām /
apyasya putrān pautrāṃśca yācayate bṛhaspatiḥ

mahadeṣāva tapati carantī goṣu gaurapi /
atho ha gopataye vaśādaduṣe viṣaṃ duhe

priyaṃ paśūnāṃ bhavati yadbrahmabhyaḥ pradīyate /
atho vaśāyāstatpriyaṃ yaddevatrā haviḥ syāt

yā vaśā udakalpayan devā yajñādudetya /
tāsāṃ viliptyaṃ bhīmāmudākuruta nāradaḥ

tāṃ devā amīmāṃsanta vaśeyā३ avaśeti /
tāmabravīn nārada eṣā vaśānāṃ vaśatameti

kati nu vaśā nārada yāstvaṃ vettha manuṣyajāḥ /
tāstvā pṛchāmi vidvāṃsaṃ kasyā nāśnīyādabrāhmaṇaḥ

viliptyā bṛhaspate yā ca sūtavaśā vaśā /
tasyā nāśnīyādabrāhmaṇo ya āśaṃseta bhūtyām

namaste astu nāradānuṣṭhu viduṣe vaśā /
katamāsāṃ bhīmatamā yāmadattvā parābhavet

viliptī yā bṛhaspate'tho sūtavaśā vaśā /
tasyā nāśnīyādabrāhmaṇo ya āśaṃseta bhūtyām

trīṇi vai vaśājātāni viliptī sūtavaśā vaśā /
tāḥ pra yachedbrahmabhyaḥ so'nāvraskaḥ prajāpatau

etadvo brāhmaṇā haviriti manvīta yācitaḥ /
vaśāṃ cedenaṃ yāceyuryā bhīmādaduṣo gṛhe

devā vaśāṃ paryavadan na no'dāditi hīḍitāḥ /
etābhirṛgbhirbhedaṃ tasmādvai sa parābhavat

utaināṃ bhedo nādadādvaśāmindreṇa yācitaḥ /
tasmāttaṃ devā āgaso'vṛścann ahamuttare

ye vaśāyā adānāya vadanti parirāpiṇaḥ /
indrasya manyave jālmā ā vṛścante acittyā

ye gopatiṃ parāṇīyāthāhurmā dadā iti /
rudrasyāstāṃ te hetīṃ pari yantyacittyā

yadi hutaṃ yadyahutāmamā ca pacate vaśām /
devāntsabrāhmaṇān ṛtvā jihmo lokān nirṛcchati

12.5
śrameṇa tapasā sṛṣṭā brahmaṇā vittā rte śritā

satyenāvṛtā śriyā prāvṛtā yaśasā parīvṛtā

svadhayā parihitā śraddhayā paryūḍhā dīkṣayā guptā yajñe pratiṣṭhitā loko nidhanam

brahma padavāyaṃ brāhmaṇo'dhipatiḥ

tāmādadānasya brahmagavīṃ jinato brāhmaṇaṃ kṣatriyasya

apa krāmati sūnṛtā vīryaṃ punyā lakṣmīḥ

ojaśca tejaśca sahaśca balaṃ ca vākcendriyaṃ ca śrīśca dharmaśca

brahma ca kṣatraṃ ca rāṣṭraṃ ca viśaśca tviṣiśca yaśaśca varcaśca draviṇaṃ ca

āyuśca rūpaṃ ca nāma ca kīrtiśca prāṇaścāpānaśca cakṣuśca śrotraṃ ca

payaśca rasaścānnaṃ cānnādyaṃ ca rtaṃ ca satyaṃ ceṣṭaṃ ca pūrtaṃ ca prajā ca paśavaśca

tāni sarvāṇyapa krāmanti brahmagavīmādadānasya jinato brāhmaṇaṃ kṣatriyasya

saiṣā bhīmā brahmagavyaghaviṣā sākṣātkṛtyā kūlbajamāvṛtā

sarvāṇyasyāṃ ghorāṇi sarve ca mṛtyavaḥ

sarvāṇyasyāṃ krūrāṇi sarve puruṣavadhāḥ

sā brahmajyaṃ devapīyuṃ brahmagavyādīyamānā mṛtyoḥ padvīṣa ā dyati

meniḥ śatavadhā hi sā brahmajyasya kṣitirhi sā

tasmādvai brāhmaṇānāṃ gaurdurādharṣā vijānatā

vajro dhāvantī vaiśvānara udvītā

hetiḥ śaphān utkhidantī mahādevo'pekṣamāṇā

kṣurapavirīkṣamāṇā vāśyamānābhi sphūrjati

mṛtyurhiṅkṛṇvatyugro devaḥ puchaṃ paryasyantī

sarvajyāniḥ karṇau varīvarjayantī rājayakṣmo mehantī

menirduhyamānā śīrṣaktirdugdhā

sedirupatiṣṭhantī mithoyodhaḥ parāmṛṣṭā

śaravyā mukhe'pinahyamāna ṛtirhanyamānā

aghaviṣā nipatantī tamo nipatitā

anugacchantī prāṇān upa dāsayati brahmagavī brahmajyasya

vairaṃ vikṛtyamānā pautrādyaṃ vibhājyamānā

devahetirhriyamāṇā vyṛddhirhṛtā

pāpmādhidhīyamānā pāruṣyamavadhīyamānā

viṣaṃ prayasyantī takmā prayastā

aghaṃ pracyamānā duṣvapnyaṃ pakvā

mūlabarhaṇī paryākriyamāṇā kṣitiḥ paryākṛtā

asaṃjñā gandhena śuguddhriyamāṇāśīviṣa uddhṛtā

abhūtirupahriyamāṇā parābhūtirupahṛtā

śarvaḥ kruddhaḥ piśyamānā śimidā piśitā

avartiraśyamānā nirṛtiraśitā

aśitā lokācchinatti brahmagavī brahmajyamasmāccāmuṣmācca

tasyā āhananaṃ kṛtyā menirāśasanaṃ valaga ūbadhyam

asvagatā parihṇutā

agniḥ kravyādbhūtvā brahmagavī brahmajyaṃ praviśyātti

sarvāsyāṅgā parvā mūlāni vṛścati

chinattyasya pitṛbandhu parā bhāvayati mātṛbandhu

vivāhāṃ jñātīntsarvān api kṣāpayati brahmagavī brahmajyasya kṣatriyeṇāpunardīyamānā

avāstumenamasvagamaprajasaṃ karotyaparāparaṇo bhavati kṣīyate

ya evaṃ viduṣo brāhmaṇasya kṣatriyo gāmādatte

kṣipraṃ vai tasyāhanane gṛdhrāḥ kurvata ailabam

kṣipraṃ vai tasyādahanaṃ pari nṛtyanti keśinīrāghnānāḥ pāṇinorasi kurvāṇāḥ pāpamailabam

kṣipraṃ vai tasya vāstuṣu vṛkāḥ kurvata ailabam

kṣipraṃ vai tasya pṛcchanti yattadāsī३ idaṃ nu tā३ iti

chindhyā chindhi pra chindhyapi kṣāpaya kṣāpaya

ādadānamāṅgirasi brahmajyamupa dāsaya

vaiśvadevī hyucyase kṛtyā kūlbajamāvṛtā

oṣantī samoṣantī brahmaṇo vajraḥ

kṣurapavirmṛtyurbhūtvā vi dhāva tvam

ā datse jinatāṃ varca iṣṭaṃ pūrtaṃ cāśiṣaḥ

ādāya jītaṃ jītāya loke'muṣmin pra yacchasi

aghnye padavīrbhava brāhmaṇasyābhiśastyā

meniḥ śaravyā bhavāghādaghaviṣā bhava

aghnye pra śiro jahi brahmajyasya kṛtāgaso devapīyorarādhasaḥ

tvayā pramūrṇaṃ mṛditamagnirdahatu duścitam

vṛśca pra vṛśca saṃ vṛśca daha pra daha saṃ daha

brahmajyaṃ devyaghnya ā mūlādanusaṃdaha

yathāyādyamasādanātpāpalokān parāvataḥ

evā tvaṃ devyaghnye brahmajyasya kṛtāgaso devapīyorarādhasaḥ

vajreṇa śataparvaṇā tīkṣṇena kṣurabhṛṣṭinā

pra skandhān pra śiro jahi

lomānyasya saṃ chindhi tvacamasya vi veṣṭaya

māṃsānyasya śātaya snāvānyasya saṃ vṛha

asthīnyasya pīḍaya majjānamasya nirjahi

sarvāsyāṅgā parvāṇi vi śrathaya

agnirenaṃ kravyātpṛthivyā nudatāmudoṣatu vāyurantarikṣān mahato varimṇaḥ

sūrya enaṃ divaḥ pra ṇudatāṃ nyoṣatu