āryāpañcadaśīstotram · Chapter 1

āryāpañcadaśīstotram
..
karakalitacāpabāṇāṃ kalhārāṅghriṃ namāmi kalyāṇīm .
kaṃdarpadarpajananīṃ kaluṣaharāṃ kāmitārthaphaladātrīm .. १ ..
eṣā stotum vāṇī naiva samarthā taveśi mahimānam .
śeṣo'pyabdasahasraiḥ śeṣaṃ kṛtavān maheśi tava caritam .. २ ..
īśitvādisupūjyāmindindirakeśābhārasūllasitām .
indīvaradalanayanāmīpsitadātrīṃ namāmi śarvāṇīm .. ३ ..
lasadaruṇabhānukoṭidyutinidhimambāṃ surendralakṣyapadām .
lalitāṃ namāmi bāle lalitaśivahṛdayakamalakalahaṃsīm .. ४ ..
hrīṃkārabījarūpe himagirikanye harīndrabhavavandye .
himakaradhavalacchatre hitāya bhava naḥ sadā mahārājñi .. ५ ..
harṣotkarajanayitrī hasitajyotsnā taveyamanavadye .
haragalahālāhalamapi harati trailokyamohatimiraṃ te .. ६ ..
sakalamanorathadāne satyapi caraṇe natasya tava nipuṇe .
saṃsevyate surataruḥ sadājñalokairnu kṛcchraphaladātā .. ७ ..
kanakaruce caṭulagate kaṭhinastanabhāranamrakṛśamadhye .
kānte kaṅkaṇahaste kambugrīve namo'stu te karuṇe .. ८ ..
haranayanānandakare harāṅkasaṃsthe haripramukhavandye .
haranaṭanasākṣibhūte harārdhadehe namo'stu te sukṛpe .. ९ ..
lakṣmīpradakaruṇā yā lakṣmīpatimalpamamba kartumalam .
lakṣyam kuru māṃ tasyā lāvaṇyāmṛtataraṅgamāle tvam .. १० ..
hrīṃkāraratnagarbhe hemācalamandarastanollasite .
herambapriyajanani he vasudhe dehi me kṣamāṃ nityam .. ११ ..
satsaṃpradāyavidite sakalāgamanigamasāratattvamayi .
sāvitryarpaya vadane sakalarasāśrayasuvāksudhādhārām .. १२ ..
karakaṅkaṇamaṇidinamaṇikaravikasitacaraṇakamalamakarandam .
karuṇāpayonidhe me kāmākṣi svāntaṣaṭpadaḥ pibatu .. १३ ..
lasadikṣucāpasumaśaralakṣitadorvallivīryamabhayena .
lakṣādhikadaityakulaṃ lavupaṭavāsaṃ kṛtaṃ kathaṃ citram .. १४ ..
hrīṃkārakelibhavane himakaramaulyaṅkamañjuparyaṅke .
hṛdayasaroje me vasa hṛdayānandaprabodhaparahaṃsi .. १५ ..
āryāpañcadaśīṃ tāmāryāṃ yo bhajati śuddhadhīrnityam .
bhārye lakṣmīvāṇyau paryātāt tasya sādaraṃ bhavataḥ .. १६ ..
ityānandanāthapādapadmopajīvinā kāśyapagotrotpannenāndhreṇa
tyāgarājanāmnā viracitamāryāpañcadaśīstotraṃ saṃpūrṇam