ārttatrāṇastotram · Chapter 1

// ārttatrāṇastotram //
kṣīrāmbhonidhimanthanodbhavaviṣāt sandahyamānān surān
brahmādīnavalokya yaḥ karuṇayā hālāhalākhyaṃ viṣam /
niḥśaṅkaṃ nijalīlayā kavalayan lokān rarakṣādarāt
ārttatrāṇaparāyaṇaḥ sa bhagavān gaṅgādharo me gatiḥ

kṣīraṃ svādu nipīya mātulagṛhe gatvā svakīyaṃ gṛhaṃ
kṣīrālābhavaśena khinnamanase ghoraṃ tapaḥ kurvate /
kāruṇyādupamanyave niravadhiṃ kṣīrāmbudhiṃ dattavān
ārttatrāṇaparāyaṇaḥ sa bhagavān gaṅgādharo me gatiḥ

mṛtyuṃ vakṣasi tāḍayan nijapadadhyānaikabhaktaṃ muniṃ
mārkaṇḍeyamapālayat karuṇayā liṅgādvinirgatya yaḥ /
netrāmbhojasamarpaṇena haraye'bhīṣṭaṃ rathāṅgaṃ dadau
ārttatrāṇaparāyaṇaḥ sa bhagavān gaṅgādharo me gatiḥ

ūḍhaṃ droṇajayadrathādirathikaiḥ sainyaṃ mahat kauravaṃ
dṛṣṭvā kṛṣṇasahāyavantamapi taṃ bhītaṃ prapannārttihā /
pārthaṃ rakṣitavān amoghaviṣayaṃ divyāstramudghoṣayan
ārttatrāṇaparāyaṇaḥ sa bhagavān gaṅgādharo me gatiḥ

bālaṃ śaivakulodbhavaṃ parihasatsvajñātipakṣākulaṃ
khidyantaṃ tava mūrdhni puṣpanicayaṃ dātuṃ samudyatkaram /
dṛṣṭvā''namya viriñciramyanagare pūjāṃ tvadīyāṃ bhajan
ārttatrāṇaparāyaṇaḥ sa bhagavān gaṅgādharo me gatiḥ

santrasteṣu purā surāsurabhayādindrādivṛndārake'- vṛndārake aśvārūḍho
śvārūḍho dharaṇīrathaṃ śrutihayaṃ kṛtvā murāriṃ śaram /
rakṣan yaḥ kṛpayā samastavibudhān jitvā purārīn kṣaṇāt
ārttatrāṇaparāyaṇaḥ sa bhagavān gaṅgādharo me gatiḥ

śrautasmārttapathe parāṅmukhamapi prodyanmahāpātakaṃ
viśvātītamapatyameva gatirityālāpayantaṃ sakṛt /
rakṣan yaḥ karuṇāpayonidhiriti prāptaprasiddhiḥ purā
hyārttatrāṇaparāyaṇaḥ sa bhagavān gaṅgādharo me gatiḥ

gāṅgaṃ vegamavāpya mānyavibudhaiḥ soḍhuṃ purā yācito
dṛṣṭvā bhaktabhagīrathena vinato rudro jaṭāmaṇḍale /
kāruṇyādavanītale suranadīmāpūrayat pāvanīm
ārttatrāṇaparāyaṇaḥ sa bhagavān gaṅgādharo me gatiḥ

// iti śrīmadappayadīkṣitaviracitaṃ gaṅgādharastotram athavā ārttatrāṇastotram sampūrṇam //