આર્ત્તત્રાણસ્તોત્રમ્ · અધ્યાય 1

॥ આર્ત્તત્રાણસ્તોત્રમ્ ॥
ક્ષીરામ્ભોનિધિમન્થનોદ્ભવવિષાત્ સન્દહ્યમાનાન્ સુરાન્
બ્રહ્માદીનવલોક્ય યઃ કરુણયા હાલાહલાખ્યં વિષમ્ ।
નિઃશઙ્કં નિજલીલયા કવલયન્ લોકાન્ રરક્ષાદરાત્
આર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

ક્ષીરં સ્વાદુ નિપીય માતુલગૃહે ગત્વા સ્વકીયં ગૃહં
ક્ષીરાલાભવશેન ખિન્નમનસે ઘોરં તપઃ કુર્વતે ।
કારુણ્યાદુપમન્યવે નિરવધિં ક્ષીરામ્બુધિં દત્તવાન્
આર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

મૃત્યું વક્ષસિ તાડયન્ નિજપદધ્યાનૈકભક્તં મુનિં
માર્કણ્ડેયમપાલયત્ કરુણયા લિઙ્ગાદ્વિનિર્ગત્ય યઃ ।
નેત્રામ્ભોજસમર્પણેન હરયેઽભીષ્ટં રથાઙ્ગં દદૌ
આર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

ઊઢં દ્રોણજયદ્રથાદિરથિકૈઃ સૈન્યં મહત્ કૌરવં
દૃષ્ટ્વા કૃષ્ણસહાયવન્તમપિ તં ભીતં પ્રપન્નાર્ત્તિહા ।
પાર્થં રક્ષિતવાન્ અમોઘવિષયં દિવ્યાસ્ત્રમુદ્ઘોષયન્
આર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

બાલં શૈવકુલોદ્ભવં પરિહસત્સ્વજ્ઞાતિપક્ષાકુલં
ખિદ્યન્તં તવ મૂર્ધ્નિ પુષ્પનિચયં દાતું સમુદ્યત્કરમ્ ।
દૃષ્ટ્વાઽઽનમ્ય વિરિઞ્ચિરમ્યનગરે પૂજાં ત્વદીયાં ભજન્
આર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

સન્ત્રસ્તેષુ પુરા સુરાસુરભયાદિન્દ્રાદિવૃન્દારકેઽ- વૃન્દારકે અશ્વારૂઢો
શ્વારૂઢો ધરણીરથં શ્રુતિહયં કૃત્વા મુરારિં શરમ્ ।
રક્ષન્ યઃ કૃપયા સમસ્તવિબુધાન્ જિત્વા પુરારીન્ ક્ષણાત્
આર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

શ્રૌતસ્માર્ત્તપથે પરાઙ્મુખમપિ પ્રોદ્યન્મહાપાતકં
વિશ્વાતીતમપત્યમેવ ગતિરિત્યાલાપયન્તં સકૃત્ ।
રક્ષન્ યઃ કરુણાપયોનિધિરિતિ પ્રાપ્તપ્રસિદ્ધિઃ પુરા
હ્યાર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

ગાઙ્ગં વેગમવાપ્ય માન્યવિબુધૈઃ સોઢું પુરા યાચિતો
દૃષ્ટ્વા ભક્તભગીરથેન વિનતો રુદ્રો જટામણ્ડલે ।
કારુણ્યાદવનીતલે સુરનદીમાપૂરયત્ પાવનીમ્
આર્ત્તત્રાણપરાયણઃ સ ભગવાન્ ગઙ્ગાધરો મે ગતિઃ

॥ ઇતિ શ્રીમદપ્પયદીક્ષિતવિરચિતં ગઙ્ગાધરસ્તોત્રમ્ અથવા આર્ત્તત્રાણસ્તોત્રમ્ સમ્પૂર્ણમ્ ॥