āpastambagṛhyasūtram · Chapter 1

atha prathamaḥ paṭalaḥ
prathamaḥ khaṇḍaḥ
atha karmāṇyācārādyāni gṛhyante

udagayanapūrvapakṣāhaḥpuṇyāheṣu kāryāṇi

yajñopavītinā

pradakṣiṇam

purastādudagvopakramaḥ

tathā'pavargaḥ

aparapakṣe pitryāṇi

prācīnāvītinā

prasavyam

dakṣiṇato'pavargaḥ

nimittāvekṣāṇi naimittikāni

agnimidhvā prāgagrairdarbhairagniṃ paristṛṇāti

prāgudagagrairvā

dakṣiṇāgraiḥ pitryeṣu

dakṣiṇāprāgagrairvā

uttareṇāgniṃ darbhāntsaṃstīrya dvandvaṃ nyañci pātrāṇi prayunakti devasaṃyuktāni

sakṛdeva manuṣyasaṃyuktāni

ekaikaśaḥ pitṛsaṃyuktāni

pavitrayossaṃskāra āyāmataḥ parīmāṇaṃ prokṣaṇīsaṃskāraḥ pātraprokṣa iti darśapūrṇamāsavattūṣṇīm

apareṇāgniṃ pavitrāntarhite pātre'pa ānīyodagagrābhyāṃ pavitrābhyāṃ trirutpūya samaṃ prāṇairhṛtvottareṇāgniṃ darbheṣu sādayitvā darbhaiḥ pracchādya

brāhamaṇaṃ dakṣiṇato darbheṣu niṣādya

ājyaṃ vilāpyāpareṇāgniṃ pavitrāntarhitāyāmājyasthālyāmājyaṃ nirupyodīco'ṅgārānnirūhya teṣvadhiśritya jvalatā'vadyutya dve darbhāgre pratyasya triḥ paryagni kṛtvodagudvāsyāṅgārānpratyūhyodagagrābhyāṃ pavitrābhyāṃ punarāhāraṃ trirutpūya pavitre anuprahṛtya

ityāpastambīye gṛhyapraśne prathamaḥ khaṇḍaḥ
dvitīyaḥ khaṇḍaḥ
yena juhoti tadagnau pratitapya darbhaiḥ saṃmṛjya punaḥ pratitapya prokṣya nidhāya darbhānadbhissaṃspṛśyāgnau praharati

śamyāḥ paridhyarthe vivāhopanayanasamāvartanasīmantacaulagodānaprāyaścitteṣu

agniṃ pariṣiñcatyadite'numanyasveti dakṣiṇataḥ prācīnamanumate'mumanyasveti paścādudīcīnaṃ sarasvate'numanyasvetyuttarataḥ prācīnaṃ deva savitaḥ prasuveti samantam

paitṛkeṣu samantameva tūṣṇīm

idhmamādhāyāghārāvāghārayati darśapūrṇamāsavattṛṣṇīm

athājyabhāgau juhotyagnaye svāhetyuttarārdhapūrvārdhe somāya svāheti dakṣiṇārdhapūrvārdhe samaṃ pūrveṇa

yathopadeśaṃ pradhānāhutīrhutvā jayābhyātānānrāṣṭrabhṛtaḥ prājāpatyāṃ vyāhṛtīrvihṛtāḥ sauviṣṭakṛtīmityupajuhoti yadasya karmaṇo'tyarīricaṃ yadvā nyūnamihākaram / agniṣṭakṛtsviṣṭakṛdvidvāntsarvam̐ sviṣṭaṃ suhutaṃ karotu svāheti

pūrvavatpariṣecanamanvamam̐ sthāḥ prāsāvīriti mantrasannāmaḥ

laukikānāṃ pākayajñaśabdaḥ

tatra brāhmaṇāvekṣo vidhiḥ

dvirjuhoti dvirnimārṣṭi dviḥ prāśnātyutsṛtyācāmati nirleḍhīti

sarvaṛtavo vivāhasya śaiśirau māsau parihāpyottamaṃ ca naidāgham

sarvāṇi puṇyoktāni nakṣatrāṇi

tathā maṅgalāni

āvṛtaścāstrībhyaḥ pratīyeran

invakābhiḥ prasṛjyante te varāḥ pratinanditāḥ

ityāpastambīye gṛhyapraśne dvitīyaḥ khaṇḍaḥ
tṛtīyaḥ khaṇḍaḥ
maghābhirgāvo gṛhyante

phalgunībhyāṃ vyūhyate

yāṃ kāmayeta duhitaraṃ priyā syāditi tāṃ niṣṭyāyāṃ dadyāt priyaiva bhavati neva tu punarāgacchatīti brāhmaṇavekṣo vidhiḥ

invakāśabdo mṛgaśirasi

niṣṭyāśabdassvātau

vivāhe gauḥ

gṛheṣu gauḥ

tayā varamatithivadarhayet

yo'syāpacitastamitarayā

etāvadgorālambhanamatithiḥ pitaro vivāhaśca

suptāṃ rundantīṃ niṣkrāntāṃ varaṇe parivarjayet

dattāṃ guptāṃ dyotāmṛṣabhāṃ śarabhāṃ vinatāṃ vikaṭāṃ muṇḍāṃ maṇḍūṣikāṃ sāṅkārikāṃ rātāṃ pālīṃ mitrāṃ svanujāṃ varṣakārīṃ ca varjayet

nakṣatranāmā nadīnāmā vṛkṣanāmāca garhitāḥ

sarvāśca rephalakāropāntā varaṇe parivarjayet

śaktiviṣaye dravyāṇi praticchannānyupanidhāya brūyādupaspṛśeti

nānā bījāni saṃsṛṣṭāni vedyāḥ pāṃsūn kṣetrālloṣṭaṃ śakṛcchmaśānaloṣṭamiti

pūrveṣāmupasparśane yathāliṅgamṛddhiḥ

uttamaṃ paricakṣate

bandhuśīlalakṣaṇasampannāmarogāmupayaccheta

bandhuśīlalakṣaṇasampannaśśrutavānaroga iti varasampat

yasyāṃ manaścakṣuṣornibandhastasyāmṛddhirnetaradādriyetetyeke

ityāpastambīye gṛhyapakṣe tṛtīyaḥ khaṇḍaḥ
samāptaśca prathamaḥ paṭalaḥ
atha dvitīyaḥ paṭalaḥ
caturthaḥ khaṇḍaḥ
suhṛdassamavetānmantravato varānprahiṇuyāt

tānādito dvābhyāmabhimantrayeta

svayaṃ dṛṣṭvā tṛtīyāṃ japet

caturthyā samīkṣeta

aṅguṣṭhenopamadhyamayā cāṅgulyā darbha saṃgṛhyottareṇa yajuṣā tasyā bhruvorantaram̐ saṃmṛjya prācīnaṃ nirasyet

prāpte nimitta uttarāṃ japet

yugmānsamavetān mantravata uttarayā'dbhyaḥ prahiṇuyāt

uttareṇa yajuṣā tasyāśśirasi darbheṇvaṃ nidhāya tasminnuttarayā dakṣiṇaṃ yugacchidraṃ pratiṣṭhāpya chidre suvarṇamuttarayāntardhāyottarābhiḥ pañcabhissnāpayitvottarayā'hatena vāsasācchādyottarayā yoktreṇa sannahyati

athaināmuttarayā dakṣiṇe haste gṛhītvāgnimabhyānīyāpareṇāgnimudagagraṃ kaṭamāstīrya tasminnupaviśata uttaro varaḥ

agnerupasamādhānādyājyabhāgānte'thaināmādito dvābhyāmabhimantrayeta

athāsyai dakṣiṇena nīcā hastena dakṣiṇamuttānam̐ hastaṃ gṛhṇīyāt

yadi kāmayeta strīreva janayeyamityaṅgulīreva gṛhṇīyāt

yadi kāmayeta puṃsa eva janayeyamityaṅguṣṭhameva so'bhīvāṅguṣṭhamabhīva lomāni gṛhṇāti

gṛbhṇāmi ta ityetābhiścatasṛbhiḥ

athaināmutteraṇāgniṃ dakṣiṇena padā prācīmudīcīṃ vā diśamabhi prakramayatyekamiṣa iti

sakheti saptame pade japati

ityāpastambīye gṛhyapraśne caturthaḥ khaṇḍaḥ
pañcamaḥ khaṇḍaḥ
prāgghomātpradakṣiṇamagniṃ kṛtvā yathāsthānamupaviśyānvārabdhāyāmuttarā āhutīrjuhoti somāya janivide svāhetyetaiḥ pratimantram

athaināmuttareṇāgniṃ dakṣiṇena padā'śmānamāsthāpayatyātiṣṭheti

athāsyā añjalāvupastīrya dvirlājānopyābhighārayati

tasyāstodaryo lājānāvapatītyeke

juhoti yaṃ nārīti

uttarābhistisṛbhiḥ pradakṣiṇamagniṃ kṛtvā'śmānamāsthāpayati yathā purastāt

homaścottarayā

punaḥ parikramaṇam

āsthāpanam

homaścottarayā

punaḥ parikramaṇam

jayādi pratipadyate

pariṣecanāntaṃ kṛtvottarābhyāṃ yoktraṃ vimucya tāṃ tataḥ pra vā vāhayet pra vā hārayet

samopyaitamagnimanuharanti

nityaḥ

dhāryaḥ

anugato manthyaḥ

śrotriyāgārādvāhāryaḥ

upavāsaścānya tarasya bhāryāyāḥ patyurvā

anugate'pi vottarayā juhuyānnopavaset

uttarā rathasyottambhanī

vāhāvuttarābhyāṃ yunakti dakṣiṇamagre

ārohatīmuttarābhirabhimantrayate

sūtre vartmanorvyavastṛṇāttyuttarayā nīlaṃ dakṣiṇasyāṃ lohitamuttarasyām

te uttarābhirabhiyāti

tīrthasthāṇucatuṣpathavyatikrame cottarāṃ japet

ityāpastambīye gṛhyapraśne pañcamaḥ khaṇḍaḥ
ṣaṣṭhaḥ khaṇḍaḥ
nāvamuttarayā'numantrayate

na ca nāvyām̐staratī vadhūḥ paśyet

tīrtvottarāṃ japet

śmaśānādivyatikrame bhāṇḍe rathe vā riṣṭe'gnerupasamādhānādyajyabhāgānte'nvārabdhāyāmuttarā āhutīrhutvā jayādi pratipadyate pariṣecanāntaṃ karoti

kṣīriṇāmanyeṣāṃ vā lakṣmaṇyānāṃ vṛkṣāṇāṃ nadīnāṃ dhanvanāṃ ca vyatikrama uttare yathāliṅgaṃ japet

gṛhānuttarayā saṅkāśayati

vāhāvuttarābhyāṃ vimuñcati dakṣiṇamagre

lohitaṃ carmā''naḍuhaṃ prācīnagrīvamuttaraloma madhye'gārasyottarayā''stīrya gṛhānprapādannuttarāṃ vācayati dakṣiṇena padā

na ca dehalīmabhi tiṣṭhati

uttarapūrve deśe'gārasyāgnerupasamādhānādyājyabhāgānte'nvārabdhāyāmuttarā āhutīrhutvā jayādi pratipadyate pariṣecanāntaṃ kṛtvottarayā carmaṇyupaviśata uttaro varaḥ / athāsyāḥ pum̐svorjīvaputrāyāḥ putramaṅka uttarayopaveśya tasmai phalānyuttareṇa yajuṣā pradāyottare japitvā vācaṃ yacchata ā nakṣatrebhyaḥ

uditeṣu nakṣatreṣu prācīmudīcīṃ vā diśamupaniṣkramyottarābhyāṃ yathāliṅgaṃ dhruvamarundhatīṃ ca darśayati

ityāpastambīye gṛhyapraśne ṣaṣṭhaḥ khaṇḍaḥ
iti dvitīyaḥ paṭalaḥ
atha tṛtīyaḥ paṭalaḥ
saptamaḥ khaṇḍaḥ
athaināmāgneyena sthālīpākena yājayati

patnyavahanti

śrapayitvābhighārya prācīnamudīcīnaṃ vodvāsya pratiṣṭhitamabhighāryāgnerupasamādhānādyājyabhāgānte'nvārabdhāyām̐ sthālīpākājjuhoti

sakṛdupastaraṇābhighāraṇe dviravadānam

agnirdevatā svāhākārapradānaḥ

api vā sakṛdupahatya juhuyāt

agnissviṣṭakṛt dvitīyaḥ

sakṛdupastaraṇāvadāne dvirabhighāraṇam

madhyātpūrvasyāvadānam

madhye homaḥ

uttarārdhāduttarasya

uttarārdhapūrvārdhe homaḥ

lepayoḥ prastaravattūṣṇīṃ barhiraṅttvāgnau praharati

siddhamuttaraṃ pariṣecanam

tena sarpiṣmatā brāhmaṇaṃ bhojayet

yo'syāpacitastasmā ṛṣabhaṃ dadāti

evamata ūrdhvaṃ dakṣiṇāvarjamupoṣitābhyāṃ parvasu kāryaḥ

pūrṇapātrastu dakṣiṇetyeke

sāyaṃ prātarata ūrdhvaṃ hastenaite āhutī taṇḍulairyavairvā juhuyāt

sthālīpākavaddaivatam

saurī pūrvāhutiḥ prātarityeke

ubhayataḥ pariṣecanaṃ yathā purastāt

pārvaṇenāto'nyāni karmāṇi vyākhyātānyācārādyāni gṛhyante

yathopadeśaṃ devatāḥ

agniṃ sviṣṭakṛtaṃ cāntareṇa

avikṛtamātithyam

vaiśvadeve viśve devāḥ

paurṇamāsyāṃ paurṇamāsī yasyāṃ kriyate

ityāpastambīye gṛhyapraśne saptamaḥ khaṇḍaḥ
aṣṭamaḥ khaṇḍaḥ
upākaraṇe samāpane ca ṛṣiryaḥ prajñāyate

sadasaspatirdvitīyaḥ

striyā'nupetena kṣāralavaṇāvarānnasaṃsṛṣṭasya ca homaṃ paricakṣate

yathopadeśaṃ kāmyāni balayaśca

sarvatra svayaṃ prajvalite'gnāvuttarābhyāṃ sabhidhāvādadhyāt

āpanmāśrīḥ śrīrmāgāditi vā

etadaharvijānīyādyadaharbhāryāmāvahate

trirātramubhayoradhaśśayyā brahmacaryaṃ kṣāralavaṇavarjanaṃ ca

tayorśśayyāmantareṇa daṇḍo gandhalipto vāsasā sūtreṇa vā parivītastiṣṭhati

taṃ caturthyā'pararātra uttarābhyāmutthāpya prakṣālya nidhāyāgnerupasamādhānādyājyabhāgānte'nvārabdhāyāmuttarā āhutīrhutvā jayādi pratipadyate pariṣecanāntaṃ kṛtvā'pareṇāgniṃ prācīmupaveśya tasyāśśirasyājyaśeṣādvyāhṛtibhiroṅkāracaturthābhirānīyottarābhyāṃ yathāliṅgaṃ mithassamīkṣyottarayājyaśeṣeṇa hṛdayadeśau saṃmṛjyottarāstisro japitvā śeṣaṃ samāveśane japet

anyo vaināmabhimantrayeta

yadā malavadvāsāḥ syādathaināṃ brāhmaṇapratiṣiddhāni karmāṇi sam̐śāsti yāṃ malavadvāsasa mityetāni

rajasaḥ prādurbhāvātsnātāmṛtusamāveśane uttarābhirabhimantrayeta

ityāpastambīye gṛhyapraśne aṣṭamaḥ khaṇḍaḥ
navamaḥ khaṇḍaḥ
caturthīprabhṛtyāṣoḍaśīmuttarāmuttarāṃ yugmāṃ prajāniḥśreyasamṛtugamana ityupadiśanti

arthaprādhvasya parikṣave parikāsane cāpa uspṛśyottare yathāliṅgaṃ japet

evamuttarairyathāliṅgaṃ citriyaṃ vanaspatiṃ śakṛdrīti sigvātaṃ śakunimiti

ubhayorhṛdayasaṃsarge'psustrirātrāvaraṃ brahmacaryaṃ caritvā sthālīpākaṃ śrapayitvāgnerupasamādhānādyājyabhāgānte'nvārabdhāyām̐ sthālīpākāduttarā āhutīrhutvā jayādi pratipadyate pariṣecanāntaṃ kṛtvā tena sarpiṣmatā yugmāndvyavarān brāhmaṇānbhojayitvā siddhiṃ vācayīta

śvastiṣyeṇeti trissaptairyavaiḥ pāṭhāṃ parikirati yadi vāruṇyasi varuṇāttvā niṣkrīṇāmi yadi saumyasi somāttvā niṣkrīṇāmi iti

śvobhūte uttarayotthāpyottarābhistisṛbhirabhimantryottarayā praticchannāṃ hastayorābadhya śayyākāle bāhubhyāṃ bhartāraṃ parigṛhṇīyādupadhānaliṅgayā

vaśyo bhavati

sapatnībādhanañca

etenaiva kāmenottareṇānuvākena sadādityamupatiṣṭhate

yakṣmagṛhītāmanyāṃ vā brahmacaryayuktaḥ puṣkarasaṃvartamūlairuttarairyathāliṅgamaṅgāni saṃmṛśya pratīcīnaṃ nirasyet

vadhūvāsa uttarābhiretadvide dadyāt

ityāpastambīye gṛhyapraśne navamaḥ khaṇḍaḥ
samāptastṛtīyaḥ paṭalaḥ
atha caturthaḥ paṭalaḥ
daśamaḥ khaṇḍaḥ
upanayanaṃ vyākhyāsyāmaḥ

barbhāṣṭameṣu brāhmaṇamupanayīta

garbhaikādaśeṣu rājanyaṃ garbhadvādaśeṣu vaiśyam

vasanto grīṣmaśśaradityṛtavo varṇānupūrvyeṇa

brāhmaṇānbhojayitvāśiṣo vācayitvā kumāraṃ bhojayitvā'nuvākasya prathamena yajuṣā'paḥ saṃsṛjyoṣṇāśśītāsvānīyottarayā śira unatti

trīṃstrīn darbhānantardhāyottarābhiścatasṛbhiḥ pratimantraṃ pratidiśaṃ pravapati

vapantamuttarayānumantrayate dakṣiṇato mātā brahmacārī vā

ānaḍuhe śakṛtpiṇḍe yavānnidhāya tasminkeśānupayamyottarayodumbaramūle darbhastambe vā nidadhāti

snātamagnerupasamādhānādyājyabhāgānte pālāśīṃ samidhamuttarayādhāpyottareṇāgniṃ dakṣiṇena padā'śmānamāsthāpayatyātiṣṭheti

vāsaḥsadyaḥkṛttotamuttarābhyāmabhimantryottarābhistisṛbhiḥparidhāpya parihitamuttarayānumantrayate

mauñjīṃ mekhalāṃ trivṛtāṃ triḥpradakṣiṇamuttarābhyāṃ parivīyājinamuttaramuttarayā

uttareṇāgniṃ darbhānsaṃstīrya teṣvenamuttarayāvasthāpyodakāñjalimasmā añjalāvānīyottarayā triḥ prokṣyottarairdakṣiṇe haste gṛhītvottarairdevatābhyaḥ parīdāyottareṇa
yajuṣopanīya suprajā iti dakṣiṇe karṇe japati

ityāpastambīye gṛhyapraśne daśamaḥ khaṇḍaḥ
ekādaśaḥ khaṇḍaḥ
brahmacaryamāgāmiti kumāra āha

praṣṭaṃ parasya prativacanaṃ kumārasya

śeṣaṃ paro japati

pratyagāśiṣaṃ cainaṃ vācayati

uktamājyabhāgāntam

atrainamuttarā āhutīrhāvayitvā jayādi pratipadyate

pariṣecanāntaṃ kṛtvāpareṇāgnimudagagraṃ kūrcaṃ nidhāya tasminnuttareṇa yajuṣopanetopaviśati

purastāt pratyaṅṅāsīnaḥ kumāro dakṣiṇena pāṇinā dakṣiṇaṃ pādamanvārabhyāha sāvitrīṃ bho anubrūhi iti

tasmā anvāha tatsavituriti

paccho'rdharcaśastatassarvām

vyāhṛtīrvihṛtāḥ pādādiṣvanteṣu vā tathārdharcayoruttamāṃ kṛṣsnāyām

kumāra uttareṇa mantreṇottaramoṣṭamupaspṛśate

karṇāvuttareṇa

daṇḍamuttareṇā''datte

pālāśo daṇḍo brāhmaṇasya naiyyagrodhasskandhajo'vāṅgro rājanyasya bādara audumbaro vā vaiśyasya

vārkṣo daṇḍa ityavarṇasaṃyogenaika upadiśanti

smṛtaṃ ca ma ityetadvācayitvā gurave varaṃ dattvodāyuṣetyutthāpyottarairādityamupatiṣṭhate

yaṃ kāmayeta nāyamācchidyeteti tamuttarayā dakṣiṇe haste gṛhṇīyāt

tryahametamagniṃ dhārayanti

kṣāralavaṇavarjanaṃ ca

pari tveti parimṛjya tasminnuttarairmantraissamidha ādadhyāt

evamanyasminnapi sadāraṇyādedhānāhṛtya

uttarayā sam̐śāsti

vāsaścaturthīmuttarayādatte'nyatparidhāpya

ityāpastambīye gṛhyapraśne ekādaśaḥ khaṇḍaḥ
caturthaḥ paṭalaḥ samāptaḥ
athopākarmotsarjanapaṭalaḥ
athāta upākaraṇotsarjane vyākhyāsyāmaḥ

śravaṇāpakṣa oṣadhīṣu jātāsu hastena paurṇamāsyāṃ vā'dhyāyopākarma

agnerupasamādhānādyājyabhāgānte'nvārabdheṣu kāṇḍaṛṣibhyo juhoti sadasaspataye sāvitryā ṛgvedāya yajurvedāya sāmavedāyātharvaṇavedāyeti hutvā upahomo vedāhutīnāmupariṣṭātsadasaspatimityeke

pariṣecanāntaṃ kṛtvā trīnanuvākānādito'dhīyīran

prathamottamāvanuvākau vā

tryahamekāhaṃ vā kṣamyādhīyīran

athopākaraṇamadhyāyaḥ

taiṣīpakṣasya rohiṇyāṃ paurṇamāsyāṃ votsargaḥ

prācīmudīcīṃ vā sagaṇo diśamupaniṣkramya yatrāpaḥ purastātsukhāḥ sukhāvagāhā avakinyaḥ śaṅkhinyaḥ tāsāmantaṃ gatvā'bhiṣekānkṛtvā surabhimatyābliṅgā
bhirvāruṇībhirhiraṇyavarṇābhiḥ pāvamanībhiriti mārjayitvāntarjalagato'ghamarṣaṇena trīnprāṇāyāmān dhārayitvottīryācamyopotthāya darbhānanyonyasmai sampradāya śucau deśe prākkūlairdarbhairāsanāni kalpayanti

brahmaṇe prajāpataye vṛhaspataye'gnaye vāyave sūryāya candramase nakṣatrebhyaḥ ṛtubhyassaṃvatsarāya indrāya rājñe somāya rājñe yamāya rājñe varuṇāya rājñe vaiśravaṇāya rājñe vasubhyo rudrebhya ādityebhyo viśvebhyo devebhyassādhyebhyo marudbhya ṛbhubhyo bhṛgubhyo'ṅgirobhya iti devagaṇānām

atharṣayaḥviśvāmitro jamadagnirbharadvājo gautamo'trirvasiṣṭhaḥ kaśyapa ityete saptarṣayaḥ saptarṣibhyaḥ kalpayitvā dakṣiṇato'gastyāya kalpayanti

tato yāvadekavaidyantaiḥ kalpayanti

prācīnāvītāni kṛtvā dakṣiṇato vaiśampāyanāya paiṅgaye tittiraye ukhāyātreyāya padākārāya kauṇḍinyāya vṛttikārāya baudhāyanāya pravacanakārāya āpastambāya sūtrakārāya bharadvājāya sūtrakārāya satyāṣāḍhāya hiraṇyakeśāya ācāryebhya ūrdhvaretobhya ekapatnībhyo vānaprasthebhyaḥ kalpayāmīti

atha yathāsvaṃ pitṛbhyaḥ kalpayanti mātāmahebhyaśca pṛthak

yajñopavītāni kṛtvā teṣveva deśeṣu tathaivānupūrvyā taireva nāmabhirdevānṛṣīṃśca tarpayanti vaiśampāyanaprabhṛtīṃstu mātuḥ prapitāmahaparyantānprācīnāvītinastarpayanti amuṃ tarpayāmyamuṃ tarpayāmyamuṃ tarpayāmīti

abhipyante vānyonyam

yajñopavītāni kṛtvā trīnādito'nuvākānadhīyīran

kāṇḍādīnprathamottamau vā

kāṇḍātkāṇḍātprarohantītidvābhyāmupodake dūrvā ropayanti

apaḥ pragāhyodadhiṃ kurvanti

sarvataḥ parivāryormimantaḥ kurvanti

udgāhyātamitorājiṃ dhāvanti

pratyetyābhidānāni saktubhirodaneneti brāhmaṇān bhojayitvā vācayati

evaṃ pārāyaṇasamāptau ca kāṇḍādi dūrvāropaṇodadhidhāvanavarjam

pratyetya brāhmaṇabhojanādi karma pratipadyate

evamevādbhiraharahardevānṛṣīnpitṝṃśca tarpayet

ityupākarmotsarjanapaṭalaḥ
atha pañcamaḥ paṭalaḥ
dvādaśaḥ khaṇḍaḥ
vedamadhītya snāsyanprāgudayādvrajaṃ praviśyāntarlomnā carmaṇā dvāramapidhāyāste

nainametadaharādityo'bhitapet

madhyandine'gnerupasamādhānādyājyabhāgānte pālāśīṃ samidhamuttarayādhāyāpareṇāgniṃ kaṭa erakāyāṃ vopaviśyottarayā kṣuramabhimantryottareṇa yajuṣā vaptre pradāyāpāṃ saṃsarjanādyākeśanidhānātsamānam

jaghanārdhe vrajasyopaviśya visnasya mekhalāṃ brahmacāriṇe prayacchati

tāṃ sa uttareṇa yajuṣodaumbaramūle darbhastambe vopagūhati

evaṃ vihitābhirevādbhiruttarābhiṣṣaḍbhissnātvottarayodumbareṇa dato dhāvate

snānīyocchāditassnātaḥ

uttarena yajuṣā'hatamantaraṃ vāsaḥ paridhāya sārvasurabhiṇā candanenottarairdeśatābhyaḥ pradāyottarayānulipya maṇiṃ sauvarṇaṃ sopadhānaṃ sūtrotamuttarayodapātre triḥ pradakṣiṇaṃ pariplāvyottarayā grīvāsvābadhyaivameva bādaraṃ maṇiṃ mantravarjaṃ savye pāṇāvābadhyāhatamuttaraṃ vāso revatīstveti samānam

tasya daśāyāṃ pravartau prabadhya darvyāmādhāyājyenābhyānāyannuttarā āhutīrhutvā jayādi pratipadyate

pariṣecanāntaṃ kṛtvatābhireva dakṣiṇe karṇa ābadhnītaitābhissavye

evamuttarairyathāliṅgaṃ srajaśśirasyāñjanamādarśāvekṣaṇamupānahau chatraṃ daṇḍamiti

vācaṃ yacchatyānakṣatrebhyaḥ

uditeṣu nakṣatreṣu prācīmudīcīṃ vā diśamupaniṣkramyottareṇārdharcena diśa upasthāyottareṇa nakṣatrāṇi candramasamiti

rātinā sambhāṣya yathārthaṃ gacchati

ityāpastambīye gṛhyapraśne dvādaśaḥ khaṇḍaḥ
trayodaśaḥ khaṇḍaḥ
athaitadaparaṃ tūṣṇīmeva tīrthe snātvā tūṣṇīṃ samidhamādadhāti

yatrāsmā apacitiṃ kurvanti tatkūrca upaviśati yathāpurastāt

evamuttarābhyāṃ yathāliṅgaṃ rājā sthapatiśca

āpaḥ pādyā iti prāha

uttarayā'bhimantrya dakṣiṇaṃ pādaṃ pūrvaṃ brāhmaṇāya prayacchetsavyam̐ śūdrāya

prakṣālayitāramupaspṛśyottareṇa yajuṣātmānaṃ pratyabhimṛśet

kūrcābhyāṃ parigṛhya mṛnmayenārhaṇīyā āpa iti prāha

uttarayā'bhimantryāñjalāvekadeśa ānīyamāna uttaraṃ yajurjapet

śeṣaṃ purastānninīyamānamuttarayā'numantrayate

dadhi madhviti saṃsṛjya kāṃsyena varṣīyasā pidhāya kūrcābhyāṃ parigṛhya madhuparka iti prāha

trivṛtameke ghṛtaṃ ca

pāṅktameke dhānāssaktūṃśca

uttarābhyāmabhimantrya yajurbhyāmapa ācāmati purastādupariṣṭāccottarayā triḥ prāśyānukampyāya prayacchet

pratigṛhyaiva rājā sthapatirvā purohitāya

gauriti gāṃ prāha

uttarayābhimantrya tasyai vapām̐ śrapayitvopastīrṇābhighāritāṃ madhyamenāntamena vā palāśaparṇenottarayā juhoti

yadyutsṛjedupāṃśūttarāṃ japitvomutsṛjatetyuccaiḥ

annaṃ proktamupāṃśūttarairabhimantrya ॐ kalpayate tyuccaiḥ

ācāryāyartvije śvaśurāya rājña iti
parisaṃvatsarādupatiṣṭhadbhya etatkāryam

sakṛtpravaktre citrāya

ityāpastambīye gṛhyapraśne trayodaśaḥ khaṇḍaḥ
pañcamaśca paṭalaḥ samāptaḥ
atha ṣaṣṭhaḥ paṭalaḥ
caturdaśaḥ khaṇḍaḥ
sīmantonnayanaṃ praśne garbhe caturthe māsi

brāhmaṇānbhojayitvāśiṣo vācayitvāgnerupasamādhānādyājyabhāgānte'nvārabdhāyāmuttarā āhutīrhutvā jayādi pratipadyate

pariṣecanāntaṃ kṛtvāpareṇāgniṃ prācīnamupaveśya treṇyā śalalyā tribhirdarbhapuñjīlaiśśalāluglapsenetyūrdhvaṃ sīmantamunnayati vyāhṛtībhiruttarābhyāṃ ca gāyatamiti vīṇāgāyinau saṃśāsti

uttarayoḥ pūrvā sālvānāṃ vrāhmaṇānāmitarā

nadīnirdeśaśca yasyāṃ vasanti

yavānvirūḍhānābadhya vācaṃ yacchatyānakṣatrebhyaḥ

uditeṣu nakṣatreṣu prācīmudīcīṃ vā diśamupaniṣkramya vatsamanvārabhya vyāhṛtīśca japitvā vācaṃ visṛjet

pum̐savanaṃ vyakte garbhe tiṣyeṇa

nyagrodhasya yā prācyudīcī vā śākhā tatassavṛṣaṇāṃ śuṅgāmāhṛtya sīmantavadagnerupasamādhānādi

anavasnātayā kumāryā dṛṣatputre dṛṣatputreṇa peṣayitvā pariplāvyāperaṇāgniṃ prācīmuttānāṃ nipātyottareṇa yajuṣā'ṅguṣṭhena dakṣiṇe nāsikācchidre'pi nayati

pumāṃsaṃ janayati

kṣipraṃ suvanam

anāprītena śarāveṇānusrotasamudakamāhṛtya pattastūryantīṃ nidhāya mūrdhañchoṣyantīmuttareṇa yajuṣā'bhimṛśyaitābhiradbhiruttarābhiravokṣet

yadi jarāyu na patedevaṃvihitābhirevādbhiruttarābhyāmavokṣet

ityāpastambīye gṛhyapraśne caturdaśaḥ khaṇḍaḥ
pañcadaśaḥ khaṇḍaḥ
jātaṃ vātsapreṇābhimṛśyottareṇa yajuṣopastha ādhāyottarābhyāmābhimantraṇaṃ mūrdhanyavaghrāṇaṃ dakṣiṇe karṇe jāpaḥ

nakṣatranāma ca nirdiśati

tadrahasyaṃ bhavati

madhu ghṛtamiti saṃsṛjya tasmin darbheṇa hiraṇyaṃ niṣṭarkyaṃ badhvāvadāyottarairmantraiḥ kumāraṃ prāśayitvottarābhiḥ pañcabhissnāpayitvā dadhi ghṛtamiti saṃsṛjya kāṃsyena pṛṣadājyaṃ vyāhṛtībhiroṅkāracaturthābhiḥ kumāraṃ prāśayitvādbhiśśeṣaṃ saṃsṛjya goṣṭhe ninayet

uttarayā māturupastha ādhāyottarayā dakṣiṇaṃ stanaṃ pratidhāpyottarābhyāṃ pṛthivīmabhimṛśyottareṇa yajuṣā saṃviṣṭam

uttareṇa yajuṣā śirasya udakumbhaṃ nidhāya sarṣapānphalīkaraṇamiśrānañjalinottaraistristripratisvāhākāraṃ hutvā saṃśāsti praviṣṭe praviṣṭa eva tūṣṇīmagnāvāvapateti

evamaharaharānirdaśatāyāḥ

daśamyāmutthitāyāṃ snātāyāṃ putrasya nāma dadhāti pitā māteti

dvyakṣaraṃ caturakṣaraṃ vā nāmapūrvamākhyātottaraṃ dīrghābhiniṣṭhānāntaṃ ghoṣavadādyantarantastham

api vā yasminsvityupasargassyāt taddhi pratiṣṭhitamiti hi brāhmaṇam

ayujākṣaraṃ kumāryāḥ

pravāsādetya putrasyottarābhyāmabhimantraṇaṃ mūrdhanyavaghrāṇaṃ dakṣiṇe karṇa uttarānmantrān japet

kumārīmuttareṇa yajuṣā'bhimantrayate

ityāpastambīye gṛhyapraśne pañcadaśaḥ khaṇḍaḥ
ṣoḍaśaḥ khaṇḍaḥ
janmano'dhi ṣaṣṭhe māsi brāhmaṇānbhojayitvāśiṣo vācayitvā dadhi madhu ghṛtamodanamiti saṃsṛjyottarairmantraiḥ kumāraṃ prāśayet

taittireṇa mām̐senetyeke

janmano'dhi tṛtīye varṣe caulaṃ punarvasvoḥ

brāhmaṇānāṃ bhojanamupāyanavat

sīmantavadagnerupasamādhānādi

apareṇāgniṃ prāñcamupaveśya treṇyā śalalyā tribhirdarbhapuñjīlaiḥ śalāluglapseneti tūṣṇīṃ keśānvinīya yatharṣi śikhā nidadhāti

yathā vaiṣāṃ kuladharmaḥ syāt

apām̐ saṃsarjanādyākeśanidhānātsamānam

kṣuram̐ prakṣālya nidadhāti

tena tryahaṃ karmanivṛttiḥ

varaṃ dadāti

evaṃ godānamanyasminnapi nakṣatre ṣoḍaśe varṣe

agnigodāno vā syāt

saṃvatsaraṃ godānavratameka upadiśanti

etāvannānā sarvān
keśānvāpayate

udakopasparśanamiti chandogāḥ

ityāpastambīye gṛhyapraśne ṣoḍaśaḥ khaṇḍaḥ
ṣaṣṭhaśca paṭalaḥ samāptaḥ
atha saptamaḥ paṭalaḥ
saptadaśaḥ khaṇḍaḥ
dakṣiṇāpratyakpravaṇamagarāvakāśamuddhatya palāśena śamīmayena vodūhenaitāmeva diśamuttarayodūhati

evaṃ triḥ

kḷptamucarayābhimṛśya pradakṣiṇaṃ sthūṇāgartānkhānayitvā'bhyantaraṃ pām̐sūnudupyottarābhyāṃ dakṣiṇaṃ dvārasthūṇāmavadadhāti

evamitarām

yathākhātamitarā anvavadhāya vam̐śamādhīyamānamuttareṇa yajuṣā'bhimantrayate

sammitamuttarairyathāliṅgam

pālāśaṃ śamīmayaṃ vedhmamādīpyottarayarcā'gnimuddhṛtyottareṇa yajuṣā'gāraṃ prapādyottarapūrvadeśe'gārasyottarayā'gniṃ pratiṣṭhāpayati

tasmāddakṣiṇamudadhānāyatanaṃ bhavati

tasminviṣūcīnāgrāndarbhānsaṃstīrya teṣūttarayā vrīhiyavānnyupya tatrodadhānaṃ pratiṣṭhāpayati

tasminnuttareṇa yajuṣā catura udakumbhānānayati

dīrghamuttarayā'numantrayate

agnerupasamādhānādyājyabhāgānte uttarā āhutīrhutvā jayādi pratipadyate

pariṣecanāntaṃ kṛtvottareṇa yajuṣodakumbhena triḥ pradakṣiṇamantarato'gāraṃ niveśanaṃ vā pariṣicya brāhmaṇānbhojayedapūpaissaktubhirodaneneti

ityāpastambīye gṛhyapraśne saptadaśaḥ khaṇḍaḥ
aṣṭādaśaḥ khaṇḍaḥ
śvagrahagṛhītaṃ kumāraṃ tapoyukto jālena pracchādya kaṃsaṃ kiṅkiṇiṃ vā hrādayannadvāreṇa sabhāṃ prapādya sabhāyā madhye'dhidevanamuddhatyāvokṣyākṣānnyupyākṣedhūttānaṃ nipātya dadhnā lavaṇamiśreṇāñjalinottarairavokṣetprātarmadhyandine sāyam

agado bhavati

śaṅkhinaṃ kumāraṃ tapoyukta uttarābhyāmabhimantryottarayodakumbhena śirasto'vanayetprātarmadhyandine sāyam

agado bhavati

śrāvaṇyāṃ paurṇamāsyāmastamite sthālīpākaḥ

pārvaṇavadājyabhāgānte sthālīpākāddhutvāñjalinottaraiḥ pratimantraṃ kiśukāni juhoti

uttarābhistisṛbhirāragvadhamayyassamidhaḥ

ājyāhutīruttarāḥ

jayādi pratipadyate

pariṣecanāntaṃ kṛtvā vāgyatassaṃbhārānādāya prācīmudīcīṃ vā diśamupaniṣkramyasthaṇḍilaṃ kalpayitvā tatra prācīrudīcīśca tisrastisro lekhā likhitvā'dbhirupaninīya tāsūttarayā saktūnnivapati

tūṣṇīṃ sampuṣkā dhānā lājānāñjanābhyañjane sthagarośīramiti

uttarairupasthāyāpaḥ pariṣicyāpratīkṣastūṣṇīmetyā paśveta padetyābhyāmudakumbhena triḥ pradakṣiṇamantarato'gāraṃ niveśanaṃ vā pariṣicya
brāhmaṇānbhojayet

ityāpastambīye gṛhyapraśne'ṣṭādaśaḥ khaṇḍaḥ
ekonaviṃśaḥ khaṇḍaḥ
dhānāḥ kumārān prāśayanti

evamata ūrdhvaṃ yadaśanīyasya saktūnāṃ vaitaṃ baliṃ haredāmārgaśīrṣyāḥ

mārgaśīrṣyāṃ paurṇamāsyāmastamite sthālīpākaḥ

ahārṣamiti balimantrasya sannāmaḥ

atrainamutsṛjati

anāhitāgnerāgrayaṇam

navānāṃ sthālīpākaṃ śrapayitvāgrayaṇadevatābhyaḥ sviṣṭakṛccaturthābhyo hutvā taṇḍulānāṃ mukhaṃ pūrayitvā gīrtvācamyaudanapiṇḍaṃ saṃvṛttyottareṇa yajuṣāgārastūpa udviddhet

hemantapratyavarohaṇam

uttareṇa yajuṣā pratyavaruhyottarairdakṣiṇaiḥ pārśvaiḥ navasvastare saṃviśanti

dakṣiṇataḥ pitottarā mautavamavaśiṣṭānāṃ jyeṣṭhojyeṣṭho'nantaraḥ

saṃhāyottarābhyāṃ pṛthivīmabhimṛśanti

evaṃ saṃveśanādi triḥ

īśānāya sthālīpākaṃ śrapayitvā kṣaitrapatyaṃ ca prācīmudīcīṃ vā diśamupatiṣkramya sthaṇḍilaṃ kalpayitvā'gnerupasamādhānādi

apareṇāgniṃ dve kuṭī kṛtvā

ityāpastambīye gṛhyapraśne ekonaviṃśaḥ khaṇḍaḥ
viṃśaḥ khaṇḍaḥ
uttarayā dakṣiṇasyāmīśānamāvāhayati

laukikyā vācottarasyāṃ mīḍhuṣīm

madhye jayantam

yathoḍhamudakāni pradāya trīnodanānkalpayitvāgnimabhyānīyottarairupasparśayitvā uttarairyathāsvamodanebhyo hutvā sarvatassamavadāyottareṇa yajuṣāgniṃ sviṣṭakṛtam / uttareṇa yajuṣopasthāyottaraissahodanāni parṇānyekaikena dve dve dattvā devasenābhyo daśottarābhyaḥ

pūrvavaduttaraiḥ

onapiṇḍaṃ saṃvṛtya parṇapuṭe'vadhāyottareṇa yajuṣā vṛkṣa āsajati

atra rudrān japet

prathamottamau vā

abhita etamagniṃ gāssthāpayati yathaitā dhūmaḥ prāpnuyāt

tā gandhairdarbhagrumuṣṭināvokṣati vṛṣāṇamevāgre

gavāṃ marge'nagnau kṣetrasya patiṃ jayate

īśānavadāvāhanam

caturṣu saptasu vā parṇeṣu nāmādeśaṃ dadhāti

kṣipraṃ yajeta pāko devaḥ

uttarābhyāmupatiṣṭhate

sthālīpākaṃ brāhmaṇānbhojayet

kṣaitrapatyaṃ prāśnanti ye sanābhayo bhavanti

yathā vaiṣāṃ kuladharmassyāt

ityāpastambīye gṛhyapraśne viṃśaḥ khaṇḍaḥ
athāṣṭamaḥ paṭalaḥ
ekaviṃśaḥ khaṇḍaḥ
māsi śrāddhasyāparapakṣe yathopadeśaṃ kālāḥ

śucīnmantravato yo nigotramantrāsambandhānayugmām̐stryavarānanarthāvekṣo bhojayet

annasyottarābhirjuhoti

ājyāhutīruttarāḥ

etadvā viparītam

sarvamuttarairabhimṛśet

kḷptānvā pratipūruṣam

uttareṇa yajuṣopasparśayitvā

bhuktavato'nuvrajya pradakṣiṇīkṛtya dvaidhaṃ dakṣiṇāgrāndarbhānsaṃstīrya teṣūttarairapo dattvottarairdakṣiṇāpavargānpiṇḍāndattvā pūrvavaduttarairapo dattvottarairupasthāyottarayodapātreṇa triḥ prasavyaṃ pariṣicya nyubjya pātrāṇyuttaraṃ yajuranavānaṃ tryavarārdhya māvartayitvā prokṣyapātrāṇi dvandvamabhyudāhṛtya sarvatassamavadāyottareṇa yajuṣāśeṣasya grāsavarārdhyaṃ prāśnīyāt / yā mādhyāḥ hpaurṇamāsyā upariṣṭādvyaṣṭakā tasyāmaṣṭamī jyeṣṭhayā sampadyate tāmekāṣṭaketyācakṣate

tasyāssāyamaupakāryam

apūpaṃ catuśśarāvaṃ śrapayati

aṣṭākapāla ityeke

ityāpastambīye gṛhyapraśne ekaviṃśaḥ khaṇḍaḥ
dvāviṃśaḥ khaṇḍaḥ
pārvaṇavadājyabhāgānte'ñjalinottarayā'pūpājjuhoti

siddhaśśeṣastamaṣṭadhā kṛtvā brāhmaṇebhya upaharati

śvobhūte darbheṇa gāmupākaroti pitṛbhyastvā juṣṭāmupākaromīti

tūṣṇīṃ pañcājyāhutīrhutvā tasyai vapāṃ śrapayitvopastīrṇābhighāritāṃ madhyamenāntamena vā palāśaparṇenottarayā juhoti

mām̐sodanamuttarābhiḥ

piṣṭānnamuttarayā

ājyāhutīruttarāḥ

sviṣṭakṛtprabhṛti samānamāpiṇḍanidhānāt

anvaṣṭakāyāmevaike piṇḍanidhānamupadiśanti

athaitadaparaṃ dadhna evāñjalinā juhoti yayā'pūpam

ata eva yathārthaṃ māsaṃ śiṣṭvā śvobhūte'nvaṣṭakām

tasyā māsiśrāddhena kalpo vyākhyātaḥ

sanimitvottarān japitvā'rthaṃ brūyāt

rathaṃ labdhvā yojayitvā prāñcamavasthāpyottarayā rathacakre abhimṛśati pakṣasī vā

uttareṇa yajuṣā'dhiruhyottarayā prācīmudīcīṃ vā diśamabhiprayāya yathārthaṃ yāyāt

aśvamuttarairārohet

hastinamuttarayā

tābhyām̐ reṣaṇe pūrvavatpṛthivīmabhi
mṛśet

saṃvādameṣyansavyena pāṇinā chatraṃ daṇḍañcādatte

ityāpastambīye gṛhyapraśne dvāviṃśaḥ khaṇḍaḥ
trayoviṃśaḥ khaṇḍaḥ
dakṣiṇena phalīkaraṇamuṣṭimuttarayā hutvā gatvottarāṃ japet

kruddhamuttarābhyāmabhimantrayeta vikrodho bhavati

asaṃbhavepsuḥ pareṣāṃ sthūlāḍhārikājīvacūrṇāni kārayitvottarayā suptāyāssambādha upavapet

siddhyarthe babhrumūtreṇa prakṣālayīta

siddhyarthe yadasya gṛhe paṇyaṃ syāttata uttarayā juhuyāt

yaṃ kāmayeta nāyaṃ macchidyeteti jīvaviṣāṇe svaṃ mūtramānīya suptamuttarābhyāṃ triḥ prasavyaṃ pariṣiñcet

yena pathā dāsakarmakarāḥ palāyerantasminniṇvānyupasamādhāyottarā āhutīrjuhuyāt / yadyenaṃ vṛkṣātphalamabhinipatedvayo vā'bhivikṣipedavarṣatarkye vā bindurabhinipatettaduttarairyathāliṅgaṃ prakṣālayīta

āgārasthūṇāvirohaṇe madhuna upaveśane kupvāṃ kapotapadadarśane'mātyānāṃ
śarīrareṣaṇe'nyeṣu cādbhutotpāteṣvamāvāsyāyāṃ niśāyāṃ yatrāpāṃ na śṛṇuyāttadagnerupasamādhānādyājyabhāgānta uttarā āhutīrhutvā jayādi pratipadyate

pariṣecanāntaṃ kṛtvā'bhimṛtebhya uttarayā dakṣiṇato'śmānaṃ mparidhiṃ dadhāti

ityāpastambīye gṛhyapraśne trayoviṃśaḥ khaṇḍaḥ
samāptastathā'ṣṭamaśca paṭalaḥ
samāpto'yamāpastambagṛhyasūtram