Aparokshanubhuti · Chapter p1

śrīhariṃ paramānaṃdamupadeṣṭāramīśvaram /
vyāpakaṃ sarvalokānāṃ kāraṇaṃ taṃ namāmyaham

aparokṣānubhūtirvai procyate mokṣasiddhaye /
sadbhireva prayatnena vīkṣaṇīyā muhurmuhuḥ

svavarṇāśramadharmeṇa tapasā haritoṣaṇāt /
sādhanaṃ prabhavetpuṃsāṃ vairāgyādi catuṣṭayam

brahmādisthāvarānteśu vairāgyaṃ viṣayeṣvanu /
yathaiva kākaviṣṭhāyāṃ vairāgyaṃ taddhi nirmalam

nityamātmasvarūpaṃ hi dṛśyaṃ tadviparītagam /
evaṃ yo niścayaḥ samyagviveko vastunaḥ sa vai

sadaiva vāsanātyāgaḥ śamo'yamiti śahbditaḥ /
nigraho bāhyavṛttīnā/m dama ityabhidhīyate

viṣayebhyaḥ parāvṛttiḥ paramoparatirhi sā /
sahanaṃ sarvaduḥkhānāṃ titikṣā sā śubhā matā

nigamācāryavākyeṣu bhaktiḥ śraddheti viśrutā /
cittaikāgryaṃ tu sallakṣye samādhānamiti smṛtam

saṃsārabandhanirmuktiḥ kathaṃ me syātkathā vidhe /
iti yā sudṛḍhā buddhirvaktavyā sā mumukṣutā

uktasādhanayuktena vicāraḥ puruṣeṇa hi /
kartavyo jñānasiddhyarthamātmanaḥ śubhamicchatā

notpadyate vinā jñānaṃ vicāreṇānyasādhanaiḥ /
yathā padārthabhānaṃ hi prakāśena vinā kvacit

ko'haṃ kathamidaṃ jātaṃ ko vai kartā'sya vidyate /
upādānaṃ kimastīha vicāraḥ so'yamīdṛśaḥ

nāhaṃ bhūtagaṇo deho nāhaṃ cākṣagaṇastathā /
etadvilakṣaṇaḥ kaścidvicāraḥ so'yamīdṛśaḥ

ajñānaprabhavaṃ sarvaṃ jñānena pravilīyate /
saṃkalpo vividhaḥ kartā vicāraḥ so'yamīdṛśaḥ

etoyaryadupādānamekaṃ sūkṣmaṃ sadavyayam /
yathaivamṛdghaṭādīnaṃ vicāraḥ so'yamīdṛśaḥ

ahameko'pi sūkṣmaśca jñātā sākṣī sadavyayaḥ /
tadahaṃ nātra saṃdeho vicāraḥ so'yamīdṛśaḥ

ātmā viniṣkalo hyeko deho bahubhirāvṛtaḥ /
tayoraikyaṃ prapaśyanti kimajñānamataḥ param

ātmā niyāmakaścāmtardeho bāhyo niyamyakaḥ /
tayoraikayaṃ prapaśyanti kimajñānamataḥ param

ātmā jñānamayaḥ puṇyo deho māṃsamayo'śuciḥ /
tayoraikyaṃ prapaśyanti kimajñānamataḥ param

ātmā prakāśakaḥ svaccho dehastāmasa ucyate /
tayoraikyaṃ prapaśyanti kimajñānamataḥ param

ātmā nityo hi sadrūpo deho'nityo hyasanmayaḥ /
tayoraikyaṃ prapaśyanti kimajñānamataḥ param

ātmanastatprakāśatvaṃ yatpadārthāvabhāsanam /
nāgnyādidīptivaddiptirbhavatyāndhya yato niśi

deho'hamityayaṃ mūḍho dhṛtvā tiṣṭhatyaho janaḥ /
mamāyamityapi jñātvā ghaṭadraṣṭeva sarvadā

brahmaivāhaṃ samaḥ śāntaḥ saccidānaṃdalakṣaṇaḥ /
nāhaṃ dehohyasadrūpo jñānmityucyate budhaiḥ

nirvikāro nirākāro niravadyo'hamavyayaḥ /
nāhaṃ deho hyasadrūpo jñānamucyate budhaiḥ

nirāmayo nirābhāso nirvikalpo'hamātataḥ /
nāhaṃ deho hyasadrūpo jñānamucyate budhaiḥ

nirguṇo niṣkriyo nityo nityamukto'hamacyutaḥ /
nāhaṃ deho hyasadrūpo jñānamucyate budhaiḥ

nirmalo niścalo'nantaḥ śuddho'hamajaromaraḥ /
nāhaṃ deho hyasadrūpo jñānamucyate budhaiḥ

svadehe śobhanaṃ santaṃ puruṣākhyaṃ ca saṃmatam /
kiṃ mūrkha śūnyamātmānaṃ dehātītaṃ karoṣi bhoḥ

svātmānaṃ śruṇu mūrkha tvaṃ śrutyā yuktyā ca pūruṣam /
dehātītaṃ sadākāraṃ sudurda/rśaṃ bhavādṛśaiḥ

ahaṃśabdena vikhyāta eka eva sthitaḥ paraḥ /
sthūlastvanekatāṃ prāptaḥ kathaṃ syāddehakaḥ pumān

ahaṃ draṣṭṛtayā siddho deho dṛśyatayā sthitaḥ /
mamāyamiti nirdeśātkathaṃ syāddehakaḥ pumān

ahaṃ vikārahīnastu deho nityaṃ vikāravān /
iti pratīyate sākṣātkathaṃ syāddehakaḥ pumān

yasmātparamiti śrutyā tayā puruṣalakṣaṇam /
vinirṇītaṃ vimūḍhena kathaṃ syāddehakaḥ pumān

sarvaṃ puruṣa eveti sūkte puruṣasaṃjñite /
apyucyate yataḥ śrutyā kathaṃ syāddehakaḥ pumān

asaṃgaḥ puruṣaḥ prokto bṛhadāraṇyake'pi ca /
anantamalasaṃśliṣṭaḥ kathaṃ syāddehaka pumān

tatraiva ca samākhyātaḥ svayaṃjyotirhi pūruṣaḥ /
jaḍaḥ paraprakāśyo'yaṃ kathaṃ syāddehakaḥ

prokto'pi karmakāṇḍena hyātmā dehādvilakṣaṇaḥ /
nityaśca tatphalaṃ bhuṅkte dehapātādanantaram

liṅgaṃ cānekasaṃyuktaṃ calaṃ dṛśyaṃ vikāri ca /
avyāpakamasadrūpaṃ tatkathaṃ syātpumānayam

evaṃ dehadvayādanya ātmā puruṣa īśvaraḥ /
sarvātmā sarvarūpaśca sarvātītomahavyayaḥ

ityātmadehabhāgena prapañcasyaiva satyatā /
yathoktā tarkaśāstreṇa tataḥ kiṃ puruṣārthatā

ityātmadehabhedena dehātmatvaṃ nivāritam /
idānīṃ dehabhedasya hyasattvaṃ sphuṭamucyate

caitanyasyaikarūpatvādbhedo yukto na karhicit /
jīvataṃ ca mṛṣā jñeyaṃ rajjau sarpagrahau yathā

rajjvajñānātkṣaṇenaiva yadvadrajjurhi sarpiṇī /
bhāti tadvaccitiḥ sākṣādviśvākāreṇa kevalā

upādānaṃ prapañcasya brahmaṇonyanna vidyate /
tasmātsarvaprapañco'yaṃ brahmaivāsti na cetarat

vyāpyāvyāpakatā mithyā sarvamātmeti śāsanāt /
iti jñāte pare tattve bhedasyāvasaraḥ kutaḥ

śrutyā nivāritaṃ nūnaṃ nānātvaṃ svamukhena hi /
kathaṃ bhāso bhavedanyaḥ sthite cādvayakāraṇe

doṣo'pi vihitaḥ śrutyā mṛtyrmṛ/rtyuṃ sa gacchati /
iha paśyati nānātvaṃ māyayā vañcito naraḥ

brahmaṇaḥ sarvabhūtāni jāyante paramātmanaḥ /
tasmādetāni brahmaiva bhavantītyavadhārayet

brahmaiva sarvanāmāni rūpāṇi vividhāni ca /
karmāṇyapi samagrāṇi bibhartīti śrutirjagau

suvarṇājjayamānasya suvarṇatvaṃ ca śāśvatam /
brahmaṇo jāyamānasya brahmatvaṃ ca tathā bhavet

svalpamatyantaraṃ kṛtvā jīvātmaparamātmanoḥ /
yaḥ santiṣṭhati mūḍhātma bhayaṃ tasyābhibhāṣitam

yatrājñānādbhavedvaitamitarastatra paśyati /
ātmatvena yadā sarvaṃ netarastatra cāṇvapi

yasminsarvāṇi bhūtāni hyātmatvena vijānataḥ /
na vai tasya bhavenmoho na ca śoko'dvitīyataḥ

ayamātmā hi brahmaiva sarvātmakatayā sthitaḥ /
iti nirdhāritaṃ śrutyā bṛhadāraṇyasaṃsthayā

anubhūto'pyayaṃ loko vyavahārakṣamo'pi san /
asadrūpo yathā svapna uttarakṣaṇabādhataḥ

svapno jāgaraṇe'līkaḥ svapne'pi jāgaro na hi /
dvayameva laye nāsti layo'pi hyubhayorna ca

trayamevaṃ bhavenmithyā guṇatrayavinirmitam /
asye draṣṭā guṇātīto nityo hyekaścidātmakaḥ

ayadvanmṛdi ghaṭabhrāntiṃ śuktau vā rajatasthitim /
tadvadbrahmaṇi jīvatvaṃ vīkṣamāṇe na paśyati

yathā mṛdi ghaṭo nāma kanake kuṇḍalābhidhā /
śuktau hi rajatakhyātirjīvaśabdastathā pare

yathaiva vyomni nīlatvaṃ yathā nīraṃ marusthale /
puruṣastvaṃ yathā sthāṇau tadvadviśvaṃ cidātmani

yathaiva śūnye vetālo gandharvāṇāṃ puraṃ yathā /
yathākāśe dvicandratvaṃ tadvatsatye jagatsthitiḥ

yathā taraṅgakallolairjalameva sphuratyalam /
pātrarūpeṇa tāmraṃ hi brahmāṇḍaughaistathātmatā

ghaṭanāmna yathā pṛthvī paṭanāmnā hi taṃtavaḥ /
jagannamnā cidābhāti jñeyaṃ tattadabhāvataḥ

sarvo'pi vyavahārastu brahmaṇā kriyate janaiḥ /
ajñānānna vijānanti mṛdeva hi ghaṭādikam

kāryakāraṇatā nityamāste ghaṭamṛdoryathā /
tathaiva śrutiyuktibhyaṃ prapañca brahmaṇoriha

gṛhyamāṇe ghaṭe yadvanmṛttikā'yāti vai balāt /
vīkṣamāṇe prapañce'pi brahmaivābhāti bhāsuram

sadaivātmā viśuddho'sti hyaśuddho bhāti vai sadā /
yathaiva dvividhā rajjurjñānino'jñānino'niśam

yathaiva mṛnmayaḥ kuṃbhastadvaddeho'pi cinmayaḥ /
ātmānātmavibhāgo'yaṃ mudhaiva kriyate'budhaiḥ

sarpatvena yathā rajjū rajatatvena śuktikā /
vinirṇītā vimūḍhena dehatvena tathātmatā

ghaṭatvena yathā pṛthvī paṭatvenaiva taṃtavaḥ /
vinirṇītā vimūḍhena dehatvena tathātmatā

kanakaṃ kuṇḍalatvena taraṅgatvena vai jalam /
vinirṇītā vimūḍhena dehatvena tathātmatā

puruṣatvena vai sthāṇurjalatvena marīcikā /
vinirṇītā vimūḍhena dehatvena tathātmatā

gṛhatvenaiva kāṣṭhāni khadgatvenaiva lohatā /
vinirṇītā vimūḍhena dehatvena tathātmatā

tathā vṛkṣa viparyāso jalādbhavati kasyacit /
tadvadātmani dehatvaṃ paśyatyajñānayogataḥ

potena gacchataḥ puṃsaḥ sarvaṃ bhātīva cañcalam /
tadvadātmani dehatvaṃ paśyatyajñānayogataḥ

pītatvaṃ hi yathā śubhre doṣādbhavati kasyacit /
tadvadātmani dehatvaṃ paśyatyajñānayogataḥ

cakṣubhyāṃ bhramaśīlābhyāṃ sarvaṃ bhāti bhramātmakam /
tadvadātmani dehatvaṃ paśyatyajñānayogataḥ

alātaṃ bhramaṇaiva vartulaṃ bhāti sūryavat /
tadvadātmani dehatvaṃ paśyatyajñānayogataḥ

mahattve sarvavastūnamaṇutvaṃ hyatidūrataḥ /
tadvadātmani dehatvaṃ paśyatyajñānayogataḥ

sūkṣnatve sarvabhāvānāṃ sthūlatvaṃ copanetrataḥ /
tadvadātmani dehatvaṃ paśyatyajñānayogataḥ

kācabhūmau jalatvaṃ vā jalabhūmau hi kācatā /
tadvadātmani dehatvaṃ paśyatyajñānayogataḥ

yadvadagnau maṇitvaṃ hi maṇau vā vahnitā pumān /
tadvadātmani dehatvaṃ paśyatyajñānayogataḥ

abhreṣu satsu dhāvatsu somo dhāvati bhāti vai /
tadvadātmani dehatvaṃ paśyatyajñānayogataḥ

yathaiva digviparyāso mohādbhavati kasyacit /
tadvadātmani dehatvaṃ paśyatyajñānayogataḥ

yathā śaśī jale bhāti cañcalatvena kasyacit /
tadvadātmani dehatvaṃ paśyatyajñānayogataḥ

evamātmanyavidyāto dehādhyāso hi jāyate /
sa evātmaparijñānāllīyate ca param

sarvamātmatayā jñātaṃ jagatsthāvarajaṅgamam /
abhāvātsarvabhāvānāṃ dehasya cātmanā kutaḥ

ātmānāṃ satataṃ jānankālaṃ naya mahādyute /
prārabdhamakhilaṃ bhuñjannodvegaṃ kartumaha/rsi

utpanne'pyatmavijñāne prārabdhaṃ naiva muñcati /
iti yacchṝyate śāstre tannirākriyate'dhunā

tattvajñānodayādūrdhvaṃ prārabdhaṃ naiva vidyate /
dehādīnāmasattvattu yathā svapno vibodhataḥ

karma janmāntarīyaṃ yatprārabdhamiti kīrtitam /
tattu janmāntarābhāvātpuṃso naivāsti kahi/rcit

svapnadeho yathādhyasthastathaivāyaṃ hi dehakaḥ /
adhyastasya kuto janma janmābhāve hi tatkutaḥ

upādānaṃ prapañcasya mṛdbhaṇḍasyeva kathyate /
ajñānaṃ caiva vedāntaistasminnaṣṭe kva viśvatā

yathā rajjuṃ parityajya sarpaṃ gṛhṇāti vai bhramāt /
tadvatsatyamavijñāya jagatpaśyati mūḍhadhīḥ

rajjurūpe parijñāte sarpakhaṇḍaṃ na tiṣṭhati /
adhiṣṭhāne tathā jñāte prapañcaḥ śūnyatāṃ gataḥ

dehasyāpi prapañcatvātprārabdhāvasthitiḥ kutaḥ /
ajñānijanabodhārthaṃ prārabdhaṃ vakti vai śrutiḥ

kṣīyante cāsya karmāṇi tasmindṛṣṭe parāvare /
bahutvaṃ tanniṣedhārthaṃ śrutyā gītaṃ ca yatsphutam

ucyate'jñairbalāccaitattadānarthadvayāgamaḥ /
vedāntamatahānaṃ ca yato jñānamiti śrutiḥ

tripañcāṅgānyato vakṣye pūrvoktasya hi labdhaye /
taiśca sarvaiḥ sadā kāryaṃ nididhyāsanameva tu

nityābhyāsādṛte prāptirna bhavetsaccidātmanaḥ /
tasmādbrahma nididhyāsejjijñāsuḥ śreyase ciram

yamo hi niyamastyāgo maunaṃ deśaśca kālatā /
āsanaṃ mūlabaṃdhaśca dehasāmyaṃ ca dṛksthitiḥ

prāṇasaṃyamanaṃ caiva pratyāhāraśca dhāraṇā /
ātmadhyānaṃ samādhiśca proktānyaṅgāni vai kramāt

sarvaṃ brahmeti vijñānādindriyagrāmasaṃyamaḥ /
yamo'yamiti saṃprokto'bhyasanīyo muhurmuhuḥ

sajātīyapravāhaśca vijātīyatiraskṛtiḥ /
niyamo hi parānando niyamātkriyate budhaiḥ

tyāgaḥ prapañcarūpasya cidātmatvāvalokanāt /
tyāgo hi mahatāṃ pūjyaḥ sadyo mokṣamayo yataḥ

yasmādvāco nivartante aprāpya manasā saha /
yanmaunaṃ yogibhirgamyaṃ tadbhavetsarvadā budhaḥ

vāco yasyānnivartante tadvaktuṃ kena śakyate /
prapañco yadi vaktavyaḥ so'pi śabdavivarjitaḥ

iti vā tadbhavenmaunaṃ satāṃ sahaja saṃjñitam /
girā maunaṃ tu bālānāṃ prayuktaṃ brahmavādibhiḥ

ādāvante ca madhye ca jano yasminna vidyate /
yenedaṃ satataṃ vyāptaṃ sa deśo vijanaḥ smṛtaḥ

kalanāt sarvabhūtānāṃ brahmādīnāṃ nimeṣataḥ /
kālaśabdena nirdiṣṭo hyakhaṇḍānandako'dvayaḥ

sukhenaiva bhedyasminnajasraṃ brahmacintanam /
āsanaṃ tadvijānīyānnetaratsukhanāśanam

siddhaṃ yatsarvabhūtādi viśvādhiṣṭhānamavyayam /
yasminsiddhāḥ samāviṣṭāstadvai siddhāsanaṃ viduḥ

yanmūlaṃ sarvabhūtānāṃ yanmūlaṃ cittabandhanam /
mūlabandhaḥ sadā sevyo yogyo'sau rājayoginām

aṅgānāṃ samatāṃ vidyātsame brahmaṇi līnatām /
no cennaiva samānatvamṛjutvaṃ śuṣkavṛkṣavat

dṛṣṭiṃ jñānamayīṃ kṛtvā paśyedbrahmamayaṃ jagat /
sā dṛṣṭiḥ paramodārā na nāsāgrāvalokinī

draṣtṛdarśanadṛśyānāṃ virāmo yatra vā bhavet /
dṛṣṭistatraiva kartavyā na nāsāgrāvalokinī

cittādisarvabhāveṣu brahmatvenaiva bhāvanāt /
nirodhaḥ sarva vṛttīnāṃ prāṇāyāmaḥ sa ucyate

niṣedhanaṃ prapañcasya recakākhyaḥ samīraṇaḥ /
brahmaivāsmīti yā vṛttiḥ pūrako vāyurīritaḥ

tatastadvṛttinaiścalyaṃ kuṃbhakaḥ prāṇasaṃyamaḥ /
ayaṃ cāpi prabuddhānāmajñānāṃ ghrāṇapīḍanam

viṣayeṣvātmatāṃ dṛṣṭvā manasaściti majjanam /
pratyāhāraḥ sa vijñeyo'bhyasanīyo mumukṣubhiḥ

yatra yatra mano yāti brahmaṇastatra darśanāt /
manaso dhāraṇaṃ caiva dhāraṇā sā parā matā

brahmaivāsmīti sadvṛttyā nirālambatayā sthitiḥ /
dhyānaśabdena vikhyātā paramānandadāyinī

nirvikāratayā vṛttyā brahmākāratayā punaḥ /
vṛttivismaraṇaṃ samyaksamādhirjñānasaṃjñakaḥ

imañcākṛtrimānandaṃ tāvatsādhu samabhyaset /
vaśyo yāvatkṣaṇātpuṃsaḥ prayuktaḥ san bhavetsvayam

tataḥ sādhananirmuktaḥ siddho bhavati yogirāṭ /
tatsvarūpaṃ na caitasya viṇayo manaso girām

samādhau kriyamāṇe tu vighnānyāyānti vai balāt /
anusaṃdhānarāhityamālasyaṃ bhogalālasam

layastamaśca vikṣepo rasāsvādaśca śūnyatā /
evaṃ yadvighnabāhulyaṃ tyājyaṃ brahmavidā śanaiḥ

bhāvavṛttyā hi bhāvatvaṃ śūnyavṛttyā hi śūnyatā /
brahmavṛttyā hi pūrṇatvaṃ tathā pūrṇatvamabhyaset

ye hi vṛttiṃ jahatyenāṃ brahmākhyāṃ pāvanīṃ parām /
vṛthaiva te tu jīvanti paśubhiśca samā narāḥ

ye hi vṛttiṃ vijānanti jñātvāpi vardhayanti ye /
te vai satpuruṣā dhanyā vandyāste bhuvanatraye

yeṣāṃ vṛttiḥ samā vṛddhā paripakvā ca sā punaḥ /
te vai sadbrahmatāṃ prāptā netare śabdavādinaḥ

kuśalā brahmavārtāyāṃ vṛttihīnāḥ surāgiṇaḥ /
te'pyajñānatayā nūnaṃ punarāyānti yānti ca

nimeṣārdhaṃ na tiṣṭhanti vṛttiṃ brahmamayīṃ vinā /
yathā tiṣṭhanti brahmādyāḥ sanakādyaḥ śukādayaḥ

kārye kāraṇatāyātā kāraṇe na hi kāryatā /
kāraṇatvaṃ tato gacchetkāryābhāve vicārataḥ

atha śuddhaṃ bhavedvastu yadvai vācāmagocaram /
draṣṭavyaṃ mṛdghaṭenaiva dṛṣṭāntena punaḥ punaḥ

anenaiva prakāreṇa vṛttibrahmātmikā bhavet /
udeti śuddhacittānāṃ vṛttijñānaṃ tataḥ param

kāraṇaṃ vyatirekeṇa pumānādau vilokayet /
anvayena punastaddhi kārye nityaṃ prapaśyati

kārye hi kāraṇaṃ paśyetpaścātkāryaṃ visarjayet /
anvayena punastaddhi kārye nityaṃ prapaśyati

bhāvitaṃ tīvravegena yadvastu niścayātmanā /
pumāṃstaddhi bhavecchīghraṃ jñeyaṃ bhramarakīṭavat

adṛśyaṃ bhāvarūpañca sarvameva cidātmakam /
sāvadhānatayā nityaṃ svātmānaṃ bhāvayedbudhaḥ

dṛśyaṃ hyadṛśyatāṃ nītvā brahmākāreṇa cintayet /
vidvānnityasukhe tiṣṭheddhiya cidrasapūrṇayā

ebhiraṅgaiḥ samāyukto rājayoga udāhṛtaḥ /
kiñcitpakvakaṣāyāṇāṃ haṭhayogena saṃyutaḥ

paripakvaṃ mano yeṣaṃ kevalo'yaṃ ca siddhidaḥ /
gurudaivatabhaktānāṃ sarveṣāṃ sulabho javāt