añjanaśailanāthastotram · Chapter 1

// añjanaśailanāthastotram //
pulakini bhujamadhye pūjayantaṃ purandhrīṃ
bhuvananayanapuṇyaṃ pūritāśeṣakāmam /
punarapi vṛṣaśaile phullanīlotpalābhaṃ
puruṣamanubhaveyaṃ puṇḍarīkāyatākṣam

ājānasauhṛdamapārakṛpāmṛtābdhiṃ
avyājavatsalamavelasuśīlamādyam /
ānandarāśimanurāgamayāvarodhaṃ
ārādhayāmi harimañjanaśailanātham

ātāmrapādamavadātasuvarṇacelaṃ
āpīnabāhuśikharojjvalaśaṅkhacakram /
āvissmitānanamamandadayākaṭākṣaṃ
ārādhayāmi harimañjanaśailanātham

aprākṛtāvayavasaṃhitasaṃniveśaṃ
ārūḍhayauvanamahīnakumārabhāvam /
amlānakāntimativāṅmanasānubhāvaṃ
ārādhayāmi harimañjanaśailanātham

āśāvakāśasamuditvarasarvagandhaṃ
āsvādayatsugamasarvarasasvabhāvam /
āśleṣagamyasukhasaṃspṛśanātirekaṃ
ārādhayāmi harimañjanaśailanātham

ādarśayantamatisaṃkucitākṣiśaktiṃ
āśrāvayantamakhilān badhirān prakṛtyā /
ābhāṣayantamabhito natamūkavargaṃ
ārādhayāmi harimañjanaśailanātham

ādhāvayantamatimārutameva paṅgūn
ājānulambibhujayantamaho kubāhūn /
anyāṃśca kṛtaśirasaḥ pratijīvayantaṃ
ārādhayāmi harimañjanaśailanātham

ājanmanirdhanajanānalakeśayantaṃ
ajñānapi tridaśadeśikadeśyayantam /
ahnāya vandhyamapi martyamavandhyayantaṃ
ārādhayāmi harimañjanaśailanātham

ābaddhakaṅkaṇamaśeṣaśaraṇyatāyāṃ
āpatsahāyamaparādhasahaṃ natānām /
āsannasāmagasukhālasasūrivargaṃ
ārādhayāmi harimañjanaśailanātham

adhyāsitāsanasarojasanūpurāṅ ghriṃ
āmuktavīrakaṭakāyatavṛttajaṅgham /
āścaryajānuyugamapratimorukāṇḍaṃ
ārādhayāmi harimañjanaśailanātham

āvartinimnanikhilāṇḍanidānanābhiṃ
āyāmidorvivarakeligṛhāvarodham /
ābaddharatnamayabhūṣabhujācatuṣkaṃ
ārādhayāmi harimañjanaśailanātham

aṃsāvalambimaṇikuṇḍalakāntagaṇḍaṃ
āvissmitāṃśumadhurādharabandhujīvam /
āsyābjasaurabhasamutsukadīrghanāsaṃ
ārādhayāmi harimañjanaśailanātham

ardhendubhāsvadalikollasadūrdhvapuṇḍraṃ
ālolanīlakuṭilālakacāruvaktram /
āvirmayūkhamaṇicūḍamahākirīṭaṃ
ārādhayāmi harimañjanaśailanātham

vādibhītikarāryeṇa racitā bhāvabandha taḥ
śobhate veṅkaṭādrīśaviṣayā stutiradbhutā //
// iti añjanaśailanāthastotraṃ saṃpūrṇam //