ānaṃdarāmāyaṇarāmarakṣā · Chapter 1

śrī śatakoṭi rāmacaritāṃtargata śrīmadānaṃdarāmāyaṇe
paṃcamaḥ sargaḥ prāraṃbhaḥ /
viṣṇudāsa uvāca
śrī rāmarakṣayā proktaṃ kuśāyahyabhimaṃtraṇam /
kṛtaṃ tenaiva muninā guro tāṃ me prakāśaya

rāmarakṣāṃ varāṃ puṇyāṃ bālānāṃ śāṃtikāriṇīm /
iti śiṣyavacaḥ śrutvā rāmadāso'pravīdvacaḥ

śrīrāmadāsa uvāca
samyak pṛṣṭaṃ tvayā śiṣya rāmarakṣā'dhunocyate /
yā proktā śaṃbhunā pūrvaṃ skaṃdārthaṃ girijāṃ prati

śrī śiva uvāca
devyadya skaṃdaputrāya rāmarakṣābhimaṃtriṇam /
kuru tārakadhātāya samartho'yaṃ bhaviṣyati

ityuktvā kathayāmāsa rāmarakṣāṃ śivaḥ striyai /
namaskṛtāya rāmacaṃdraṃ śucirbhūtvā jitendriyaiḥ

atha dhyānam /
vāme kodaṃḍadaṃḍaṃ nijakarakamale dakṣiṇe bāṇamekaṃ /
paścādbhāge ca nityaṃ dadhatamabhimataṃ sāsitūṇīrabhāram /
vāme'vāme vasadbhyāṃ saha militatanuṃ jānakīlakṣmaṇābhyām /
śyāmaṃ rāmaṃ bhaje'haṃ praṇata janamanaḥ khedavicchedadakṣam

ॐ asya śrī rāmarakṣāstotramaṃtrasya budhakauśika ṛṣiḥ /
śrī rāmacaṃdro devatā rāma iti bījam /
anuṣṭup chaṃdaḥ / śrī rāma prītyarthe jape viniyogaḥ//
// ॐ//
caritaṃ raghunāthasya śatakoṭi pravistaram /
ekaikamakṣaraṃ puṃsāṃ mahāpātakanāśanam

dhyātvā nīlotpalaśyāmaṃ rāmaṃ rājīvalocanam /
jānakī lakṣmaṇopetaṃ jaṭāmukuṭamaṃḍitam

sāsitūṇa dhanurbāṇa pāṇiṃ naktaṃcarāntakam /
svalīlayā jagattrātumāvirbhūtamajaṃ vibhum

rāmarakṣāṃ paṭhetprājñaḥ pāpaghnīṃ sarvakāmadām /
śiro me rāghavaḥ pātu bhālaṃ daśarathātmajaḥ

kausalyeyo dṛśau pātuviśwāmitrapriyaḥ śrutī /
ghrāṇaṃ pātu makhatrātā mukhaṃ saumitrivatsalaḥ

jihvāṃ vidhānidhiḥ pātu kaṇṭhaṃ bharatavaṃditaḥ /
skaṃdhau divyāyudhaḥ pātu bhujau bhagneśakārmukaḥ

karau sītāpatiḥ pātu hṛdayaṃ jāmadagnyajit /
pārśve raghuvaraḥ pātu kukṣī ikṣvākunaṃdanaḥ

(jādā caraṇa)
madhyaṃ pātu kharadhvaṃsī nābhiṃ jāmbavadāśrayaḥ /
sugrīveśaḥ kaṭiṃ pātu sakthinī hanumatprabhuḥ

urū raghūttamaḥ pātu guhyaṃ rakṣaḥ kulāntakṛt /
jānunī setukṛt pātu jaṃghe daśamukhāntakaḥ

pādau bibhīṣaṇaśrīdaḥ pātu rāmo'khilaṃ vapuḥ /
etāṃ rāmabalopetāṃ rakṣāṃ yaḥ sukṛtī paṭheta//
sa cirāyuḥ sukhī putrī vijayī vinayī bhavet

pātālabhūtalavyoma cāriṇaśchadmacāriṇaḥ /
na draṣṭumapi śaktāste rakṣitaṃ rāmanāmabhiḥ

rāmeti rāmabhadreti rāmacaṃdreti vā smaran /
naro na lipyate pāpaiurbhuktiṃ muktiṃ ca vindati

jagaccaikamaṃtreṇa rāmanāmnā'bhirakṣitam /
yaḥ kaṇṭhe dharayettasya karasthāḥ sarvasiddhayaḥ

vajrapaṃjaranāmedaṃ yo rāmakavacaṃ paṭhet /
avyāhatājñaḥ sarvatra labhate jayamaṃgalam

ādiṣṭavān yathā svapne rāmarakṣāmimāṃ haraḥ /
tathā likhitavān prātaḥ prabuddho budhakauśikaḥ

rāmo daśarathiḥ śūro lakṣmaṇā'nucaro balī//
kākuttsthaḥ puruṣaḥ pūrṇaḥ kausalyānaṃdavardhanaḥ

vedāṃtavedho yajñeśaḥ purāṇapuruṣottamaḥ /
jānakīvallabhaḥ śrīmānaprameya parākramaḥ

ityetāni japennityaṃ yadbhaktaḥ śraddhayānvitaḥ /
aśvamedhadhikaṃ puṇyaṃ labhate nātrasaṃśayaḥ

sannadhhaḥ kavacī khaḍgī cāyabāṇadharo yuvā /
gacchan manoratho'smākaṃ rāmaḥ pātu salakṣmaṇaḥ

taruṇau rūpasaṃpannau sukumārau mahābalau /
puṇḍarīkaviśālākṣau cīrakṛṣṇājināmbarau

phalamūlāśanau dāṃtau tāpasau brahmacāriṇau /
putrau daśarathasyaitau bhratarau rāmalakṣmaṇau

dhanvinau baddhanistriṃśau kākapakṣadharau śrutau /
varau māṃ pathi rakṣetāṃ tāvubau rāmalakṣmaṇau

śaraṇyau sarvasattvānāṃ śreṣṭhau sarva dhanuṣmatām /
rakṣaḥ kulanihantārau trāyetāṃ no raghūttamau

āttasajjadhanuṣā viṣuspṛśā vakṣayāśuganiṣaṃga saṃginau /
rakṣaṇāya mama rāmalakṣmaṇā vagrataḥ pathi sadaiva gacchatām

ārāmaḥ kalpavṛkṣāṇāṃ virāmaḥ sakalapadām /
abhirāmastrilokānaṃ rāmaḥ śrīmānsa naḥ prabhuḥ

rāmāya rāmabhadrāya rāmacaṃdrāya vedhase /
raghunāthaya nāthāya sītayāḥ pataye namaḥ

śrī rāma raghunaṃdana rāma rāma
śrī rāma bharatāgraja rāma rāma
śrī rāma raṇakarkaśa rāma rāma
śrī rāma śaraṇaṃ bhava rāma rāma

lokābhirāmaṃ raṇaraṅgadhīraṃ rājīvanetraṃ raghuvaṃśanāthaṃ
kāruṇyarūpaṃ karuṇākaraṃ taṃ śrīrāmacaṃdraṃ śaraṇaṃ prapadye

dakṣiṇe lakṣmaṇo yasya vāme tu janakātmajā /
purato mārutiryasya taṃ vaṃde raghunandanam // ३५
goṣpadīkṛtavārīśaṃ maśakīkṛrarākṣasam /
rāmāyaṇamahāmālā ratnaṃ vande'nilātmajam

aghaudha tiṣṭha dūre tvaṃ rogāstiṣṭhaṃtu dūrataḥ /
varīvartī sadā'smākaṃ hṛdi ramo dhanurdharaḥ

manojavaṃ mārutatulyavegaṃ jitendriyaṃ buddhimatāṃ variṣṭham /
vātātmajaṃ vānarayūtamukhyaṃ śrīrāmadūtaṃ śaraṇaṃ prapadye

rāma rāma tava pāda paṃkajaṃ cintayāmi bhavabaṃdhamuktaye /
vaṃditaṃ suranareṃdramaulibhirdhyāyitaṃ manasi yogibhiḥ sadā

rāmaṃ lakṣamaṇapūrvajaṃ raghuvaraṃ sītāpatiṃ suṃdaram /
kākutsyaṃ karuṇārṇavaṃ guṇanidhiṃ viprapriyaṃ dharrmikam /
rājendraṃ satyasaṃdhaṃ daśarathanayaṃ śāmalaṃ śāntimūrtim /
vaṃde lokābhirāmaṃ raghukulatilakaṃ rāghavaṃ rāvaṇārim

etāni rāmanāmānī prātarutthāya yaḥ paṭhet /
aputro labhate putraṃ dhanārthī labhate dhanam

mātā rāmo matpitā rāmacaṃdraḥ svāmī rāmo matsakhā rāmacaṃdraḥ /
sarvasvaṃ me rāmacaṃdro dayālurnānyaṃ jāne naiva jāne na jāne

śrīrāmanāmāmṛta maṃtrabīja saṃjīvanī cenmanasi praviṣṭā /
hālāhalaṃ vā pralayānalaṃ vā mṛtyormukhaṃ vā viśatāṃ kuto bhīḥ

śrīśabdapūrvaṃ jayaśabdamadhyaṃ jayadvayanāpi punaḥ prayuktam /
triḥsaptakṛtvo raghunātha nāma japānnihanyā dvijakoṭihāyāḥ

evaṃ girīndraje proktā rāmarakṣā mayā tava /
mayopadiṣṭā yā svapne viśvāmitrāya vai purā

rāmadāsa uvāca
evaṃ śivenopadiṣṭaṃ śrutvā devī girīndrajā /
rāmarakṣāṃ paṭhitvā sā skaṃdaṃ samabhimaṃtrayat

tasyāstejobalenaiva jaghāna tārakāsuram /
ṣaḍānanaḥ kṣaṇadeva kṛtakṛtyo'bhavat purā

saiveyaṃ rāmarakṣāste mayākhyātā'tipuṇyadā /
yasyāḥ śravaṇamatreṇa kasyāpi na bhayaṃ bhavet

vālmikīnā'nayāpūrvaṃ kuśāyahyabhiśecanam /
kṛtaṃ bālagrahāṇāṃ ca śāṃtyarthaṃ sā mayoditā

bālānāṃ grahaśāṃtyarthaṃ japanīyā niraṃtaram /
rāmarakṣā mahāśreṣṭhā mahāghaugha nivāriṇī

nāsyāḥ parataraṃ stotraṃ nāsyāḥ parataro japaḥ /
nāsyāḥ parataraṃ kiṃcitsatyaṃ satyaṃ vadāmyaham

// iti śrī śatakoṭi rāmacaritāṃtargata śrīmadānandarāmāyaṇe
vālmīkīye janmakāṇḍe rāmarakṣākathanaṃ nāma pañcamaḥ sargaḥ //