ahalyākṛtarāmastotram · Chapter 1

śrī gaṇeśāya namaḥ /
ahalyovācaḥ /
aho kṛtārthā'smi jagannivāsa te pādābjasaṃllagnarajaḥ kaṇādaham /
spṛśāmi yatpadmajaśaṅkarādibhirvimṛgyate randhitamānasaiḥ sadā

aho vicitraṃ tava rāma ceṣṭitaṃ manuṣyabhāvena vimohitaṃ jagat /
calasyajasraṃ caraṇādivarjitaḥ sampūrṇa ānandamayo'timāyikaḥ

yatpādapaṅkajaparāgapavitragātrā bhāgīrathī bhavaviriñcimukhānpunāti /
sākṣātsa eva mama dṛgviṣayo yadā''ste kiṃ varṇyate mama purākṛtabhāgadheyam

martyāvatāre manujākṛtiṃ hariṃ rāmābhidheyaṃ ramaṇīyadehinam /
dhanurdharaṃ padmaviśālalocanaṃ bhajāmi nityaṃ na parānbhajiṣye

yatpādapaṅkarajaḥśrutibhirvimṛgyaṃ yannabhipaṅkajabhavaḥ kamalāsanaśca /
yannāmasārarasiko bhagavānpurāristaṃ rāmacandramaniśaṃ hṛdi bhāvayāmi

yasyāvatāracaritāni viriñciloke gāyanti nāradamukhā bhavapadmajādmāḥ /
ānandajāśrupariṣiktakucāgrasīmā vāgīśvarī ca tamahaṃ śaraṇaṃ prapadye

so'yaṃ parātmā puruṣaḥ purāṇa eṣaḥ svayaṃjyotirananta ādyaḥ /
māyātanuṃ lokavimohanīyāṃ dhatte parānugraha eṣa rāmaḥ

ayaṃ hi viśvodbhavasaṃyamānāmekaḥ svamāyāguṇabimbito yaḥ /
viriñciviṣṇvīśvaranāmabhedān dhatte svatantraḥ paripūrṇa ātmā

namo'stu te rāma tavāṅghripaṅkajaṃ śriyā dhṛtaṃ vakṣasi lālitaṃ priyāt /
ākrāntamekena jagattrayaṃ purā dhyeyaṃ munīndrairabhimānavarjitaiḥ

jagatāmādibhūtastvaṃ jagattvaṃ jagadāśrayaḥ /
sarvabhūteṣvasaṃyukta eko bhāti bhavānparaḥ

ॐkāravācyastvaṃ rāma vācāmaviṣayaḥ pumān /
vācyavācakabhedena bhavāneva jaganmayaḥ

kāryakāraṇakartṛtvasaphalasādhanabhedataḥ /
eko vibhāsi rāma tvaṃ māyayā bahurūpayā

tvanmāyāmohitadhiyastvāṃ na jānanti tatvataḥ /
mānuṣaṃ tvā'bhimanyante māyinaṃ parameśvaram

ākāśavattvaṃ sarvatra bahirantargato'malaḥ /
asaṅgo hyacalo nityaḥ śuddho buddhaḥ sadavyayaḥ

yoṣinmūḍhāhamajñā te tatvaṃ jāne kathaṃ vibho /
tasmātte śataśo rāma namaskuryāmananyadhīḥ

deva me yatrakutrāpi sthitāyā api sarvadā /
tvatpādakamale saktā bhaktireva sadā'stu me

namaste puruṣādhyakṣa namaste bhaktavatsala /
namaste'stu hṛṣīkeśa nārāyaṇa namo'stu te

bhavabhayaharamekaṃ bhānukoṭiprakāśaṃ karadhṛtaśaracāpaṃ kālameghāvabhāsam /
kanakaruciravastraṃ ratnavatkuṇḍalāḍhyaṃ kamalaviśadanetraṃ sānujaṃ rāmamīḍe

stutvaivaṃ puruṣaṃ sākṣādrāghavaṃ purataḥ sthitam /
parikramya praṇamyāśu sānujñātā yayau patim

ahalyayā kṛtaṃ stotraṃ yaḥ paṭhedbhaktisaṃyutaḥ /
sa mucyate'khilaiḥ pāpaiḥ paraṃ brahmādhigacchati

putrādyarthe paṭhedbhaktyā rāmaṃ hṛdi nidhāya ca /
saṃvatsareṇa labhate vandhyā api suputrakam

sarvānkāmānavāpnoti rāmacandraprasādataḥ

brahmaghno gurutalpago'pi puruṣaḥ steyī surāpo'pi vā
mātṛbhrātṛvihiṃsako'pi satataṃ bhogaikabaddhādaraḥ /
nityaṃ stotramidaṃ japanraghupatiṃ bhaktyā hṛdisthaṃ smaran
dhyāyan muktimupaiti kiṃ punarasau svācārayukto naraḥ

// iti śrīmadadhyātmarāmāyaṇe ahalyāviracitaṃ rāmacandrastotraṃ sampūrṇama//