અહલ્યાકૃતરામસ્તોત્રમ્ · અધ્યાય 1

શ્રી ગણેશાય નમઃ ।
અહલ્યોવાચઃ ।
અહો કૃતાર્થાઽસ્મિ જગન્નિવાસ તે પાદાબ્જસંલ્લગ્નરજઃ કણાદહમ્ ।
સ્પૃશામિ યત્પદ્મજશઙ્કરાદિભિર્વિમૃગ્યતે રન્ધિતમાનસૈઃ સદા

અહો વિચિત્રં તવ રામ ચેષ્ટિતં મનુષ્યભાવેન વિમોહિતં જગત્ ।
ચલસ્યજસ્રં ચરણાદિવર્જિતઃ સમ્પૂર્ણ આનન્દમયોઽતિમાયિકઃ

યત્પાદપઙ્કજપરાગપવિત્રગાત્રા ભાગીરથી ભવવિરિઞ્ચિમુખાન્પુનાતિ ।
સાક્ષાત્સ એવ મમ દૃગ્વિષયો યદાઽઽસ્તે કિં વર્ણ્યતે મમ પુરાકૃતભાગધેયમ્

મર્ત્યાવતારે મનુજાકૃતિં હરિં રામાભિધેયં રમણીયદેહિનમ્ ।
ધનુર્ધરં પદ્મવિશાલલોચનં ભજામિ નિત્યં ન પરાન્ભજિષ્યે

યત્પાદપઙ્કરજઃશ્રુતિભિર્વિમૃગ્યં યન્નભિપઙ્કજભવઃ કમલાસનશ્ચ ।
યન્નામસારરસિકો ભગવાન્પુરારિસ્તં રામચન્દ્રમનિશં હૃદિ ભાવયામિ

યસ્યાવતારચરિતાનિ વિરિઞ્ચિલોકે ગાયન્તિ નારદમુખા ભવપદ્મજાદ્માઃ ।
આનન્દજાશ્રુપરિષિક્તકુચાગ્રસીમા વાગીશ્વરી ચ તમહં શરણં પ્રપદ્યે

સોઽયં પરાત્મા પુરુષઃ પુરાણ એષઃ સ્વયંજ્યોતિરનન્ત આદ્યઃ ।
માયાતનું લોકવિમોહનીયાં ધત્તે પરાનુગ્રહ એષ રામઃ

અયં હિ વિશ્વોદ્ભવસંયમાનામેકઃ સ્વમાયાગુણબિમ્બિતો યઃ ।
વિરિઞ્ચિવિષ્ણ્વીશ્વરનામભેદાન્ ધત્તે સ્વતન્ત્રઃ પરિપૂર્ણ આત્મા

નમોઽસ્તુ તે રામ તવાઙ્ઘ્રિપઙ્કજં શ્રિયા ધૃતં વક્ષસિ લાલિતં પ્રિયાત્ ।
આક્રાન્તમેકેન જગત્ત્રયં પુરા ધ્યેયં મુનીન્દ્રૈરભિમાનવર્જિતૈઃ

જગતામાદિભૂતસ્ત્વં જગત્ત્વં જગદાશ્રયઃ ।
સર્વભૂતેષ્વસંયુક્ત એકો ભાતિ ભવાન્પરઃ

ૐકારવાચ્યસ્ત્વં રામ વાચામવિષયઃ પુમાન્ ।
વાચ્યવાચકભેદેન ભવાનેવ જગન્મયઃ

કાર્યકારણકર્તૃત્વસફલસાધનભેદતઃ ।
એકો વિભાસિ રામ ત્વં માયયા બહુરૂપયા

ત્વન્માયામોહિતધિયસ્ત્વાં ન જાનન્તિ તત્વતઃ ।
માનુષં ત્વાઽભિમન્યન્તે માયિનં પરમેશ્વરમ્

આકાશવત્ત્વં સર્વત્ર બહિરન્તર્ગતોઽમલઃ ।
અસઙ્ગો હ્યચલો નિત્યઃ શુદ્ધો બુદ્ધઃ સદવ્યયઃ

યોષિન્મૂઢાહમજ્ઞા તે તત્વં જાને કથં વિભો ।
તસ્માત્તે શતશો રામ નમસ્કુર્યામનન્યધીઃ

દેવ મે યત્રકુત્રાપિ સ્થિતાયા અપિ સર્વદા ।
ત્વત્પાદકમલે સક્તા ભક્તિરેવ સદાઽસ્તુ મે

નમસ્તે પુરુષાધ્યક્ષ નમસ્તે ભક્તવત્સલ ।
નમસ્તેઽસ્તુ હૃષીકેશ નારાયણ નમોઽસ્તુ તે

ભવભયહરમેકં ભાનુકોટિપ્રકાશં કરધૃતશરચાપં કાલમેઘાવભાસમ્ ।
કનકરુચિરવસ્ત્રં રત્નવત્કુણ્ડલાઢ્યં કમલવિશદનેત્રં સાનુજં રામમીડે

સ્તુત્વૈવં પુરુષં સાક્ષાદ્રાઘવં પુરતઃ સ્થિતમ્ ।
પરિક્રમ્ય પ્રણમ્યાશુ સાનુજ્ઞાતા યયૌ પતિમ્

અહલ્યયા કૃતં સ્તોત્રં યઃ પઠેદ્ભક્તિસંયુતઃ ।
સ મુચ્યતેઽખિલૈઃ પાપૈઃ પરં બ્રહ્માધિગચ્છતિ

પુત્રાદ્યર્થે પઠેદ્ભક્ત્યા રામં હૃદિ નિધાય ચ ।
સંવત્સરેણ લભતે વન્ધ્યા અપિ સુપુત્રકમ્

સર્વાન્કામાનવાપ્નોતિ રામચન્દ્રપ્રસાદતઃ

બ્રહ્મઘ્નો ગુરુતલ્પગોઽપિ પુરુષઃ સ્તેયી સુરાપોઽપિ વા
માતૃભ્રાતૃવિહિંસકોઽપિ સતતં ભોગૈકબદ્ધાદરઃ ।
નિત્યં સ્તોત્રમિદં જપન્રઘુપતિં ભક્ત્યા હૃદિસ્થં સ્મરન્
ધ્યાયન્ મુક્તિમુપૈતિ કિં પુનરસૌ સ્વાચારયુક્તો નરઃ

॥ ઇતિ શ્રીમદધ્યાત્મરામાયણે અહલ્યાવિરચિતં રામચન્દ્રસ્તોત્રં સમ્પૂર્ણમ॥