Adhyatma Upanishad · Chapter p1

adhyātmopaniṣat
ॐ pūrṇamadaḥ pūrṇamidaṃ pūrṇātpūrṇamudacyate /
pūrṇasya pūrṇamādāya pūrṇamevāvaśiṣyate //
ॐ śāntiḥ śāntiḥ śāntiḥ //
antaḥśarīre nihito guhāyāmaja eko nityamasya pṛthivī śarīraṃ yaḥ pṛthivīmantare sañcaran yaṃ pṛthivī na veda / yasyāpaḥśarīraṃ yaॊ'po'ntare sañcaranyamāpo na viduḥ / yasya tejaḥ śarīraṃ yastejo'ntare sañcaranyaṃ tejo na veda / yasya vāyuḥ śarīraṃ yo vāyumantare sañcaranyaṃ vāyurna veda / yasyākāśaḥ śarīraṃ ya ākāśamantare sañcaran yamākāśo na veda / yasya manaḥ śarīraṃ yo mano'ntare sañcaranyaṃ mano na veda / yasya buddhiḥ śarīraṃ yo buddhimantare sañcaranyaṃ buddhirna veda / yasyāhaṅkāraḥ śarīraṃ yo'haṅkāramantare sañcaranyaṃ ahaṅkāro na veda / yasya cittaṃ śarīraṃ yaścittamantare sañcaranyaṃ cittaṃ na veda / yasyāvyaktaṃ śarīraṃ yo'vyaktamantare sañcaranyam avyaktaṃ na veda / yasyākṣaraṃ śarīraṃ yo'kṣaramantare sañcaranyam akṣaraṃ na veda / yasya mṛyuḥ śarīraṃ yo mṛtyumantare sañcaranyaṃ mṛtyurna veda / sa eṣa sarvabhūtāntarātmā'pahatapāpmā divyo deva eko nārāyaṇaḥ / ahaṃ mameti yo bhāvo dehākṣādāvanātmani / adhyāso'yaṃ nirastavyo viduṣā brahmaniṣṭhayā

jñātvā svaṃ pratyagātmānaṃ buddhitadvṛttisākṣiṇam /
so'hamityeva tadvṛttyā svānyatrātmamatiṃ tyajet

lokānuvartanaṃ tyaktvā tyaktvā dehānuvartanam /
śāstrānuvartanaṃ tyaktvā svādhyāsāpanayaṃ kuru

svātmanyeva sadā sthityā mano naśyati yoginaḥ /
yuktyā śrutyā svānubhūtyā jñātvā sārvātmyamātmanaḥ

nidrāyā lokavārtāyāḥ śabdāderātmavismṛteḥ /
kvacinnavasaraṃ dattvā cintayātmānamātmani

mātāpitrormalodbhūtaṃ malamāṃsamayaṃ vapuḥ /
tyaktvā caṇḍālavaddūraṃ brahmībhūya kṛtī bhava

ghaṭākāśaṃ mahākāśa ivātmānaṃ parātmani /
vilāpyākhaṇḍabhāvena tūṣṇīṃ bhava sadā mune

svaprakāśamadhiṣṭhānaṃ svayaṃbhūya sadātmanā /
brahmāṇḍamapi piṇḍāṇḍaṃ tyajyatāṃ malabhāṇḍavat

cidātmani sadānande deharūḍhāmahaṃdhiyam /
niveśya liṅgamutsṛjya kevalo bhava sarvadā

yatraiṣa jagadābhāso darpaṇāntaḥpuraṃ yathā /
tadbrahmāhamiti jñātvā kṛtakṛtyo bhavānagha

ahaṅkāragrahānmuktaḥ svarūpamupapadyate /
candravadvimalaḥ pūrṇaḥ sadānandaḥ svayamprabhaḥ

kriyānāśādbhaveccintānāśo'smādvāsanākṣayaḥ /
vāsanāprakṣayo mokṣaḥ sā jīvanmuktiriṣyate //
sarvatra sarvataḥ sarvabrahmamātrāvalokanam /
sadbhāvabhāvānādāḍhyādvāsanālayamaśnute

pramādo brahmaniṣṭhāyāṃ na kartavyaḥ kadācana /
pramādo mṛtyurityāhurvidyāyāṃ brahmavādinaḥ

yathāpakṛṣṭaṃ śaivālaṃ kṣaṇamātraṃ na tiṣṭhati /
āvṛṇoti tathā māyā prājñaṃ vāpi parāṅmukham

jīvato yasya kaivalyaṃ videho'pi sa kevalaḥ /
samādhiniṣṭhatāmetya nirvikalpo bhavānagha

ajñānahṛdayagrantherniḥśeṣavilayastadā /
samādhinā vikalpena yadādvaitātmadarśanam

atrātmatvaṃ dṛḍhīkurvannahamādiṣu saṃtyajan /
udāsīnatayā teṣu tiṣṭhedghaṭapaṭādivat

brahmādistambaparyantaṃ mṛṣāmātrā upādhayaḥ /
tataḥ pūrṇaṃ svamātmānaṃ paśyedekātmanā sthitam

svayaṃ brahmā svayaṃ viṣṇuḥ svayamindraḥ svayaṃ śivaḥ /
svayaṃ viśvamidaṃ sarvaṃ svasmādanyanna kiñcana

svātmanyāropitāśeṣābhāsavastunirāsataḥ /
svayameva paraṃbrahma pūrṇamadvayamakriyam

asatkalpo vikalpo'yaṃ viśvamityekavastuni /
nirvikāre nirākāre nirviśeṣe bhidā kutaḥ

draṣṭṛdarśanadṛśyādibhāvaśūnye nirāmaye /
kalpārṇava ivātyantaṃ paripūrṇe cidātmani

tejasīva tamo yatra vilīnaṃ bhrāntikāraṇam /
advitīye pare tattve nirviśeṣe bhidā kutaḥ

ekātmake pare tattve bhedakartā kathaṃ vaset /
suṣuptau sukhamātrāyāṃ bhedaḥ kenāvalokitaḥ

cittamūlo vikalpo'yaṃ cittābhāve na kaścana /
ataścittaṃ samādheyi pratyagrūpe parātmani

akhaṇḍānandamātmānaṃ vijñāya svasvarūpataḥ /
bahirantaḥ sadānandarasāsvādanamātmani

vairāgyasya phalaṃ bodho bodhasyoparatiḥ phalam /
svānandānubhavacchāntireṣaivoparateḥ phalam

yadyuttarottarābhāve pūrvapūrvaṃ tu niṣphalam /
nivṛttiḥ paramā tṛptirānando'nupamaḥ svataḥ

māyopādhirjagadyoniḥ sarvajñatvādilakṣaṇaḥ /
pārokṣyaśabalaḥ satyādyātmakastatpadābhidhaḥ

ālambanatayā bhāti yo'smatpratyayaśabdayoḥ /
antaḥkaraṇasaṃbhinnabodhaḥ sa tvaṃpadābhidhaḥ

māyāvidye vihāyaiva upādhī parajīvayoḥ /
akhaṇḍaṃ saccidānandaṃ paraṃ brahma vilakṣyate

itthaṃ vākyaistadarthānusandhānaṃ śravaṇaṃ bhavet /
yuktyā saṃbhāvitatvānusandhānaṃ mananaṃ tu tat

tābhyāṃ nirvicikitse'rthe cetasaḥ sthāpitasya yat /
ekatānatvametaddhi nididhyāsanamucyate

dhyātṛdhyāne parityajya kramāddhyeyaikagocaram /
nivātadīpavaccittaṃ samādhirabhidhīyate

vṛttayastu tadānīmapyajñātā ātmagocarāḥ /
smaraṇādanumīyante vyutthitasya samutthitāḥ

anādāviha saṃsāre sañcitāḥ karmakoṭayaḥ /
anena vilayaṃ yānti śuddho dharmo vivardhate

dharmameghamimaṃ prāhuḥ samādhiṃ yogavittamāḥ /
varṣatyeṣa yathā dharmāmṛtadhārāḥ sahasraśaḥ

amunā vāsanājāle niḥśeṣaṃ pravilāpite /
samūlonmūlite puṇyapāpākhye karmasañcaye

vākyamapratibaddhaṃ satprākparokṣāvabhāsite /
karāmalakamavadbodhamaparokṣaṃ prasūyate

vāsanānudayo bhogye vairāgyasya tadāvadhiḥ /
ahaṃbhāvodayābhāvo bodhasya paramāvadhiḥ

līnavṛtteranutpattirmaryādoparatestu sā /
sthitaprajño yatirayaṃ yaḥ sadānandamaśnute

brahmaṇyeva vilīnātmā nirvikāro viniṣkriyaḥ /
brahmātmanoḥ śodhitayorekabhāvāvagāhini

nirvikalpā ca cinmātrā vṛttiḥ prajñeti kathyate /
sā sarvadā bhavedyasya sa jīvanmukta iṣyate

dehendriyeṣvahaṃbhāva idambhāvastadanyake /
yasya no bhavataḥ kvāpi sa jīvanmukta iṣyate

na pratyagbrahmaṇorbhedaṃ kadāpi brahmasargayoḥ /
prajñayā yo vijānāti sa jīvanmukta iṣyate

sādhubhiḥ pūjyamāne'sminpīḍyamāne'pi durjanaiḥ /
samabhāvo bhavedyasya sa jīvanmukta iṣyate

vijñātabrahmatattvasya yathāpūrvaṃ na saṃsṛtiḥ /
asti cenna sa vijñātabrahmabhāvo bahirmukhaḥ

sukhādyanubhavo yāvattāvatprārabdhamiṣyate /
phalodayaḥ kriyāpūrvo niṣkriyo nahi kutracit

ahaṃ brahmeti vijñānātkalpakoṭiśatārjitam /
sañcitaṃ vilayaṃ yāti prabodhātsvapnakarmavat

svamasaṅgamudāsīnaṃ parijñāya nabho yathā /
na śliṣyate yatiḥ kiñcitkadācidbhāvikarmabhiḥ

na nabho ghaṭayogena surāgandhena lipyate /
tathātmopādhiyogena taddharmairnaiva lipyate

jñānodayātpurārabdhaṃ karma jñānānna naśyati /
adattvā svaphalaṃ lakṣyamuddiśyotsṛṣṭabāṇavat

vyāghrabuddhyā vinirmukto bāṇaḥ paścāttu gomatau /
na tiṣṭhati bhinattyeva lakṣyaṃ vegena nirbharam

ajaro'smyamaro'smīti ya ātmānaṃ prapadyate /
tadātmanā tiṣṭhato'sya kutaḥ prārabdhakalpanā

prārabdhaṃ siddhyati tadā yadā dehātmanā sthitiḥ /
dehātmabhāvo naiveṣṭaḥ prārabdhaṃ tyajyatāmataḥ

prārabdhakalpanāpyasya dehasya bhrāntireva hi

adhyastasya kutastattvamasatyasya kuto janiḥ /
ajātasya kuto nāśaḥ prārabdhamasataḥ kutaḥ

jñānenājñānakāryasya samūlasya layo yadi /
tiṣṭhatyayaṃ kathaṃ deha iti śaṅkāvato jaḍān

samādhātuṃ bāhyadṛṣṭyā prārabdhaṃ vadati śrutiḥ /
na tu dehādisatyatvabodhanāya vipaścitām

paripūrṇamanādyantamaprameyamavikriyam /
sadghanaṃ cidghanaṃ nityamānandaghanamavyayam

pratyagekarasaṃ pūrṇamanantaṃ sarvatomukham /
aheyamanupādeyamanādheyamanāśrayam

nirguṇaṃ niṣkriyaṃ sūkṣmaṃ nirvikalpaṃ nirañjanam /
anirūpyasvarūpaṃ yanmanovācāmagocaram

satsamṛddhaṃ svataḥsiddhaṃ śuddhaṃ buddhamanodṛśam /
ekamevādvayaṃ brahma neha nānāsti kiñcana

svānubhūtyā svayaṃ jñātvā svamātmānamakhaṇḍitam /
sasiddhaḥ susukhaṃ tiṣṭhan nirvikalpātmanātmani

kva gataṃ kena vā nītaṃ kutra līnamidaṃ jagat /
adhunaiva mayā dṛṣṭaṃ nāsti kiṃ mahadadbhutam

kiṃ heyaṃ kimupādeyaṃ kimanyatkiṃ vilakṣaṇam /
akhaṇḍānandapīyūṣapūrṇabrahmamahārṇave

na kiñcidatra paśyāmi na śṛṇomi na vedmyaham /
svātmanaiva sadānandarūpeṇāsmi svalakṣaṇaḥ

asaṅgo'hamanaṅgo'hamaliṅgo'haṃ hariḥ /
praśānto'hamananto'haṃ paripūrṇaścirantanaḥ

akartāhamabhoktāhamavikāro'hamavyayaḥ /
śuddho bodhasvarūpo'haṃ kevalo'haṃ sadāśivaḥ

etāṃ vidyāmapāntaratamāya dadau / apāntaratamo brahmaṇe dadau / brahmā ghorāṅgirase dadau / ghorāṅgirā raikvāya dadau / raikvo rāmāya dadau / rāmaḥ sarvebhyo bhūtebhyo dadāvityetannirvāṇānuśāsanaṃ vedānuśāsanaṃ vedānuśāsanamityupaniṣat |
ॐ pūrṇamadaḥ pūrṇamidaṃ pūrṇātpūrṇamudacyate /
pūrṇasya pūrṇamādāya pūrṇamevāvaśiṣyate //
ॐ śāntiḥ śāntiḥ śāntiḥ //
// iti adhyātmopaniṣatsamāptā //
adhikādhyayanāya
vargaḥupaniṣadaḥ