विष्णुस्मृति · अध्याय 10

ब्रह्मघ्नां ये स्मृता लोका ये लोकाः कूटसाक्षिणाम्
तुलाधारस्य ते लोकास् तुलां धारयतो मृषा ॥

धर्मपर्यायवचनैर् धट इत्य् अभिधीयसे
त्वम् एव धट जानीषे न विदुर् यानि मानुषाः ॥

व्यवहाराभिशस्तो ऽयं मानुषस् तोल्यते त्वयि
तद् एनं संशयाद् अस्माद् धर्मतस् त्रातुम् अर्हसि ॥

ततस् त्व् आरोपयेच् छिक्ये भूय एवाथ तं नरम्
तुलितो यदि वर्धेत ततः शुद्धः स धर्मतः ॥

शिक्यच्छेदाक्षभङ्गेषु भूयस् त्व् आरोपयेन् नरम्
एवं निःसंशयं ज्ञानं यतो भवति निर्णयः ॥