सुभाषितरत्नकोश · अध्याय 7

यस्याधोधस् तथोपर्युपरि निरवधि भ्राम्यतो विश्वम् अश्वैर् आवृत्तालात-लीलां रचयति रयतो मण्डलं तिग्म-धाम्नः
सो ऽव्याद् उत्तप्त-कार्तस्वर-सरल-शर-स्पर्धिभिर् धाम-दण्डैर् उद्दण्डैः प्रापयन् वः प्रचुरतम-तमः-स्तोमम् अस्तं समस्तम् ॥

शुक-तुण्ड-च्छवि सवितुश् चण्ड-रुचः पुण्डरीक-वन-बन्धोः ।
मण्डलम् उदितं वन्दे कुण्डलम् आखण्डलाशायाः ॥

तुङ्गोदयाद्रि-भुजगेन्द्र-फणोपलाय व्योमेन्द्र-नील-तरु-काञ्चन-पल्लवाय
संसार-सागर-समुत्क्रमियोगिसार्थ प्रस्थान-पूर्ण-कलसाय नमः सवित्रे ॥

संसक्तं सिक्त-मूलाद् अभिनव-भुवनोद्यान-कौतूहलिन्या यामिन्या कन्ययेवामृत-करकलशा-वर्जितेनामृतेन
अर्कालोकः क्रियाद् वो मुदं उदय-शिरश् चक्रवालालवालाद् उद्यद्-बाल-प्रवाल-प्रतिम-रुचिर् अहः-पादप-प्राक्-प्रवालः ॥