संवित्सिद्धि · श्लोक 141-160

भेदः परस्परानात्म्यं भावानाम् एवम् एतयोः ॥

स्वरूपम् अभ्युपेत्यैव भेदाभेदविकल्पयोः ॥

(बाधनम्) तेन वाग्बाधाद् विरोधेन निगृह्यसे ॥

भिन्नाभिन्नत्वसम्बन्ध सदसत्त्वविकल्पनम् ॥

प्रत्यक्षानुभवापास्तं केवलं कण्ठशोषणम् ॥

नीले नीलमतिर् यादृग् उत्पले नीलधीर् हि सा ॥

नीलम् उत्पलम् एवेदम् इति साक्षाच् चकास्ति नः ॥

यथा विदितसंयोग सम्बन्धे ऽप्यक्षगोचरे ॥

भेदाभेदादिदुस्तर्क विकल्पाधानविभ्रमः ॥

तद्वत् तादात्म्यसम्बन्धे श्रुतिप्रत्यक्षमूलके ॥

श्रुतिदण्डेन दुस्तर्क विकल्पभ्रमवारणम् ॥

निर्दोषापौरुषेयी च श्रुतिर् अत्यर्थम् आदरात् ॥

असकृत् तत् त्वम् इत्य् आह तादात्म्यं ब्रह्मजीवयोः ॥

ब्रह्मानन्दह्रदान्तस्थो मुक्तात्मा सुखम् एधते ॥

फले च फलिनो ऽभावान् मोक्षस्यापुरुषार्थता ॥

एकशेषे हि चिद्धातोः कस्य मोक्षः फलं भवेत् ॥

किंच प्रपञ्चरूपेण का नु संविद् विवर्तते ॥

न तावद् घटधीस् तस्याम् असत्याम् अपि दर्शनात् ॥

न हि तस्याम् अजातायां नष्टायां वाखिलं जगत् ॥

नास्तीति शक्यते वक्तुम् उक्तौ प्रत्यक्षबाधनात् ॥