ऋग्वेद · अध्याय 9.103

प्र पुनानाय वेधसे सोमाय वच उद्यतम् ।
भृतिं न भरा मतिभिर् जुजोषते ॥

परि वाराण्य् अव्यया गोभिर् अञ्जानो अर्षति ।
त्री षधस्था पुनानः कृणुते हरिः ॥

परि कोशम् मधुश्चुतम् अव्यये वारे अर्षति ।
अभि वाणीर् ऋषीणां सप्त नूषत ॥

परि णेता मतीनां विश्वदेवो अदाभ्यः ।
सोमः पुनानश् चम्वोर् विशद् धरिः ॥

परि दैवीर् अनु स्वधा इन्द्रेण याहि सरथम् ।
पुनानो वाघद् वाघद्भिर् अमर्त्यः ॥

परि सप्तिर् न वाजयुर् देवो देवेभ्यः सुतः ।
व्यानशिः पवमानो वि धावति ॥