ऋग्वेद · अध्याय 9.044

प्र ण इन्दो महे तन ऊर्मिं न बिभ्रद् अर्षसि ।
अभि देवाँ अयास्यः ॥

मती जुष्टो धिया हितः सोमो हिन्वे परावति ।
विप्रस्य धारया कविः ॥

अयं देवेषु जागृविः सुत एति पवित्र आ ।
सोमो याति विचर्षणिः ॥

स नः पवस्व वाजयुश् चक्राणश् चारुम् अध्वरम् ।
बर्हिष्माँ आ विवासति ॥

स नो भगाय वायवे विप्रवीरः सदावृधः ।
सोमो देवेष्व् आ यमत् ॥

स नो अद्य वसुत्तये क्रतुविद् गातुवित्तमः ।
वाजं जेषि श्रवो बृहत् ॥