ऋग्वेद · अध्याय 9.025

पवस्व दक्षसाधनो देवेभ्यः पीतये हरे ।
मरुद्भ्यो वायवे मदः ॥

पवमान धिया हितो3 ऽभि योनिं कनिक्रदत् ।
धर्मणा वायुम् आ विश ॥

सं देवैः शोभते वृषा कविर् योनाव् अधि प्रियः ।
वृत्रहा देववीतमः ॥

विश्वा रूपाण्य् आविशन् पुनानो याति हर्यतः ।
यत्रामृतास आसते ॥

अरुषो जनयन् गिरः सोमः पवत आयुषक् ।
इन्द्रं गच्छन् कविक्रतुः ॥

आ पवस्व मदिन्तम पवित्रं धारया कवे ।
अर्कस्य योनिम् आसदम् ॥