ऋग्वेद · अध्याय 8.029

बभ्रुर् एको विषुणः सूनरो युवाञ्ज्य् अङ्क्ते हिरण्ययम् ॥

योनिम् एक आ ससाद द्योतनो ऽन्तर् देवेषु मेधिरः ॥

वाशीम् एको बिभर्ति हस्त आयसीम् अन्तर् देवेषु निध्रुविः ॥

वज्रम् एको बिभर्ति हस्त आहितं तेन वृत्राणि जिघ्नते ॥

तिग्मम् एको बिभर्ति हस्त आयुधं शुचिर् उग्रो जलाषभेषजः ॥

पथ एकः पीपाय तस्करो यथाँ एष वेद निधीनाम् ॥

त्रीण्य् एक उरुगायो वि चक्रमे यत्र देवासो मदन्ति ॥

विभिर् द्वा चरत एकया सह प्र प्रवासेव वसतः ॥

सदो द्वा चक्राते उपमा दिवि सम्राजा सर्पिरासुती ॥

अर्चन्त एके महि साम मन्वत तेन सूर्यम् अरोचयन् ॥