ऋग्वेद · अध्याय 7.089

मो षु वरुण मृन्मयं गृहं राजन्न् अहं गमम् ।
मृळा सुक्षत्र मृळय ॥

यद् एमि प्रस्फुरन्न् इव दृतिर् न ध्मातो अद्रिवः ।
मृळा सुक्षत्र मृळय ॥

क्रत्वः समह दीनता प्रतीपं जगमा शुचे ।
मृळा सुक्षत्र मृळय ॥

अपाम् मध्ये तस्थिवांसं तृष्णाविदज् जरितारम् ।
मृळा सुक्षत्र मृळय ॥

यत् किं चेदं वरुण दैव्ये जने ऽभिद्रोहम् मनुष्या3श् चरामसि ।
अचित्ती यत् तव धर्मा युयोपिम मा नस् तस्माद् एनसो देव रीरिषः ॥