ऋग्वेद · अध्याय 5.026

अग्ने पावक रोचिषा मन्द्रया देव जिह्वया ।
आ देवान् वक्षि यक्षि च ॥

तं त्वा घृतस्नव् ईमहे चित्रभानो स्वर्दृशम् ।
देवाँ आ वीतये वह ॥

वीतिहोत्रं त्वा कवे द्युमन्तं सम् इधीमहि ।
अग्ने बृहन्तम् अध्वरे ॥

अग्ने विश्वेभिर् आ गहि देवेभिर् हव्यदातये ।
होतारं त्वा वृणीमहे ॥

यजमानाय सुन्वत आग्ने सुवीर्यं वह ।
देवैर् आ सत्सि बर्हिषि ॥

समिधानः सहस्रजिद् अग्ने धर्माणि पुष्यसि ।
देवानां दूत उक्थ्यः ॥

न्य् अ1ग्निं जातवेदसं होत्रवाहं यविष्ठ्यम् ।
दधाता देवम् ऋत्विजम् ॥

प्र यज्ञ एत्व् आनुषग् अद्या देवव्यचस्तमः ।
स्तृणीत बर्हिर् आसदे ॥

एदम् मरुतो अश्विना मित्रः सीदन्तु वरुणः ।
देवासः सर्वया विशा ॥