ऋग्वेद · अध्याय 4.046

अग्रम् पिबा मधूनां सुतं वायो दिविष्टिषु ।
त्वं हि पूर्वपा असि ॥

शतेना नो अभिष्टिभिर् नियुत्वाँ इन्द्रसारथिः ।
वायो सुतस्य तृम्पतम् ॥

आ वां सहस्रं हरय इन्द्रवायू अभि प्रयः ।
वहन्तु सोमपीतये ॥

रथं हिरण्यवन्धुरम् इन्द्रवायू स्वध्वरम् ।
आ हि स्थाथो दिविस्पृशम् ॥

रथेन पृथुपाजसा दाश्वांसम् उप गच्छतम् ।
इन्द्रवायू इहा गतम् ॥

इन्द्रवायू अयं सुतस् तं देवेभिः सजोषसा ।
पिबतं दाशुषो गृहे ॥

इह प्रयाणम् अस्तु वाम् इन्द्रवायू विमोचनम् ।
इह वां सोमपीतये ॥