ऋग्वेद · अध्याय 10.169

मयोभूर् वातो अभि वातूस्रा ऊर्जस्वतीर् ओषधीर् आ रिशन्ताम् ।
पीवस्वतीर् जीवधन्याः पिबन्त्व् अवसाय पद्वते रुद्र मृळ ॥

याः सरूपा विरूपा एकरूपा यासाम् अग्निर् इष्ट्या नामानि वेद ।
या अङ्गिरसस् तपसेह चक्रुस् ताभ्यः पर्जन्य महि शर्म यच्छ ॥

या देवेषु तन्व1म् ऐरयन्त यासां सोमो विश्वा रूपाणि वेद ।
ता अस्मभ्यम् पयसा पिन्वमानाः प्रजावतीर् इन्द्र गोष्ठे रिरीहि ॥

प्रजापतिर् मह्यम् एता रराणो विश्वैर् देवैः पितृभिः संविदानः ।
शिवाः सतीर् उप नो गोष्ठम् आकस् तासां वयम् प्रजया सं सदेम ॥