ऋग्वेद · अध्याय 1.066

रयिर् न चित्रा सूरो न संदृग् आयुर् न प्राणो नित्यो न सूनुः ॥

तक्वा न भूर्णिर् वना सिषक्ति पयो न धेनुः शुचिर् विभावा ॥

दाधार क्षेमम् ओको न रण्वो यवो न पक्वो जेता जनानाम् ॥

ऋषिर् न स्तुभ्वा विक्षु प्रशस्तो वाजी न प्रीतो वयो दधाति ॥

दुरोकशोचिः क्रतुर् न नित्यो जायेव योनाव् अरं विश्वस्मै ॥

चित्रो यद् अभ्राट् छ्वेतो न विक्षु रथो न रुक्मी त्वेषः समत्सु ॥

सेनेव सृष्टामं दधात्य् अस्तुर् न दिद्युत् त्वेषप्रतीका ॥

यमो ह जातो यमो जनित्वं जारः कनीनाम् पतिर् जनीनाम् ॥

तं वश् चराथा वयं वसत्यास्तं न गावो नक्षन्त इद्धम् ॥

सिन्धुर् न क्षोदः प्र नीचीर् ऐनोन् नवन्त गावः स्व1र् दृशीके ॥