ऋग्वेद · अध्याय 1.028

यत्र ग्रावा पृथुबुध्न ऊर्ध्वो भवति सोतवे ।
उलूखलसुतानाम् अवेद् व् इन्द्र जल्गुलः ॥

यत्र द्वाव् इव जघनाधिषवण्या कृता ।
उलूखलसुतानाम् अवेद् व् इन्द्र जल्गुलः ॥

यत्र नार्य् अपच्यवम् उपच्यवं च शिक्षते ।
उलूखलसुतानाम् अवेद् व् इन्द्र जल्गुलः ॥

यत्र मन्थां विबध्नते रश्मीन् यमितवा इव ।
उलूखलसुतानाम् अवेद् व् इन्द्र जल्गुलः ॥

यच् चिद् धि त्वं गृहे-गृह उलूखलक युज्यसे ।
इह द्युमत्तमं वद जयताम् इव दुन्दुभिः ॥

उत स्म ते वनस्पते वातो वि वात्य् अग्रम् इत् ।
अथो इन्द्राय पातवे सुनु सोमम् उलूखल ॥

आयजी वाजसातमा ता ह्य् उ1च्चा विजर्भृतः ।
हरी इवान्धांसि बप्सता ॥

ता नो अद्य वनस्पती ऋष्वाव् ऋष्वेभिः सोतृभिः ।
इन्द्राय मधुमत् सुतम् ॥

उच् छिष्टं चम्वोर् भर सोमम् पवित्र आ सृज ।
नि धेहि गोर् अधि त्वचि ॥