ऋग्वेद · अध्याय 1.004

सुरूपकृत्नुम् ऊतये सुदुघाम् इव गोदुहे ।
जुहूमसि द्यवि-द्यवि ॥

उप नः सवना गहि सोमस्य सोमपाः पिब ।
गोदा इद् रेवतो मदः ॥

अथा ते अन्तमानां विद्याम सुमतीनाम् ।
मा नो अति ख्य आ गहि ॥

परेहि विग्रम् अस्तृतम् इन्द्रम् पृच्छा विपश्चितम् ।
यस् ते सखिभ्य आ वरम् ॥

उत ब्रुवन्तु नो निदो निर् अन्यतश् चिद् आरत ।
दधाना इन्द्र इद् दुवः ॥

उत नः सुभगाँ अरिर् वोचेयुर् दस्म कृष्टयः ।
स्यामेद् इन्द्रस्य शर्मणि ॥

एम् आशुम् आशवे भर यज्ञश्रियं नृमादनम् ।
पतयन् मन्दयत्सखम् ॥

अस्य पीत्वा शतक्रतो घनो वृत्राणाम् अभवः ।
प्रावो वाजेषु वाजिनम् ॥

तं त्वा वाजेषु वाजिनं वाजयामः शतक्रतो ।
धनानाम् इन्द्र सातये ॥

यो रायो3 ऽवनिर् महान् सुपारः सुन्वतः सखा ।
तस्मा इन्द्राय गायत ॥