पैप्पलाद-संहिता · अध्याय 9.8

अक्षण्वता लाङ्गलेन
पद्वता पतयिष्णुना ।
लाङ्गूलगृह्य चर्कृषुर्
वृकेण यवम् अश्विना ॥

देवा एतं मधुना संयुतं यवं
सरस्वत्याम् अधि वणाव् अचर्कृषुः ।
इन्द्र आसीत् सीरपतिः शतक्रतुः
किनाशा आसन् मरुतः सुदानवः ॥

हिरण्ययं कलशं सुदानवो
दिव्यया सरघया कृतम् ।
अव भृतम् अश्विना यवं
तद् युवं मधु चक्रथुः ॥

कृशाव् एतद् अजयतम्
अश्विना सारघं मधु ।
ततो यवो व्य् अरोहत्
सो ऽभवद् विषदूषणः ॥

युवार्वान् सरघायाः
प्रखिद्य मध्व् आभरत् ।
(…) ॥

यद् वृकं मधुपावानम्
अवामयतम् अश्विना ।
(…) ॥

कैरण्डा नाम सरसो
वृकस्य वम्या अधि ।
ततो यवो व्य् अरोहत्
सो ऽभवद् विषदूषणः ॥

यद् अस्य भरथो मधु
सरघा सथ्व् अच्छिनत् ।
सद्यस् तद् अर्वतो युवं
पुनर् आ दत्तम् अश्विना ॥

यो यवं दिग्धविद्धो
अहिदष्ट उपासरत् ।
तीर्थे रध्रम् इव मज्जन्तम्
उत् तं भरतम् अश्विना ॥

यं वहन्त्य् अष्टायोगाः
षड्योगा यं चतुर्गवाः ।
स ते विषं वि बाधताम्
उग्रो मध्यमशीर् इव ॥