પૈપ્પલાદ-સંહિતા · અધ્યાય 9.8

અક્ષણ્વતા લાઙ્ગલેન
પદ્વતા પતયિષ્ણુના ।
લાઙ્ગૂલગૃહ્ય ચર્કૃષુર્
વૃકેણ યવમ્ અશ્વિના ॥

દેવા એતં મધુના સંયુતં યવં
સરસ્વત્યામ્ અધિ વણાવ્ અચર્કૃષુઃ ।
ઇન્દ્ર આસીત્ સીરપતિઃ શતક્રતુઃ
કિનાશા આસન્ મરુતઃ સુદાનવઃ ॥

હિરણ્યયં કલશં સુદાનવો
દિવ્યયા સરઘયા કૃતમ્ ।
અવ ભૃતમ્ અશ્વિના યવં
તદ્ યુવં મધુ ચક્રથુઃ ॥

કૃશાવ્ એતદ્ અજયતમ્
અશ્વિના સારઘં મધુ ।
તતો યવો વ્ય્ અરોહત્
સો ઽભવદ્ વિષદૂષણઃ ॥

યુવાર્વાન્ સરઘાયાઃ
પ્રખિદ્ય મધ્વ્ આભરત્ ।
(…) ॥

યદ્ વૃકં મધુપાવાનમ્
અવામયતમ્ અશ્વિના ।
(…) ॥

કૈરણ્ડા નામ સરસો
વૃકસ્ય વમ્યા અધિ ।
તતો યવો વ્ય્ અરોહત્
સો ઽભવદ્ વિષદૂષણઃ ॥

યદ્ અસ્ય ભરથો મધુ
સરઘા સથ્વ્ અચ્છિનત્ ।
સદ્યસ્ તદ્ અર્વતો યુવં
પુનર્ આ દત્તમ્ અશ્વિના ॥

યો યવં દિગ્ધવિદ્ધો
અહિદષ્ટ ઉપાસરત્ ।
તીર્થે રધ્રમ્ ઇવ મજ્જન્તમ્
ઉત્ તં ભરતમ્ અશ્વિના ॥

યં વહન્ત્ય્ અષ્ટાયોગાઃ
ષડ્યોગા યં ચતુર્ગવાઃ ।
સ તે વિષં વિ બાધતામ્
ઉગ્રો મધ્યમશીર્ ઇવ ॥