पैप्पलाद-संहिता · अध्याय 7.13
यासाम् आराद् आघोषामो
वातस्येव पृथग् यतः ।
तासां श्वन्वतीनाम्
इन्द्रो अपि कृतच् छिरः ॥
याः पुरस्ताद् आचरन्ति
साकं सूर्यस्य रश्मिभिः (…) ॥
या वातम् अनुसंयन्त्य्
अन्तरिक्षे अधो दिवः (…) ॥
यासां प्रेङ्खो दिवि बद्धो
अन्तरिक्षे हिरण्ययः (…) ॥
यास् तल्पान् अनुनृत्यन्त्य्
अन्तरिक्षे हिरण्ययान् (…) ॥
याः पतन्ति वातरथा
उत्तानाः पादघातिनीः (…) ॥
या वृक्षं परिसर्पन्ति
साच्य् अक्षी करिक्रतीः (…) ॥
याश् चत्वरे संगच्छन्ते
विकुम्बाश् चेलवासिनीः (…) ॥
यासां सिकतवापिषु
गृहो मितो हिरण्ययः (…) ॥
या आरोकैः प्रपद्यन्ते
पुष्करैर् इव जामयः (…) ॥
या नदीः प्रतिगाहन्ते
संरभ्य कन्या इव (…) ॥
यास् तीर्थानि विगाहन्ते
ऽघ्न्याः श्वसतीर् इव (…) ॥
याः समुद्राद् उच्चरन्त्य्
उच्चैर् घोषान् करिक्रतीः (…) ॥
या गच्छन्ति जनंजनम्
इच्छन्तीः प्रयुतं बहु ।
तासां श्वन्वतीनाम्
इन्द्रो अपि कृतच् छिरः ॥
मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0