ग्रंथ पाठ

पैप्पलाद-संहिता · अध्याय 2.71

2.71.1

कृतव्यधनि विध्य तं
यश् चकार तम् इज् जहि ।
न त्वाम् अचक्रुषे वयं
वधाय सं शिशीमहे ॥

2.71.2

यथा ते देव्य् ओषधे
प्रतीचीनं फलं कृतम् ।
एवा त्वं कृत्वने कृत्यां
हस्तगृह्य परा णय ॥

2.71.3

पुनः कृत्यां कृत्याकृते
गोधेवावटम् अन्व् अयत् ।
सक्तुर् इव सक्तुप्रेष्यं
प्रतीची प्रति दध्वसत् ॥

2.71.4

यां ते चक्रुर् वर्तनेषु
वार्ताकुषु वृतासु च ।
मण्डूके कृत्यां यां चक्रुस्
तया कृत्याकृतो जहि ॥

2.71.5

अग्निर् इवैतु प्रतिकूलम्
अनुकूलम् इवोदकम् ।
सुखे रथ इव वर्ततां
कृत्या कृत्याकृतं कृता ॥

मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0