ग्रंथ पाठ

पैप्पलाद-संहिता · अध्याय 2.58

2.58.1

व्यावृत्तौ पथो गावौ
व्यस्यौ युग्या उत ।
विद्वेषणं किलासिथ
यथैनौ व्य् अदिद्विषः ॥

2.58.2

वि किलैनाव् अदिद्विषः
शश्वतीभ्यः समाभ्यः ।
अथोल्मुकम् इव खादिरम्
अग्निर् वाम् अस्त्व् अन्तरा ॥

2.58.3

सिंहस् ते अस्तु चक्षुषे
व्याघ्रः परिष्वञ्जने ।
अग्निर् वाम् अस्त्व् अन्तरा
यथा वां न सहासति ॥

2.58.4

व्य् अद्यौद् व्य् अततनद्
व्य् आस्थत् कपट्व् इव ।
या ओषधे प्रसर्पसि
व्य् अग्निर् इव तौ दह ॥

2.58.5

वि वां यन्तु हृदयानि
वि चित्तानि मनांसि च ।
अथो यत् तन्वोः संगतं
तद् वाम् अस्तु विदूरकम् ॥

2.58.6

अस्ति वै वां विद्विकम्
उभौ शयने अन्तरा ।
विष्वञ्चौ पर्य् आ वर्तेथां
यथा वां न सहासति ॥

मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0