ग्रंथ पाठ

पैप्पलाद-संहिता · अध्याय 2.15

2.15.1

इन्द्रस्य या मही दृषत्
क्रिमेर् विश्वस्य तर्हणी ।
तया पिनष्मि सं क्रिमीन्
दृषदा खल्वाँ इव ॥

2.15.2

दृष्टम् अदृष्टम् अतृहम्
अथो कुरूरुम् अतृहम् ।
अल्गण्डून् सर्वाञ् छलूलान् क्रिमीन्
वचसा जम्भयामसि ॥

2.15.3

अल्गण्डून् हन्मि महता वधेन
दूना अदूना अरसा अभूवन् ।
शिष्टान् अशिष्टान् नि तिरामि वाचा
यथा क्रिमीणां नकिर् उच्छिषातै ॥

2.15.4

अन्वान्त्रियं शीर्षण्यम्
अथो पार्ष्टेयं क्रिमिम् ।
अवस्कवं व्यद्वरं क्रिमीन्
वचसा जम्भयामसि ॥

2.15.5

ये क्रिमयः पर्वतेषु ये वनेषु
य ओषधीषु पशुष्व् अप्स्व् अन्तः ।
ये अस्माकं तन्वं स्थाम चक्रिर
इन्द्रस् तान् हन्तु महता वधेन ॥

मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0