पैप्पलाद-संहिता · अध्याय 18.78

अपूपवान् यववांश् चरुर् एह सीदतु -
-उत्तभ्नुवन् पृथिवीं द्याम् इवोपरि ।
लोककृतः पथिकृतो यजामहे
ये देवानां घृतभागा इह स्थ ॥

अपूपपिहितान् कुम्भान्
यांस् ते देवा अधारयन् ।
ते ते सन्तु स्वधावन्तो
मधुमन्तो घृतश्चुतः ॥

यास् ते धाना अनुकिरामि
तिलमिश्राः स्वधावतीः ।
तास् ते सन्तु विभ्वीः प्रभ्वीस्
तास् ते राजानु मन्यतां
यमो अक्षितं भूयांसम् ॥

द्रप्सश् चस्कन्द प्रथमाम् अनु द्याम्
इमं च योनिम् अनु यश् च पूर्वः ।
ऋतस्य योनिम् अनु संचरन्तं
द्रप्सं जुहोम्य् अनु सप्त होत्राः ॥

शतधारं वायुम् अर्कं स्वर्विदं
नृचक्षसस् ते अभि चक्षते रयिम् ।
ये गृणन्ति प्र च यक्षन्ति सर्वदा
ते दुह्रते दक्षिणां सप्तमातरम् ॥

उत्सन् दुहन्ति कलशं चतुर्बिलं
मृडां धेनुं मधुमतीं स्वस्तये ।
ऊर्जं मदन्तीम् अदितिं जनेष्व्
अग्ने मा हिंसीः परमे व्योमन् ॥