पैप्पलाद-संहिता · अध्याय 18.26
न तस्मात् पूर्वं न परं न्व् अस्ति
न भूतं नोत भव्यं यद् आसीत् ।
सहस्रपाद् एकमूर्धा द्व्यात्मा
स एवेदम् आ वरीवर्ति भूतम् ॥
एकैकं ये अपतन् सुपर्णाः
सोमं दिप्सन्तो ऽह्या निबाढाः ।
कस् तेषां वेद पितरं मातरं च
को निदानं क आत्मानम् एषाम् ॥
येभिर् वात इषितः प्रवाति
ये ददन्ते पञ्च दिशः सध्रीचीः ।
य आहुतिम् अत्यमन्यन्त देवा
अपां नेतारः कतमे त आसन् ॥
इमाम् एषां पृथिवीं वस्त एको
अन्तरिक्षं पर्य् एको बभूव ।
दिवम् एषां ददते यो विधर्ता
सर्वा दिशो रक्षत्य् एक एषाम् ॥
मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0