बोधसार · अध्याय 44

[प्. 710-]
मनोमहिमा
किं बद्धमसि मुक्तं वा मनः पृच्छ महामुने ।
यदि बद्धमिति ब्रूयात्तर्हि बद्धोऽस्यसंशयः

किंचिन्मुक्तमिति ब्रूयात्किंचिन्मुक्तोऽसि मोहतः ।
यदि मुक्तमिति ब्रूयात्तर्हि मुक्तोऽसि मोहतः

बद्धेन मनसा बद्धो मुक्तो मुक्तेन चेतसा ।
न बद्धो न च मुक्तोऽयमिति वेदान्तनिर्णयः

स्फुरन्ति महिमानो ये यत्र यत्र जगत्त्रये ।
ते सर्वे मनसो धर्मा मनो हि महिमाऽऽश्रयम्

अणिमा महिमा चैव लघिमा गरिमा तथा ।
प्राप्तिः प्राकाम्यमीशित्वं वशित्वं मनसो गुणाः

मनो धनुर्मनो मौर्वी मन एव धनुर्धरः ।
मनो लक्ष्यं मनो वेधो मनो विद्धं विमुक्तये

मन एव मनुष्याणां कारणं बन्धमोक्षयोः ।
इतोऽधिकं तु किं वाच्यमद्वये तु स्थितं न तत्