बोधसार · अध्याय 16.28.3

[प्. 417-]
अथ रामायणश्रवणनिर्णयः ।
आभासरेणुभिस्तद्वज्जडं देहादि चेतति ।
अहिल्याऽपि शिला यद्वद्रामस्य पदपांसुभिः

वानरो यत्प्रसादेन संतीर्णः क्षारसागरम् ।
नरः किं तत्प्रसादेन न तरेद्भवसागरम्

प्राह रामस्तरन्सिन्धुं शिलारूपेण सेतुना ।
संसारसिन्धुतरणं निर्विकल्पसमाधिना

शान्तिसीता समानीता निहतो मोहरावणः ।
आत्मारामेण रामेण तद्रामायणमुत्तमम्

रमन्ते योगिनो यस्मिन्रमते योगिनां हृदि ।
तारकं ब्रह्म रामाख्यं रमतां हृदये मम