बोधसार · अध्याय 16.18

[प्. 393-]
अथ देवपूजोपयुक्तशास्त्रार्थनिर्णयः
त्यक्त्वा मोहमयीं पूजां पूजां बोधमयीं कुरु ।
चन्दनैरर्चनीयोऽयं न तु पङ्केन शंकरः

परिचीय पुरा देवं देवपूजापरो भव ।
देवे परिचयो नास्ति वद पूजा कथं भवेत्

तावत्पूजां न मनुते यावत्परिचयो न हि ।
जाते परिचये देवः पूजामपि न काङ्क्षति

पक्षद्वयेऽपि पश्यामि पूजां देवस्य दुर्घटाम् ।
पूज्यपूजकता न ज्ञे मूर्खस्त्वज्ञानसूतकी

न जाने क्व पलायन्ते धूपदीपाक्षतादयः ।
अस्माकं देवपूजायां देव एवावशिष्यते

देवानुसंधानधिया विस्मृते पूजनक्रमे ।
पूजायां जायते विघ्नः पूर्णपूजाफलं हि तत्

आनन्दघनगोविन्दपूजनारम्भकर्मणि ।
बोधे स्फुरति मोहात्मा यजमानः पलायितः