બોધસાર · અધ્યાય 16.18

[પ્. 393-]
અથ દેવપૂજોપયુક્તશાસ્ત્રાર્થનિર્ણયઃ
ત્યક્ત્વા મોહમયીં પૂજાં પૂજાં બોધમયીં કુરુ ।
ચન્દનૈરર્ચનીયોઽયં ન તુ પઙ્કેન શંકરઃ

પરિચીય પુરા દેવં દેવપૂજાપરો ભવ ।
દેવે પરિચયો નાસ્તિ વદ પૂજા કથં ભવેત્

તાવત્પૂજાં ન મનુતે યાવત્પરિચયો ન હિ ।
જાતે પરિચયે દેવઃ પૂજામપિ ન કાઙ્ક્ષતિ

પક્ષદ્વયેઽપિ પશ્યામિ પૂજાં દેવસ્ય દુર્ઘટામ્ ।
પૂજ્યપૂજકતા ન જ્ઞે મૂર્ખસ્ત્વજ્ઞાનસૂતકી

ન જાને ક્વ પલાયન્તે ધૂપદીપાક્ષતાદયઃ ।
અસ્માકં દેવપૂજાયાં દેવ એવાવશિષ્યતે

દેવાનુસંધાનધિયા વિસ્મૃતે પૂજનક્રમે ।
પૂજાયાં જાયતે વિઘ્નઃ પૂર્ણપૂજાફલં હિ તત્

આનન્દઘનગોવિન્દપૂજનારમ્ભકર્મણિ ।
બોધે સ્ફુરતિ મોહાત્મા યજમાનઃ પલાયિતઃ