अथर्ववेद · अध्याय 15.3

स संवत्सरमूर्ध्वोऽतिष्ठत्तं देवा अब्रुवन् व्रात्य किं नु तिष्ठसीति

सोऽब्रवीदासन्दीं मे सं भरन्त्विति

तस्मै व्रात्यायासन्दीं समभरन्

तस्या ग्रीष्मश्च वसन्तश्च द्वौ पादावास्तां शरच्च वर्षाश्च द्वौ

बृहच्च रथन्तरं चानूच्ये आस्तां यज्ञायज्ञियं च वामदेव्यं च तिरश्च्ये

ऋचः प्राञ्चस्तन्तवो यजूंषि तिर्यञ्चः

वेद आस्तरणं ब्रह्मोपबर्हणम्

सामासाद उद्गीथोऽपश्रयः

तामासन्दीं व्रात्य आरोहत्

तस्य देवजनाः परिष्कन्दा आसन्त्संकल्पाः प्रहाय्या विश्वानि भूतान्युपसदः

विश्वान्येवास्य भूतान्युपसदो भवन्ति य एवं वेद