108 Buddhist stotras · अध्याय 74

नमामि जिननाथाय नित्यानित्यविधायिने ।
निरम्बरविलासाय निर्विकल्पाय ते नमः ॥

मोक्षदाता कृतमोक्षो मोक्षसौख्यप्रदायकः ।
मेरुमण्डलमध्यस्थमोक्षदाय नमो ऽस्तु ते ॥

लोलकन्दर्पपाशाय लोकेशाय महात्मने ।
लोकरक्षाय देवाय लोकनाथाय ते नमः ॥

कनकाचलमध्यस्थकिन्नरैरुपपद्यते ।
कीर्तिहेतोः समाध्येषा कान्तिदं त्वामुपास्महे ॥

नाथमन्त्रसमुज्ज्वालनागाभरणधारिणे ।
निरवद्याय बुद्धाय बोधिदाय नमो ऽस्तु ते ॥

स्थानरक्षाकृता धीर स्थानभ्रष्टप्रपालक ।
लोचना-मामकी-तारा-पाण्डराभ्यो नमो नमः ॥

यक्षराक्षसवेतालभुजङ्गभयहारिणे ।
अमिताभकिरीटाय सिद्धिदाय नमो ऽस्तु ते ॥

भिक्षुरोमसहस्राणि भिक्षुरक्षाय ते नमः ।
श्लोकाष्टकमिदं पुण्यं कीर्तितं ते समाधिप ॥