108 Buddhist stotras · अध्याय 70

रूपलक्षणसंपूर्णो हीनोच्चसमसेवनः ।
सन्दर्शय सदा दानं नमस्ते दानपारग ॥

शब्दलक्षणसंपूर्णः सुशोभो गुणसागरः ।
संश्रावय सदा शीलं नमस्ते शीलपारग ॥

गन्धलक्षणसंपूर्णो दिव्यप्राणो विनायकः ।
संप्रापय जिन क्षान्तिं नमस्ते क्षान्तिपारग ॥

रसलक्षणसंपूर्णः सुजिह्वो धर्मदेशकः ।
भाषस्व सौगतं धर्मं नमस्ते वीर्यपारगः ॥

स्पर्शलक्षणसंपूर्णः अनिरुद्धो निरीहकः ।
संस्पर्शय जिन ध्यानं नमस्ते ध्यानपारग ॥

धर्मलक्षणसंपूर्णः सत्त्वेषु समचिन्तकः ।
प्रज्ञोपायमहाप्राप्त नमस्ते बुद्धिपारग ॥

षडभिज्ञस्तवं यो ऽयं त्रिसन्ध्यं भक्तिमान् पठेत् ।
संसारबन्धनं हित्वा स याति परमां गतिम् ॥