યોગયાત્રા · અધ્યાય 34

દિગ્દાહક્ષતજરજોશ્મવૃષ્ટિપાતૈર્ નિર્ઘાતક્ષિતિચલનાદ્ ઇવૈકૃતૈશ્ ચ।
યુદ્ધાન્તે મૃગશકુનૈશ્ ચ દીપ્તનાદૈર્ નો ભદ્રં ભવતિ જયે ઽપિ પાર્થિવસ્ય॥

શુભા મૃગપતત્રિણો મૃદુસમીરણો હ્લાદકૃત્
ગ્રહાઃ સ્ફુટમરીચયો વિગતરેણુદિઙ્મણ્ડલમ્।

યદાન્યદ્ અપિ વૈકૃતં ન વિજયાવસાને ભવેત્
તદા સુખમ્ અકણ્ટકં નૃપતિર્ અત્તિ દેશં રિપોઃ।
ઉદ્વાહમ્ અકાલોત્સવમ્ અભિષેકં ચાત્મજસ્ય યઃ કૃત્વા।
પ્રસ્થાનાવિહતઃ સો ઽભ્યેતિ તતશ્ ચોત્સવદિનેષુ॥

પરવિષયપુરાપ્તૌ સાધુદેવદ્વિજસ્વં
કુલજનવનિતાશ્ ચ ક્ષ્માધિપો નોપરુન્ધ્યાત્।
વિગજતુરગશસ્ત્રાન્નાર્તિભીતાંશ્ ચ હન્યાચ્
છુભતિથિદિવસર્ક્ષે હૃષ્ટસૈન્યો વશેચ્ ચ॥

સ્વવિષયમ્ ઉપગમ્ય માનવેન્દ્રો ઽવલિમ્ ઉપયાચિતકાનિ ચાધિકાનિ।
નિગદિતવિધિનૈવ સંપ્રદદ્યાત્ પ્રથમગણાસુરભૂતદૈવતેભ્યઃ॥

ઇતિ મનુજપતિર્ યથોપદેશં ભગણવિદાં પ્રકરોતિ યો વચાંસિ।
સ સકલનૃપમણ્ડલાધિપત્યં વ્રજતિ દિવિવ પુરન્દરો ઽચિરેણ॥એ6