યોગયાત્રા · અધ્યાય 12

વ્યસનં પ્રાપ્નો(તિ) મહદ્ વ્યતિપાતે નિર્ગતો ઽથવા મૃત્યુમ્।
વૈધૃતિગમને ઽપ્ય્ એવં ત્ર્યહ્નસ્પૃશિ સમુપદિશાન્ત્ય્ એવ॥

નાવમરાત્રે યાયાદ્ દોષસ્ તત્રાધિમાસકે વ્યસનમ્।
ઋત્વયનયુગસ્યાપ્તૌ ન વિજયકાઙ્ક્ષી નૃપઃ પ્રવસેત્॥

સ્વર્ક્ષેશદશાધિપયોર્ મિત્રોદાસીનશત્રુભાંશભવાઃ।
તત્પાકભુજશ્ ચોક્તા વિજિગીષોર્ મિત્રમધ્યરિપવઃ॥

રિક્તાનિષ્ટદશો ઽરિર્ નિયમાદ્ વિજિગીષુણા સમુચ્છેદ્યઃ।
અવરોહિદશઃ પીડ્યઃ કર્ષયિતવ્યસ્ તથારોહી॥

ન સદૃશદશો ઽભિયોજ્યઃ સન્ધાનં તેન ભૂપતેર્ વ્યાસમ્।
અશુભૈષ્યાસન્નદશઃ શુભૈષ્યપાકેન સન્દધ્યાત્॥

શ્રેયાન્ વિપર્યયે વિગ્રહસ્ તથારોહિણ્ય્ અશુભૈષ્યદશઃ।
આસીત યદા શત્રુઃ શુભૈષ્યપાકે વિદૂરસ્થઃ॥

આરોહિશુભૈષ્યદશઃ પાકપતૌ બલયુતે ચ ભૂપાલઃ।
યાયાત્ તદ્વિપરીતં દ્વૈધીભાવં તુ મિશ્રદશઃ॥

રિક્તોપહતદશાયાં જન્મોદયનાથશત્રુપાકે ચ।
સ્વદશેશકારકદશઃ સંશ્રયણીયો નરાધિપતિઃ॥

ઉપચયકર્તુર્ વ્રજેદ્ દિશં બલવતિ કણ્ટકગે ચ દિક્પતૌ।
મનસાપિ ન દિગ્બલાન્વિતે દિગધિપતૌ ચ લલાટસંસ્થિતે॥

જન્મોદયપૌ બલાન્વિતાવ્ ઉપચયકણ્ટકગૌ શુભપ્રદૌ।
ક્રૂરાવ્ અપિ નિત્યમ્ એવ તૌ સૌમ્યૈર્ એવ સમાવ્ ઉદાહૃતૌ॥

સ્વદશાધિપજન્મલગ્નપાઃ સન્ધ્યાર્કોપગતા ન શોભનાઃ।
પરિહૃત્ય સિતાર્કનન્દનૌ મધ્યાસ્ તિગ્મકરાદ્ વિનિઃસૃતાઃ॥

પરસ્પરં સૌરિકુજૌ રવીન્દૂ ત્રિકોણગૌ ભાર્ગવલોહિતૌ ચ।
ફલં યદ્ ઉક્તં તદ્ અશેષમ્ એવ વિનાશ્ય પશ્ચાત્ સ્વદિશં નયન્તામ્॥

રિપુદિવસો યસ્ય ભવેત્ સૌમ્યો ઽપિ સ લગ્નગો ન શુભદાતા।
પાપો ઽપીષ્ટં જનયતિ મિત્રં સ્વદિને વિલગ્નસ્થઃ॥

બલિનઃ કણ્ટકસંસ્થા વર્ષાધિપમાસદિવસહોરેશાઃ।
દ્વિગુણશુભાશુભફલદા પરતઃ પરતો ગ્રહા યાતુઃ॥

યાત્રાજસિંહતુરગોપગતે વરિષ્ઠા મધ્યા શનૈશ્ચરબુધોશનસાં ગૃહેષુ।
ભાનૌ કુલીરઝષવૃશ્ચિકગે ઽતિદીર્ઘા શસ્તસ્ તુ દેવલમતે ઽધ્વનિ પૃષ્ઠતો ઽર્કઃ॥

સકલફલદદશાઢ્યકે પ્રવરા મધ્યાષ્ટવર્ગસંશુદ્ધૌ।
ન્યૂનફલા તાત્કાલિકવિલગ્નતિથિદિવસકરણાદ્યૈઃ॥

ઉત્તમફલા યાત્રા ત્રિકોણતુઙ્ગોપચ(યે)ષુ સૌમ્યેષુ।
મધ્યા સ્વમિત્રભવનોપગેષુ નીચારિભેષ્વ્ અધમા॥

મધ્યાધમાધમોત્તમસમમધ્યાધોધમોત્તમોત્કૃષ્ટા।
મધ્યોત્તમા ચ ષષ્ઠા યાત્રા યાત્રાવિદામિષ્ટા॥

દિગ્વર્ગવિલોમગે હતે સન્ધ્યાકરોપગતે વિદીધિતૌ।
શુક્રે પ્રવસન્ નરેર્ વશં યાતિ બુધે ચ વિલોમસંસ્થિતે॥

અનુલો(મ)ગતે શશાઙ્કજે શુક્રે ચૈવમ્ અપિ વ્યવસ્થિતે।
યાયાદ્ અવિશઙ્કિતો ઽપરૈઃ કથિતો ઽપ્યાઙ્ગિરસો યથેન્દુજઃ॥

આક્રન્દસારી દિનમધ્યગો ઽર્કઃ પૌરઃ પુરસ્તાદ્ અપરત્ર યાયી।
આક્રન્દ ઇન્દુર્ ગુરુમન્દસૌમ્યાઃ પૌરાઃ સ્મૃતા યાયિન ઇત્ય્ અતો ઽન્યે॥

યાયિગ્રહૈર્ વીર્યજયોપપન્નૈઃ કે ઽરિપ્રયાણં પ્રવદન્તિ ધન્યમ્।
સત્યં તથા કિં તુ વિશેષમ્ આહુસ્ તે ભૂપતેઃ સત્ફલદા જિગીષોઃ॥

દૃષ્ટે સામ્નાં કર્મનિષ્ટં સુરારૌ વૈતાલીયં પાદદમ્ભૌ ચ હિત્વા।
શસ્તો રાહુસ્ ત્ર્યાયકર્મોપયાતો યાતવ્યશ્ ચાસન્નતાગશ્ ચ કેતુઃ॥

સામ્નાં શુક્રબૃહસ્પતી દિનકરો વક્રશ્ ચ દણ્ડેશ્વરૌ
ભેદસ્યેન્દુજરાહુકેતુરવિજા દાનસ્ય નક્તમ્ચરઃ।
આર્કાદાટવિકં યમા(દ્) ભૃતબલં(સ્યુ)ર્ ભાર્ગવ્(આચ્ છ્રેણિકં)
જ્ઞાન્ મન્ત્રં રિપુદેશમૌલબલપાલક્(આભૌમે)ન્દુવાગીશ્વરાઃ॥

યતો ઽપ(પ)ન્નદિવસકરોડુનાથયોસ્ તતો વ્રજેદ્ રિપુનધનાય પાર્થિવ।
અથાયનેન યુગપદ્ એકસંસ્થયોર્ દ્યુનક્તયો રવિશશિનોર્ વ્રજેત્ તદા॥એ25