યોગવાસિષ્ઠ · શ્લોક 6.71-2

એકસપ્તતિતમઃ સર્ગઃ

શ્રીવસિષ્ઠ ઉવાચ ।
ઇત્યુક્તવતિ વેતાલે વક્તું પ્રશ્નાન્વિહસ્ય સઃ ।
ઉવાચ વચનં રાજા દન્તાંશુધવલામ્બરઃ

રાજોવાચ ।
આસ્તે કદાચિચ્ચેદં હિ બ્રહ્માણ્ડમજરં ફલમ્ ।
ઉત્તરોત્તરં દશગુણભૂતત્વક્પરિવેષ્ટિતમ્

તાદૃશાનાં સહસ્રાણિ ફલાનિ યત્ર સન્તિ હિ ।
અત્યુચ્ચૈસ્તાદૃશી શાખા વિપુલા ચલપલ્લવા

તાદૃશાનાં સહસ્રાણિ શાખાનાં યત્ર સન્ત્યથ ।
તાદૃશોઽસ્તિ મહાવૃક્ષો દુર્લક્ષ્યો વિપુલાકૃતિઃ

તાદૃશાનાં સહસ્રાણિ યત્ર સન્તિ મહીરુહામ્ ।
તાદૃશં વનમત્યુચ્ચૈરનન્તતરુગુલ્મકમ્

તાદૃશાનાં સહસ્રાણિ વનાનાં યત્ર સન્ત્યથ ।
તાદૃગસ્તિ વૃહચ્છૃઙ્ગમત્યુચ્ચૈર્ભરિતાકૃતિ

તાદૃશાનાં સહસ્રાણિ શ્રૃઙ્ગાણાં યત્ર સન્ત્યથ ।
તાદૃશોઽસ્ત્યતિવિસ્તીર્ણો દેશો વિપુલકોટરઃ

તાદૃશાનાં સહસ્રાણિ દેશાનાં યત્ર સન્ત્યથ ।
તાદૃગસ્તિ વૃહદ્દ્વીપં મહાહ્રદનદીયુતમ્

તાદૃશાનાં સહસ્રાણિ દ્વીપાનાં યત્ર સન્ત્યથ ।
તાદૃગસ્તિ મહીપીઠં વિચિત્રરચનાન્વિતમ્

તાદૃશાનાં સહસ્રાણિ પૃથ્વીનાં યત્ર સન્ત્યથ ।
તાદૃગસ્તિ મહાસ્ફારં મહાભુવનડમ્બરમ્

તાદૃશાનાં સહસ્ત્રાણિ જગતાં યત્ર સન્ત્યથ ।
તાદૃગસ્તિ મહચ્ચાણ્ડં ચણ્ડમમ્બરપીઠવત્

તાદૃશાનાં સહસ્રાણિ યત્રાણ્ડાનિ કરણ્ડકાઃ ।
તાદૃશોઽસ્તિ ગતસ્પન્દો વિપુલાબ્ધિશ્ચ સાગરઃ

તાદૃક્સાગરલક્ષાણિ તરઙ્ગો યત્ર પેલવઃ ।
તાદૃશઃ સ્વવિલાસાત્મા નિર્મલોઽસ્તિ મહાર્ણવઃ

તાદૃગબ્ધિસહસ્રાણિ યસ્યોદરજલાન્યથ ।
તાદૃશોઽસ્તિ પુમાન્કશ્ચિદત્યુચ્ચૈર્ભરિતાકૃતિઃ

તાદૃશાનાં નૃણાં લક્ષૈર્યસ્ય માલોરસિ સ્થિતા ।
પ્રધાનં સર્વસત્તાનાં તાદૃશોઽસ્તિ પરઃ પુમાન્

તાદૃશાનાં સહસ્રાણિ પુરુષાણાં મહાત્મનામ્ ।
સ્ફુરન્તિ મણ્ડલે યસ્ય સ્વતનૂરુહજાલવત્

તાદૃશોઽસ્તિ મહાદિત્યઃ શતમન્યાસુ દૃષ્ટિષુ ।
યા એતાઃ કલનાઃ સર્વાસ્તા એતાસ્તસ્ય દીપ્તયઃ

અસ્યાદિત્યસ્ય દીપ્તીનાં બ્રહ્માણ્ડાસ્ત્રસરેણવઃ ।
મયા ચિત્સૂર્ય ઇત્યુક્તઃ સર્વમેતત્તપત્યસૌ

વિજ્ઞાનાત્મૈવ પરમો ભાસ્કરો ભાવિતાશયઃ ।
ઇમે યે ભુવનાભોગાસ્તસ્યૈવ ત્રસરેણવઃ

વિજ્ઞાનપરમાર્કસ્ય ભાસા ભાન્તિ ભવન્તિ ચ ।
ઇમા જગદહર્લક્ષ્મ્યઃ ક્વચિલ્લક્ષ્મ્યો રવેરિવ

વિજ્ઞાનમાત્રકચિતાત્મનિ જન્તુજાતે
ત્રૈલોક્યમણ્ડપમણેરવિકાસભાજિ ।
ચિજ્જન્મનોર્ભવનસંભ્રમતાવલેખાઃ
સન્તીહ રે ન હિ મનાગપિ શાન્તમાસ્સ્વ

ઇત્યાર્ષે શ્રીવાસિષ્ઠમહારામાયણે વાલ્મીકીયે દેવ૦ મોક્ષોપાયેષુ નિર્વાણપ્રકરણે પૂ૦ વેતાલપ્રથમપ્રશ્નોત્તરવર્ણનં નામૈકસપ્તતિતમઃ સર્ગઃ