યોગવાસિષ્ઠ · શ્લોક 6.40-2

ચત્વારિંશઃ સર્ગઃ

ઈશ્વર ઉવાચ ।
યથાકાલં યથારમ્ભં ન કરોષિ કરોષિ યત્ ।
ચિન્માત્રસ્ય શિવસ્યાન્તસ્તદેવાર્ચનમાત્મનઃ

તેનૈવાહ્લાદમાયાતિ યાતિ પ્રકટતાં તથા ।
તથા સ્થિતેન રૂપેણ સ્વેનૈવ સ્વયમીશ્વરઃ

રાગદ્વેષાદિશબ્દાર્થાનાત્મન્યન્યતયામલે ।
સંભવન્તિ પૃથગ્રૂપાવહ્નૌ વહ્નિકણા ઇવ

યદ્યદ્રાજત્વદીનત્વસુખદુઃખાદિવેદનમ્ ।
આત્મીયં પરકીયં ચ તત્તદર્ચનમાત્મનઃ

વિશ્વસંવિત્તિરેવાર્ચા નિત્યસ્યાત્મન એવ ચ ।
ઘટાદ્યાત્મતયા બ્રહ્મ સ્વયમાત્મા તથૈવ ચ

શિવં શાન્તમનાભાસમેકં ભાસ્વરમાગતમ્ ।
જગત્પ્રત્યયવત્સર્વમાત્મરૂપમિદં સ્થિતમ્

અહો નુ ચિત્રમાત્મૈવ ઘટાદ્યન્યદ્વ્યવસ્થિતમ્ ।
જીવાદિસ્વસ્વભાવોઽન્તર્નૂનં વિસ્મૃતિમાનિવ

સર્વાત્મકસ્યાનન્તસ્ય શિવસ્યાન્તઃ કિલાત્મનઃ ।
પૂજ્યપૂજકપૂજાખ્યો વિભ્રમઃ પ્રોદિતઃ કુતઃ

નિયતાકારતા શાન્તે ન ચ સંભવતીશ્વરે ।
યત્ર સંકલ્પ્યતે બ્રહ્મન્પૂજ્યપૂજામયઃ ક્રમઃ

પૂજ્યપૂજાદ્યવચ્છિન્નો દેવો નિત્યામલાત્મનઃ ।
સર્વશક્તેરનન્તસ્ય નેશ્વરત્વસ્ય ભાજનમ્

ત્રિજગત્પ્રસૃતાચ્છાચ્છસંવિદ્રૂપસ્ય ચાત્મનઃ ।
નેશ્વરસ્યાકૃતેર્બ્રહ્મન્વ્યપદેશો હિ યુજ્યતે

દેશકાલપરિચ્છિન્નો યેષાં સ્યાત્પરમેશ્વરઃ ।
અસ્માકમુપદેશ્યાસ્તે ન વિપશ્ચિદ્વિપશ્ચિતામ્

તદીયાં દૃષ્ટિમુત્સૃજ્ય તથેમામવલમ્બ્ય ચ ।
સમઃ સ્વચ્છમનાઃ શાન્તો વીતરાગો નિરામયઃ

કામોપહારૈરભિતો યથાપ્રાપ્તૈરખિન્નધીઃ ।
આત્માનમર્ચયંસ્તિષ્ઠ સુખદુઃખશુભાશુભૈઃ

અધિગતવતિ સાધૌ ચૈકમેવાનુરૂપં
ત્વયિ તરલિતજીવે જન્મદુઃખાદિ કિંચિત્ ।
ન લગતિ પરિશૂન્યે સર્વતઃ સ્ફાટિકાઙ્ગે
નવસદન ઇવાઙ્કે નિષ્કલઙ્કે કલઙ્કઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મો૦ નિર્વાણપ્રકરણે પૂ૦ દેવતાતત્ત્વવિચારો નામ ચત્વારિશઃ સર્ગઃ