યોગવાસિષ્ઠ · અધ્યાય 6.151

એકપઞ્ચાશદધિકશતતમઃ સર્ગઃ

અન્યમુનિરુવાચ ।
તત્ર તે નગરં તાનિ ગૃહાણિ તરવશ્ચ તે ।
ક્ષિપ્રેણ શુષ્કતૃણવત્સર્વં ભસ્મત્વમાગતમ્

તત્રૈવં ભસ્મતાં પ્રાપ્તે સુપ્તે તે ભવતસ્તવ ।
તનૂ તથાતિસંતાપવિદારિતમહાશિલે

સ શશામ શનૈર્વહ્નિર્નિઃશેષીકૃતકાનનઃ ।
પરિપીતાર્ણવોઽગસ્ત્ય ઇવાસ્તં સમુપાયયૌ

તસ્મિન્નસ્તં ગતેવહ્નૌ તદ્ભસ્મેદ્ધં સુશીતલમ્ ।
દુધાવ કણશો વાયુરશેષં પુષ્પરાશિવત્

તતો ન જ્ઞાયતે નાસીત્ક્વાશ્રમઃ ક્વ તનૂ તથા ।
ક્વ પેટકં બહૂનાં તત્સ્વપ્નપૂર્જાગ્રતો યથા

અભાવમુપયાતે તે યદૈવં ભવતસ્તનૂ ।
સ્વપતસ્તે ભ્રમવતઃ સંવિદેવ વિજૃમ્ભતે

તસ્માત્ક તદ્ગલબિલં વિરાડાત્મા સ ચ ક્વ તે ।
દગ્ધો દગ્ધસ્ય સૌજસ્કઃ સૌજસ્કસ્યૈવ દેહકઃ

લબ્ધવાનસિ નો તસ્માદ્ધેતોર્દેહદ્વયં મુને ।
અનન્તે સ્વપ્નસંસારજાગ્રતીહાવતિષ્ઠસે

તદેવં સ્વપ્ન એવાયં જાગ્રદ્ભાવમુપાગતઃ ।
સર્વે વયમિહ સ્વપ્નપુરુષાસ્તવ સુવ્રત

અસ્માકં ત્વં સ્વપ્નનરસ્તવ સ્વપ્નનરા વયમ્ ।
અયમેવ ચિદાકાશઃ સર્વદાત્માત્મનિ સ્થિતઃ

તતઃ પ્રભૃતિ સંપન્નો ભવાન્સ્વપ્નનરો ભવન્ ।
જાગ્રત્પ્રત્યયવાઞ્જાગ્રન્નરો ગાર્હસ્થ્યસુસ્થિતઃ

એતત્તે કથિતં સર્વં યથાવૃત્તમશેષતઃ ।
અનુભૂતં સુદૃશ્યં ચ ધ્યાનેનૈતચ્ચ પશ્યસિ

ઇત્યાદિમધ્યરહિતોઽયમનન્તરૂપઃ
સંવિદ્ધનઃ કચતિ કાઞ્ચનતાપવત્ખે ।
તત્ફાલલોલવપુરાત્મનિ ચિન્મયાત્મા
સર્ગાત્મભિર્વિકસિતૈરસિતૈઃ સિતૈશ્ચ

ઇત્યાર્ષે શ્રીવાસિષ્ઠ૦ વાલ્મી૦ દે૦ મો૦ નિ૦ ઉ૦ અવિ૦ વિ૦ શ૦ અભાવદર્શનં નામૈકપઞ્ચાશદધિકશતતમઃ સર્ગઃ