યોગવાસિષ્ઠ · શ્લોક 6.125-2

પઞ્ચવિંશત્યધિકશતતમઃ સર્ગઃ

શ્રીવસિષ્ઠ ઉવાચ ।
સિદ્ધાન્તોઽધ્યાત્મશાસ્ત્રાણાં સર્વાપહ્નવ એવ હિ ।
નાવિદ્યાસ્તીહ નો માયા શાન્તં બ્રહ્મેદમક્રમમ્

શાન્ત એવ ચિદાભાસે સ્વચ્છે સમસમાત્મનિ ।
સમગ્રશક્તિખચિતે બ્રહ્મેતિ કલિતાભિધે

નિર્ણીય કેચિચ્છૂન્યત્વં કેચિદ્વિજ્ઞાનમાત્રતામ્ ।
કેચિદીશ્વરરૂપત્વં વિવદન્તે પરસ્પરમ્

સર્વમેવ પરિત્યજ્ય મહામૌની ભવાનઘ ।
નિર્વાણવાન્નિર્મનનઃ ક્ષીણચિત્તઃ પ્રશાન્તધીઃ

આત્મન્યેવાસ્સ્વ શાન્તાત્મા મૂકાન્ધબધિરોપમઃ ।
નિત્યમન્તર્મુખો ભૂત્વા સ્વાત્મનાન્તઃ પ્રપૂર્ણધીઃ

જાગ્રત્યેવ સુષુપ્તસ્થઃ કુરુ કર્માણિ રાઘવ ।
અન્તઃ સર્વપરિત્યાગી બહિઃ કુરુ યથાગતમ્

ચિત્તસત્તા પરં દુઃખં ચિત્તાસત્તા પરં સુખમ્ ।
અતશ્ચિત્તં ચિદેકાત્મા નય ક્ષયમવેદનાત્

દૃષ્ટા રમ્યમરમ્યં વા સ્થેયં પાષાણવત્સમમ્ ।
એતાવતાત્મયત્નેન જિતા ભવતિ સંસૃતિઃ

સંવેદનીયં ન સુખં નાસુખં ન ચ મધ્યમમ્ ।
એતાવતાત્મયત્નેન દુઃખાન્તોઽનન્ત આપ્યતે

આપીનમણ્ડલશશાઙ્કવદન્તરેવ
શ્રીમદ્રસાયનમયઃ સુખમેતિ તજ્જ્ઞઃ ।
વિજ્ઞાતસર્વભુવનત્રયવસ્તુસારઃ
કુર્વન્ન નામ કુરુતે પરમભ્યુપેતઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મો૦ નિર્વાણપ્રકરણે પૂ૦ તુર્યે સ્થૈર્યોપાયકથનંનામ પઞ્ચવિંશત્યુત્તરશતતમઃ સર્ગઃ