યોગવાસિષ્ઠ · શ્લોક 6.122-2

દ્વાવિંશત્યધિકશતતમઃ સર્ગઃ

મનુરુવાચ ।
યેન કેનચિદાચ્છન્નો યેન કેનચિદાશિતઃ ।
યત્રક્વચનશાયી ચ સ સમ્રાડિવ રાજતે

વર્ણધર્માશ્રમાચારશાસ્ત્રયન્ત્રણયોજ્ઝિતઃ ।
નિર્ગચ્છતિ જગજ્જાલાત્પઞ્જરાદિવ કેસરી

વાચામતીતવિષયો વિષયાશાદશોજ્ઝિતઃ ।
કામપ્યુપગતઃ શોભાં શરદીવ નભસ્તલમ્

ગમ્ભીરશ્ચ પ્રસન્નશ્ચ ગિરાવિવ મહાહ્રદઃ ।
પરાનન્દરસાક્ષુબ્ધો રમતે સ્વાત્મનાત્મનિ

સર્વકર્મફલત્યાગી નિત્યતૃપ્તો નિરાશ્રયઃ ।
ન પુણ્યેન ન પાપેન લિપ્યતે નેતરેણ ચ

સ્ફટિકઃ પ્રતિબિમ્બેન યથા યાતિ ન રઞ્જનમ્ ।
તજ્જ્ઞઃ કર્મફલેનાન્તસ્તથા નાયાતિ રઞ્જનમ્

વિહરઞ્જનતાવૃન્દે દેહકર્તનપૂજનૈઃ ।
ખેદાહ્લાદૌ ન જાનાતિ પ્રતિબિમ્બગતૈરિવ

નિઃસ્તોત્રો નિર્વિકારશ્ચ પૂજ્યપૂજાવિવર્જિતઃ ।
સંયુક્તશ્ચ વિયુક્તશ્ચ સર્વાચારનયક્રમૈઃ

તસ્માન્નોદ્વિજતે લોકો લોકાન્નોદ્વિજતે ચ સઃ ।
રાગદ્વેષભયાનન્દૈસ્ત્યજ્યતેઽપિ ચ યુજ્યતે

પ્રમેયે કસ્યચિદપિ ન રોહતિ મહાશયઃ ।
પ્રમેયીક્રિયતે ચાપિ બાલેનાપ્યદુરાશયઃ

તનું ત્યજતુ વા તીર્થે શ્વપચસ્ય ગૃહેઽપિ વા ।
મા કદાચન વા રાજન્વર્તમાનેઽપિ વા ક્ષણે

જ્ઞાનસંપ્રાપ્તિસમયે મુક્તોઽસૌ વિગતાશયઃ ।
અહંભ્રાન્તિર્હિ બન્ધાય મોક્ષો જ્ઞાનેન તત્ક્ષયઃ

સ પૂજનીયઃ સ સ્તુત્યો નમસ્કાર્યઃ સ યત્નતઃ ।
સ નિરીક્ષ્યોઽભિવાદ્યશ્ચ વિભૂતિવિભવૈષિણા

ન યજ્ઞતીર્થૈર્ન તપઃપ્રદાનૈ-
રાસાદ્યતે તત્પરમં પવિત્રમ્ ।
આસાદ્યતે ક્ષીણભવામયાનાં
ભક્ત્યા સતામાત્મવિદાં યદઙ્ગ

શ્રીવસિષ્ઠ ઉવાચ ।
એવમુક્ત્વા સ ભગવાન્મનુર્બ્રહ્મગૃહં યયૌ ।
ઇક્ષ્વાકુરપિ તાં દૃષ્ટિમવષ્ટભ્ય સ્થિરોઽભવત્

ઇત્યાર્ષે શ્રીવાસિષ્ઠમહારા૦ વા૦ દે૦ મો૦ નિર્વાણપ્રકરણે પૂ૦ ઇક્ષ્વાકુમનુસંવાદે ઇક્ષ્વાકુપ્રબોધનં નામ દ્વાવિંશત્યધિકશતતમઃ સર્ગઃ